Mianie zavuć Volha. Žyvu ja ŭ Vialikabrytanii apošnija niekalki hadoŭ. U mianie troje dzietak. I, kaniečnie, maje baćki dasyłajuć im padarunki na dni naradžeńnia… Dy j prosta paru pakunkaŭ babrujskaha ziefiru šluć raz-poraz. Nadta jon smačny!
Nikoli z poštaj prablem nie było, ale nie hetym razam… 12 červienia atrymlivaju pasyłku ź Biełarusi ad maich baćkoŭ. Unutry, ja viedaju, — padarunki da 10-hodździa majho syna.
Uziała pakiet u ruki i ahledzieła jaho. Pieršaje, što papałasia na vočy — heta dzirka z adnaho boku. Uźnikła pytańnie: nu niaŭžo «Biełpošta» nie moža zrabić narmalnyja karobki dla pierasyłki pasyłak zamiest karyčnievaj papiery, jakaja parvałasia pa darozie?
Dalej pačałosia samaje cikavaje. Adčyniaju ja pasyłku, a ŭnutry kroški ad ziefiru. Dumaju: tak, niaŭžo karobka ad ziefiru nie vytrymała pieralotu?
Dastaju pakiet ź ziefiram i zaŭvažaju… Baciuchny-matuchny! Na pakiecie nadrez! Biaru kamieru ŭ ruki i pačynaju rabić fotazdymki. Niechta niečym vostrym prarezaŭ pasyłku, pakiet unutry pasyłki, dzie lažaŭ ziefir, parvaŭ samu karobku tak, što kavałka nie stavała, i nie viadoma, moža, čapaŭ svaimi «čystymi» palcami toje, što pryznačałasia być sałodkim padarunkam na dzień naradžeńnia.
Dzirku, dzie adbyŭsia «ŭzłom», staranna zakleili karyčnievym skotčam. Adrazu i nie zaŭvažyła. U mianie źjaviłasia padazreńnie, što, moža, heta Karaleŭskaja Pošta pačała praviarać takim čynam zamiežnyja pasyłki ŭ suviazi z apošnimi terarystyčnymi aktami ŭ krainie. Da mianie prosta nie dachodziła, našto patrebna kapacca ŭ adpraŭleńniach ź Biełarusi? Razumieju, kali naadvarot — z UK u Biełaruś, naprykład — bolš šancaŭ nažyvicca.
Dalej mnie stała cikava, dzie ž byŭ naš pakiet uvieś hety čas? Zajšła na sajt «Biełpošty» i ŭviała numar pasyłki ŭ adsočvańniach za paštovymi adpraŭleńniami.
Akazałasia, što našy biełaruskija padarunki amal što nidzie nie spynialisia, akramia jak u Miensku paśla prachodžańnia mytnaha kantrolu. Tam pasyłka lažała piać dzion. Łahičnym stała dumać (nu, mnie tak zdajecca), što, chutčej za ŭsio, uzłom byŭ zrobleny na praciahu voś tych piaci dzion.
Heta ž dzikunstva niejkaje! Kali ja vykłała fotazdymki na svajoj staroncy ŭ fejsbuku i pačytaŭšy kamientary siabroŭ, maje padazreńni nakont nieprafiesijnaści biełaruskaha boku pačali ŭzmacniacca. Akazvajecca, takoje zdarałasia i raniej. Ciapier zdaryłasia i sa mnoj.
Zastalisia pačućci soramu za svaju rodnuju krainu i niejkaj niepryjemnaj brydkaści.
Moža, kali vy apublikujecie maje fotazdymki i spytajeciesia, a što heta i jak heta ŭvohule pracuje ŭ nas? Moža, heta dapamoža źmianić niešta ŭ prachodžańni pasyłak? Nie raz našyja pasyłki z UK u Biełaruś prychodzili adkrytymi (niechta ich tam pieratrasaŭ), ale kab čapali pasyłku, jakaja idzie ź Biełarusi ŭ UK — heta było ŭpieršyniu.
Dziakuj vialiki za ŭvahu.
