Na dvare ciapleje, ludzi ciahnucca da vady, a epidemijołahi papiaredžvajuć: kupacca možna nie ŭsiudy. Ciapier u krainie kupacca zabaroniena ŭ vadajomach troch zon adpačynku. Usie jany ŭ Homielskaj vobłaści: heta haradski plaž Naroŭli, plaž «Kaskad-1» Centralnaha rajona Homiela, levabiarežža Prypiaci ad aŭtamabilnaha mosta da rečyšča raki Miarlavicy ŭ Mazyry. Adnak heta nie značyć, što astatnija miescy dla mahčymaha zapłyvu biaśpiečnyja, piša Tut.by.

Śpiecyjalisty nie chavajuć: pravieści manitorynh usich vadajomaŭ prosta niemahčyma. Tamu adpačyvalnikam rajać nie ryzykavać i akunacca tolki ŭ admysłova paznačanych miescach.

«Zatoki i niepratočnyja nievialikija kopanki lepš abychodzić. Tut možna padchapić roznyja infiekcyi, — kaža Dźmitryj Hałocik, zahadčyk prociepidemijałahičnaha adździaleńnia Respublikanskaha centra hihijeny, epidemijałohii i hramadskaha zdaroŭja. — Praz toje, što ŭ nas idzie pavyšeńnie tempieratury, čaściej za ŭsie ŭ hetych vadajomach možna zarazicca hiepatytam A. U dadzienaj infiekcyi doŭhaje vyžyvańnie ŭ vadzie, praź jaje jana čaściej za ŭsio pieradajecca».

Akramia taho, padčas kupańnia śpiecyjalisty rajać nie hłytać vadu. Kali niešta ŭsio-taki patrapiła ŭ rot i nos, sploŭvajcie.

«Pažadana prynosić z saboj butylavanuju abo kipiačonuju vadu, — praciahvaje Dźmitryj Hałocik. — Pryčym jana patrebnaja nie tolki dla pićcia. Vady pavinna chapić, kab pamyć ruki, papałaskać rot i ablić dzicia».

Taksama paśla kupańnia lepš abciercisia — vydalić sa skury vilhać.

«Heta i prafiłaktyka soniečnych apiokaŭ, i zachvorvańniaŭ, źviazanych z bakteryjalnymi ŭzbudžalnikami».

Клас
0
Панылы сорам
0
Ха-ха
0
Ого
0
Сумна
0
Абуральна
0