«Naša Niva» prapanuje tradycyjny rejtynh najlepšych šmatsieryjnych filmaŭ apošnich troch miesiacaŭ. Jakija premjery nielha prapuścić ni ŭ jakim vypadku — čytajcie tut.
«Tabu» (Taboo)
Drama. Vialikabrytanija, 1-y siezon
Rejtynh na IMDB: 8,7
Łondan, XIX stahodździe. Džejms Dyłejni, jakoha daŭno ŭžo ličyli miortvym, niečakana viartajecca z Afryki paśla 10-hadovaj adsutnaści. Viartajecca akurat u toj momant, kali pamiraje jahony baćka i idzie padzieł spadčyny. Asablivuju cikavaść vyklikaje vyspa Nutka. Zdavałasia b, niepatrebnaja nikomu ziamla dzieści na zachodnim uźbiarežžy Kanady.
Kaliści baćki Dyłejni pryvioz adtul žonku, indyjanku, jakaja ŭ vyniku zvarjacieła ŭ Brytanii. Ad maci synu — Džejmsu — pierajšli peŭnyja mistyčnyja zdolnaści, jakija jon jašče padmacavaŭ u Afrycy. A Nutka akazvajecca nie takoj užo parožniaj ziamloj, jana cikavić usich: karonu, ZŠA, Ost-Indskuju kampaniju — jak miesca, ź jakoha možna vieści handal z Kitajem.
Tabu — heta kampramietujučaja suviaź Dyłejni z ułasnaj siastroj, jakuju ni adzin, ni druhaja nie zdolnyja spynić. Hałoŭnuju rolu vydatna syhraŭ Tom Chardzi.
Tahačasny Łondan pakazany va ŭsim svaim zaniapadzie — prajdziśviety, prastytutki, rekiet, słaby karol, brud i nendza. Atmaśfiernaja atrymałasia stužka.
«Maleńkaja vialikaja chłuśnia» (Big Little Lies)
Drama, kamiedyja. ZŠA, 1-y siezon
Rejtynh na IMDB: 8,7
Rajski haradok Manterej na ŭźbiarežžy Cichaha akijana. Kudy ni kiń — paŭsiul ci miljanier, ci chipi. Žyć u takim idealnym miescy pavinna być sapraŭdnaj asałodaj, ale žychary Mantereja ŭvieś čas žyvuć niejkimi intryhami i plotkami.
U haradok pierajazdžaje Džejn Čapman z synam Zihi. Heta adzinokaja, pryvabnaja, maładaja žančyna. Jana kaža, što pryjechała ŭ Manterej, bo tut najlepšyja hramadskija škoły. Nasamreč ža Džejn biažyć ad zdaniaŭ minułaha, jakija nie adpuskajuć jaje ni na chvilinu.
Uvieś sieryjał my viedajem, što ŭ škole adbyłosia zabojstva, ale nie viedajem da apošniaha, chto staŭ achviaraj i chto katam. Hieroi čas ad času vykazvajuć svaje zdahadki. A na ekranie dziejańni, što adbyvalisia napiaredadni zabojstva.
«Maleńkaja vialikaja chłuśnia» — heta historyja pra toje, kolki brudnaj bializny chavajecca ŭ samych, zdajecca, paśpiachovych i etałonnych damach. Zvonku vam usie zajzdrościać, ale na samaj spravie vy žyviacie ŭ piekle. Niachaj i ŭ rajskim Manterei.
«Trynaccać pryčyn čamu» (13 Reasons Why)
Drama. ZŠA, 1-y siezon
Rejtynh na IMDB: 8,6
Školnica-padletak Chana Bejkier vyrašaje skončyć žyćcio samahubstvam. Pierad tym, jak pajści na hetki adčajny krok, jana zapisvaje trynaccać aŭdyjokasiet z tłumačeńniem, što padšturchnuła jaje da suicydu. Heta nie samy prosty film dla prahladu, za im nie budzieš sačyć z pop-kornam i koka-kołaj. Tut patrabujecca peŭnaja kancentracyja.
Hałoŭny hieroj — Kłej Džensan — marudna prapuskaje praź siabie hetyja kasiety (adna ź ich pryśviečanaja jamu samomu), refleksujučy i asensoŭvajučy ŭsio pačutaje. Reakcyi Džensana samyja roznyja: to jon choča pomścić, to mirycca z usim, to vybuchaje, to ŭpadaje ŭ depresiju.
«Trynaccać pryčyn» — heta film-pieraściaroha. Jon pra ŭvažlivaść, spahadlivaść, pra toje, jakaja jašče krochkaja psichika ŭ padletkaŭ i jak peŭnyja rečy mohuć nanieści joj źniščalny ŭdar. Heta taksama intryhi, strachi, kompleksy, pieražyvańni.
Na moładź zaŭsiody pryjemna hladzieć, a tema samahubstvaŭ pryciahvaje da siabie mahnitam užo nie adno stahodździe. Takaja vybuchovaja sumieś i paspryjała papularnaści sieryjała.
«Dobraja baraćba» (The Good Fight)
Jurydyčnaja drama. ZŠA, 1-y siezon
Rejtynh na IMDB: 8,6
Dzijana Łokchart (vy hetuju aktrysu možacie pamiatać pa «Teoryi vialikaha vybuchu» ŭ roli mamy Leanarda) — paśpiachovy čykahski juryst. Jana maryć vyjści na piensiju, vieści cichaje i spakojnaje isnavańnie za zaroblenyja za žyćcio hrošy. Dzijana abviaščaje ab svaich płanach kampanii, na jakuju pracuje, u jaje honar pravodziać raźvitalnuju viačeru.
