Kanfierencyja Katalickich Biskupaŭ u Biełarusi rychtuje pahadnieńnie, jakoje płanuje padpisać ź dziaržavaj. Na majskim plenarnym pasiadžeńni «biskupy vykazalisia za nieabchodnaść jurydyčnaha ŭrehulavańnia adnosin pamiž Katalickim Kaściołam u Biełarusi i dziaržavaj dla bolš efiektyŭnaha supracoŭnictva dziela duchoŭnaha dabra biełaruskaha naroda».

Na praciahu niekalkich apošnich hadoŭ u Biełarusi na roznych uzroŭniach abmiarkoŭvałasia padrychtoŭka pahadnieńnia pamiž Śviatym Pasadam i Respublikaj Biełaruś. Jak vynikaje z kamunikata, Kanfierencyja Biskupaŭ choča prapanavać sa svajho boku inšy dakumient, jaki, na jaje dumku, urehuluje adnosiny pamiž Kaściołam i dziaržavaj, naprykład, u śfierach miedycyny, adukacyi, kultury, — prakamientavaŭ dla Biełaruskaj redakcyi Vatykanskaha radyjo staršynia Kanfierencyi Katalickich Biskupaŭ u Biełarusi arcybiskup Tadevuš Kandrusievič.

«Vykliki času takija, što treba duchoŭna akarmlać i viaźniaŭ, i chvorych u špitalach, škoła taksama toje miesca, dzie pavinien prysutničać Kaścioł. A kali niama takoj damovy, časta naša prystunaść zaležyć ad kankretnaha čałavieka: ci puścić jon nas da viaźnia, ci dazvolić celebravać sv. Imšu ŭ špitali… I heta treba zamacavać pravam. Tamu my raspracoŭvajem takoje pahadnieńnie», — patłumačyŭ ijerarch.

Prykład takoha dakumienta ŭ Biełarusi ŭžo jość: jon byŭ padpisany 15 hadoŭ tamu pamiž dziaržavaj i Pravasłaŭnaj Carkvoj i staŭ bazaj dla bolš vuzkich damoŭ — z kankretnymi ministerstvami i viedamstvami.

Hetuju ž stratehiju ŭziaŭ pad uvahu i Katalicki Kaścioł u Biełarusi. Kali inicyjatyva budzie realizavana, pahadnieńnie pamiž Kaściołam u Biełarusi i dziaržavaj stanie novym šturškom i ŭ adnosinach, i ŭ pracy, ličyć arcybiskup Tadevuš Kandrusievič.

Mienavita zaciahnuty praces padrychtoŭki vatykanska-biełaruskaha pahadnieńnia i padšturchnuŭ da raspracoŭki damovy pamiž miascovym Kaściołam i dziaržavaj. Ideja taksama ŭžo była ahučana ŭ Aparacie Upaŭnavažanaha pa spravach relihij, pryznaŭsia arcybiskup Kandrusievič.

«My šmat razoŭ čuli: čamu ŭ vas niama takoj damovy? I ja asabista razmaŭlaŭ z Upaŭnavažanym pa spravach relihij i nacyjanalnaściaŭ, i jany adkrytyja na heta. Bo heta ŭžo pracuje ŭ Pravasłaŭnaj Carkvie. Heta bazavaje pahadnieńnie, niekalki staronak. Niekatoryja momanty byli ŭziaty ź isnujučaha dakumienta, bo kali hladzieć i na inšyja pahadnieńni Biełaruskaj Pravasłaŭnaj Carkvy z ustanovami, heta vielmi vialikaja praca. A ŭ nas pakul — heta baza, pryncypy», — skazaŭ ijerarch.

Na apošnim pasiadžeńni Kanfierencyi Katalickich Biskupaŭ u Biełarusi ŭ dakumient byli ŭniesieny niekatoryja papraŭki, kab u bližejšy čas pradstavić na ŭzroŭni Śviatoha Pasadu, dzie i vyrašycca dalejšy los pahadnieńnia.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?