Fota intex-press.by.
Prakuratura Bresckaj vobłaści adnaviła kryminalnuju spravu pa fakcie suicydu baranavickaha dzieviacikłaśnika. Pra heta havorycca ŭ liście ad 22 traŭnia, jaki atrymała maci zahinułaha padletka. Kryminalnuju spravu nakiravali dla dalejšaha papiaredniaha rasśledavańnia va ŭpraŭleńnie Śledčaha kamiteta pa Bresckaj vobłaści. Heta sprava ab daviadzieńni da samazabojstva.
Jak piša Intex-press, spravu adnavili, bo maci chłopca atrymała fotazdymki, jakija mohuć być dokazami ździekaŭ ź jaje syna. Žančyna raspaviała, što ŭ studzieni hetyja fota joj dasłała nieznajomaja dziaŭčyna — na zdymkach padletak pryviazany da dreva, a pobač staić niejki inšy chłopiec.
Dzieviacikłaśnik Uład, vučań baranavickaj škoły, skončyŭ žyćcio samahubstvam u siabie doma 22 śniežnia 2016 hoda. Padletak pierajechaŭ u rajcentr ź Minska i nie znajšoŭ parazumieńnia z adnahodkami. Jon prasiŭ pieravieści jaho ŭ inšuju škołu. Niezadoŭha da samazabojstva jaho vyklikali na saviet prafiłaktyki ŭ škołu z nahody bojki z adnakłaśnikam. Na Ułada cisnuli i pahražali kałonijaj.
U lutym kamisija adździełu adukacyi, sportu i turyzmu Bresckaha abłvykankama znajšła parušeńni ŭ pracy škoły pa arhanizacyi prafiłaktyki siarod niepaŭnaletnich. Da supracoŭnikaŭ, adkaznych za hetyja parušeńni, prymienienyja miery dyscyplinarnaj adkaznaści.
Maci zahinułaha padletka źviartałasia ŭ hienprakuraturu i ŭ Administracyju prezidenta z prośbaj dapamahčy ŭ rasśledavańni spravy. U sakaviku rasśledavańnie spynili «ŭ suviazi z adsutnaściu składu złačynstva». Tady žančyna abskardziła hetuju pastanovu.
