U «ideałahičny kamplekt» biełaruskich dziaržaŭnych ustanovaŭ uvachodzić i abaviazkovaja padtrymka ajčynnaj presy. Chočaš ci nie — ale vypisvaj. Pryčym, kali nastaŭnikaŭ prymušajuć padpisvacca na «Nastaŭnickuju hazietu» za ich ułasnyja hrošy, to dziaržaŭnyja ŭstanovy da taho ž jašče masava zakupajuć stosy roznych haziet i časopisaŭ. Na pieryjadyčnyja vydańni dziaržaŭnymi arhanizacyjami vydatkoŭvajucca vializnyja hrošy — rachunak idzie na tysiačy dalaraŭ.

Infarmacyja pra padpiski jość u adkrytym dostupie. Prahledzieŭšy sajty dziaržzakupak, možna zrabić cikavyja vysnovy.

Naprykład, Akademija MUS vydatkoŭvaje na presu 18 tysiač rubloŭ (kala $9 tysiač). I heta tolki na druhoje paŭhodździe 2017 hoda. Adpaviedna, za hod suma padvojvajecca.

Akademija vypisvaje 146 biełaruskich vydańniaŭ i 105 — rasijskich.

Pryčym vypisvajecca absalutna ŭsio. Kali možna jašče zrazumieć vialiki šerah profilnych vydańniaŭ, to peŭnyja vyklikajuć ździŭleńnie. Navošta Akademii MUS patrebny, naprykład, rasiejski žanočy časopis «Karavan historyj»?

Nu i nie zabyvajemsia pra standartny nabor dziaržaŭnych haziet kštałtu «Respublika», «Sovietskaja Biełoruśsija» ci «Źviazda».

«Usie vydańni patrebnyja dla vučebnaha pracesu», — zapeŭnivaje «Našu Nivu» Žanna Švied, zahadčyca biblijateki Akademii MUS.

Praŭda, patłumačyć, chto farmiruje śpis (i navošta ŭ navučalnym pracesie budučaha milicyjanta časopis «Karavan historyj») Žanna Švied nie zmahła.

«Śpis farmirujuć ludzi, jakija zacikaŭlenyja ŭ hetym časopisie. Uvohule, što vy chočacie? Ja nie chaču havaryć na hetuju temu, toje našyja pracoŭnyja momanty», — skazała Švied.

Uvohule, siłaviki na presie nie ekanomiać. Zabiaśpiečvajuć śviežymi hazietami i budučych praparščykaŭ.

114 Hvardziejskaja škoła pa padrychtoŭcy praparščykaŭ i śpiecyjalistaŭ charčovaj słužby vydatkoŭvaje 19 804 rubli (amal $10 tysiač) na 330 vydańniaŭ.

Akademija kiravańnia pry prezidencie vypisvaje kala sotni vydańniaŭ. Suma — 17 tysiač rubloŭ (bolš za $8 tysiač).

Respublikanskaja navukova-techničnaja biblijateka vydatkoŭvaje na pieryjadyčnyja vydańni kala 300 tysiač rubloŭ za paŭhodździe ($150 tysiač). U śpisie — amal 800 vydańniaŭ. Zdavałasia b, absalutna łahična — kamu ž jašče vypisvać pieryjodyku, kali nie biblijatecy?

Ale ž davajcie pahladzim, što za vydańni.

Časopisy «J&W / Juvielirnyje ukrašienija i časy. Jewels & Watches», «Fashion Collection», Harper's Bazaar, «Sandra. Viazanije», «Susanna-rukodielije», «Wedding (Svad́ba)». A ci patrebny techničnaj biblijatecy časopis «Stilnyje pričieski»?

Pry hetym zadača techničnaj biblijateki sfarmulavana tak: «Farmiravańnie najbolš poŭnaha ŭ respublicy fondu ajčynnaj i zamiežnaj litaratury pa technicy, technałohii, ekanomicy pramysłovaści i sumiežnych halinach, fondu patentavych, narmatyŭnych dakumientaŭ pa standartyzacyi i pramysłovych katałohaŭ».

Nu i, naturalna, nie adstajuć i čynoŭniki.

Administracyja Leninskaha rajona Minska — 9500 rubloŭ (amal $5 tysiač). Navošta? Pieršamajski rajon — 6800 rubloŭ (kala $3,5 tysiačy). Saviecki rajon — 12 tysiač rubloŭ ($6,5 tysiačy).

Toje ž samaje i ŭ rehijonach. Naprykład, administracyja Leninskaha rajona Babrujska vydatkuje 6800 rubloŭ ($3,5 tysiačy). Administracyja Navabielickaha rajona Homiela — 2 tysiačy rubloŭ (kala $1000).

«U administracyi pavinna być padpiska na roznyja vydańni. Čamu vy ličycie, što jany nie spatrebiacca»?

Hetaja suma — taja, na jakuju my raźličvali. Ale, mahčyma, padpiski toj nie budzie, bo kiepska finansujuć u hetym hodzie. Pakul my spłanavali biudžet tolki na vydańni, jaki nas, jak orhan kiravańnia, prymušajuć vypisvać. Heta dziaržaŭnyja haziety: «Sovietskaja Biełoruśsija», «Respublika», plus haradskija haziety. Nam rekamiendujuć padpisvacca na hetyja vydańni. Ale finansaŭ mała, tamu budziem hladzieć paźniej, ci budzie padpiska, — patłumačyła «Našaj Nivie» Ina Nikitka, hałoŭny buchhałtar administracyi Leninskaha rajona Babrujska.

Žančyna nastojvaje, što presa čynoŭnikam patrebnaja.

«Kaniečnie, našy supracoŭniki čytajuć haziety. Jany vystupajuć u kalektyvach, viadziecca ž ideałahičnaja praca, viadziecca mietadyčnaje kiraŭnictva roznymi pytańniami. Čytajuć usie raździeły: i zakanadaŭčyja akty, i što adbyvajecca ŭ śviecie, i ŭ krainie. U kožnaha jość svaje abaviazki, i ŭ miežach hetaha strukturnyja padraździaleńni vypisvajuć vydańni», — paviedamiła Nikitka.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?