Ale niečakana ŭsie jaje hrošy prapadajuć, łopajecca finansavaja mylnaja burbałka, kudy jana ŭkładvała srodki pa paradzie siabra. Cikava, što akurat u hety čas na Dzijanu pracuje dačka działka, jaki prafukaŭ układańni socień ludziej.
Nazad na pracu Dzijanu brać nichto nie choča, chacia raniej joj abiacali załatyja hory. Tolki hałoŭny kankurent praciahvaje ruku dapamohi.
U «Dobraj baraćbie» vydatna vypisanyja žanočyja piersanažy. Mocnyja, valavyja, razumnyja, časam ranimyja, ale ŭsio adno niepieramožnyja.
«Miljardy» (Billions)
Drama. ZŠA, 2-i siezon
Rejtynh na IMDB: 8,4
U centry sieryjała supraćstajańnie fiederalnaha prakurora Ńju-Jorka Čaka Roadsa i maładoha miljardera Bobi Aksielroda. Čak Roads za svaju karjeru nie prajhraŭ nivodnaj spravy, u jaho idealny pasłužny śpis, jaki ŭ budučyni moža dazvolić jamu iści ŭ hubiernatary, ci, chto viedaje, navat u prezidenty.
Ale žurnalisty i kalehi paprakajuć Čaka, što jon vozicca z drobnaj zdabyčaj, zamiest taho, kab uziacca za spravu pa-surjoznamu. I tady Čak vyrašaje ŭziać u abarot Bobi «Aksa», uładalnika chiedž-fonda. Heta takija inviestycyjnyja fondy, jakija pracujuć na atrymańnie maksimalnych dachodaŭ u ryzykoŭnych momantach.
Situacyja ŭskładniajecca tym, što žonka Čaka Roadsa pracuje psichołaham u kampanii Bobi Aksielroda. A baćka Čaka, taksama toj jašče działok i varaciła, moža pastavić syna ŭ nie samyja pryjemnyja situacyi.
«Miljardy» — adzin z tych sieryjałaŭ sučasnaści, dzie niama stanoŭčych hierojaŭ, jakim chočacca supieražyvać, choć Čak i zdajecca zvyšpryncypovym. Bobi ž — uvieś pazityŭ, ale za hetym usio adno chavajucca ciomnyja machinacyi.
«Apošniaje karaleŭstva» (The Last Kingdom)
Histaryčnaja drama. Vialikabrytanija, 2-i siezon
Rejtynh na IMDB: 8,3
Kali niechta markocicca, što pakul nie vyjšaŭ novy siezon sieryjała «Vikinhi», kab daviedacca, što novaha budzie ŭ Ivara i Bjorna, rekamiendujem źviarnuć uvahu na padobny film, tolki ad inšych vytvorcaŭ. Niechta vykazvaŭ dumku, što brytancy ŭ «Vikinhach» — samyja niedarečnyja piersanažy, jakija tolki platuć intryhi, zdradžvajuć dy nie mohuć ničoha supraćstajać mahutnaj sile z poŭnačy.
Tut inšy pohlad na tuju samuju historyju. Utred Babienburhski vychavany vikinhami, jakija pierad hetym zabili jahonuju siamju. Utred nie źjaŭlajecca svaim ni dla brytaŭ, ni dla vikinhaŭ. Nichto nie daviaraje jamu napoŭnicu. Utred — toj jašče šelma i kruciel, ale ŭ jaho jość śmiełaść i adčaj.
Takija ludzi patrebnyja karalu Ueseksa Alfredu Vialikamu. Heta apošniaje karaleŭstva Brytanii, jakoje jašče zachoŭvaje peŭnuju niezaležnaść ad varvaraŭ z poŭnačy. I Utred pavinien dapamahčy ŭ hetym zmahańni.
Kaniečnie, hieroi «Apošniaha karaleŭstva» časam padajucca zanadta saładžavymi i hłamurnymi. Nie nadta vierycca, što ludzi ŭ IX stahodździ vyhladali mienavita tak. Ale dla peŭnaj retraśpiektyvy pahladzieć možna i hetuju stužku.
«U pustyni śmierci» (Into the Badlands)
Pryhody, bajavik, bajavyja majsterstvy. ZŠA, 2-i siezon
Rejtynh na IMDB: 8,1
Hetaja antyŭtopija źniataja pa matyvach kłasičnaha tvora kitajskaj litaratury «Padarožža na Zachad». Sani — samy niebiaśpiečny bajec u pustyni. Jaho bajacca ŭsie, a jaho śpinu ŭpryhožvajuć tatuiroŭki ŭ pamiać ab zabitych im vorahach. Sani pracuje na sastarełaha barona Kuina, jaki pacichu pačynaje varjacieć z pryčyny puchliny mozhu.
Sani nie maje na heta prava, ale jon sustrakaje kachańnie. A taksama chłopčyka ź nievierahodnymi zdolnaściami. Razam ź imi jon musić pierasiekčy «pustyniu śmierci», vyrvacca z hetaha začaravanaha koła, kab znajści praśviatleńnie.
Ci zdolny čałaviek vyrvacca za adviedzienyja jamu miežy?
***
Hladzi taksama:
Siem najlepšych sieryjałaŭ hetaha leta
Siem najlepšych sieryjałaŭ hetaj vosieni
Siem najlepšych sieryjałaŭ hetaj zimy
