U Biełarusi da kanca hoda dvojčy praindeksujuć taryfy na žyllova-kamunalnyja pasłuhi. Heta adbudziecca z 1 vieraśnia i 1 śniežnia, paviedamiŭ namieśnik ministra antymanapolnaha rehulavańnia i handlu Ivan Viežnaviec. Pavyšeńnie abumoŭlena rostam dachodaŭ nasielnictva, pieradaje słovy pradstaŭnika MARH telekanał «STV».
- Spažyŭcy ad 1 vieraśnia biahučaha hoda zapłaciać na 8% bolš za kamunalnyja pasłuhi. Ale jašče raz źviarnu ŭvahu, što dadzienaja indeksacyja abo dadzieny rost abumoŭleny rostam dachodaŭ nasielnictva, jak heta i praduhledžana dziejučym zakanadaŭstvam i toj praktykaj, jakaja skłałasia ŭžo na praciahu niekalkich hadoŭ, - zajaviŭ Ivan Viežnaviec. - Ad 1 śniežnia my płanujem iznoŭ ža zychodziačy z rostu zarabotnaj płaty, jakaja budzie adbyvacca, my aceńvajem, što rost indeksacyi składzie kala 10%. Adpaviednym čynam padvysiacca i taryfy dla nasielnictva.
Pavodle jaho słoŭ, z ulikam dvuch indeksacyj i zapłanavanaha ad 1 studzienia 2018 hoda pavyšeńnia płaty za žyllova-kamunalnyja pasłuhi ŭ miežach 5 dalaraŭ biełarusy buduć apłačvać «kamunałku» na 100% za vyklučeńniem vydatkaŭ na ciepłavuju enierhiju.
Na niekatoryja pasłuhi rost budzie istotnym, cytuje słovy Ivana Viežnaŭca hazieta «Źviazda». Tak, taryf pa kanalizacyi vyraście na 48,5%, cana chałodnaha vodazabieśpiačeńnia vyraście na 27,7%, a vyvaz ćviordych kamunalnych adkidaŭ «paciažeje» na 19%. Pry hetym, adznačaje vydańnie, ahulnaja žyroŭka vyraście tolki na 5 dalaraŭ. Takim čynam, na kaniec 2017 hoda apłata ŽKP u dvuchpakajovaj kvatery płoščaj 48 kvadratnych mietraŭ z tryma žycharami ŭ aciaplalny pieryjad abyjdziecca ŭ 93 rubli, a ŭzrovień kampiensacyi nasielnictvam kompleksu kamunalnych pasłuh vyraście da 74,8%. Da kanca 2018 hoda hety pakaźnik dasiahnie 85%, da 2020 hoda - budzie 93,3%, a voś płanavanyja 100% dasiahnuć možna budzie tolki ŭ 2025-m hodzie, paviedamlaje «Źviazda».
Nahadajem: pra toje, što biełarusy ad 1 studzienia 2018 hoda vyjduć na 100%-ny ŭzrovień kampiensacyi zatrat pa ŭsich pasłuhach ŽKH, akramia ciepłavoj enierhii, zajaviŭ ministr žyllova-kamunalnaj haspadarki Alaksandr Cierachaŭ na pašyranym pasiadžeńni Prezidyuma Savieta Respubliki i Savieta pa ŭzajemadziejańni orhanaŭ miascovaha samakiravańnia pry vierchniaj pałacie parłamienta.
Ministr udakładniŭ, što z nastupnaha hoda biełarusy buduć apłačvać pa subsidavanych taryfach ciepłavuju enierhiju - aciapleńnie i haračaje vodazabieśpiačeńnie. Pa słovach Alaksandra Cierachava, heta samy značny artykuł vydatkaŭ dla spažyŭcoŭ pry apłacie pasłuh ŽKH.
Ministr adznačyŭ, što vytvorčaść ciepłavoj enierhii taksama zastajecca davoli zatratnaj. «Praca pa źnižeńni sabiekoštu ciepłavoj enierhii maje pryjarytetny charaktar», — skazaŭ jon.
Ministr ekanomiki Uładzimir Zinoŭski jašče ŭ pačatku minułaha hoda raspavioŭ ab płanach urada pa pierachodzie na poŭnaje pakryćcio nasielnictvam vytrat na akazańnie pasłuh ŽKH. 100-pracentnuju «kamunałku» biełarusam abiacali da kanca 2018 hoda, ale pra apłatu pasłuh pa pradastaŭleńni ciepłavoj enierhii tady ničoha nie havaryłasia.
U červieni Alaksandr Łukašenka na naradzie z kiraŭnictvam Administracyi prezidenta zajaviŭ, što ŭ Biełarusi treba «vyjści na nizkija taryfy, kab nasielnictva nie kryŭdzić».
Nahadajem, učora načalnik upraŭleńnia ekanomiki Ministerstva žyllova-kamunalnaj haspadarki Dźmitryj Kazanoŭski paviedamiŭ, što taryfy na ŽKP u Biełarusi nievysokija, nasielnictva zdolna ich apłačvać biez subsidyj.
U KDK raniej vyličyli, jak źnizić vydatki biełarusaŭ na «kamunałku». U viedamstvie padrychtavali prapanovy pa źnižeńni sabiekoštu žyllova-kamunalnych pasłuh u Biełarusi na 7,3%. Adno z prapanoŭ - źnizić vytraty na ciepłavuju enierhiju.
U struktury płaciažoŭ za žyllova-kamunalnyja pasłuhi ŭ zimovy pieryjad u siarednim 30,9% zajmaje płata za ciepłazabieśpiačeńnie. Z-za hetaha ŭ pieršuju čarhu prapanovy kamiteta nakiravany na pavyšeńnie efiektyŭnaści raboty enierhietyčnaj i vadapravodnaj haspadarki.
Tak, pa słovach načalnika hałoŭnaha ŭpraŭleńnia kantrolu za rabotaj halin u śfiery materyjalnaj vytvorčaści KDK Stanisłava Narkieviča, prapanujecca likvidavać nieefiektyŭnyja kacielni šlacham pieraklučeńnia nahruzak na inšyja ciepłakrynicy. Usiaho ŭ krainie naličvajecca bolš za 300 takich abjektaŭ, na asobnych ź ich sabiekošt ciepłaenierhii ŭ 3-6 razoŭ pieravyšaje siaredni pa sistemie ŽKH. Asnoŭnaja pryčyna zvyšnarmatyŭnych strat i pavieličeńnia vydatkaŭ na pasłuhi źjaŭlajecca niezdavalniajučy stan ciepłavych sietak. Niahledziačy na vysoki znos, zapłanavanyja abjomy zamieny nie vykonvajucca.
