Siońnia startavaŭ pieršy rozyhryš Kantynentalnaj chakiejnaj lihi. Hetaje ŭtvareńnie ŭźnikła na abšarach byłoha Savieckaha Sajuzu i maje na mecie skłaści kankurencyju najmacniejšaj u śviecie Nacyjanalnaj chakiejnaj lizie.

Zrazumieła, što za taki karotki termin zrabić heta vielmi składana, ale peŭnyja zruchi ŭžo jość. Naprykład, kantrakt z omskim «Avanhardam» padpisaŭ słavuty čech Jaramir Jahr.

Siarod 24 kamand, što voźmuć start u KCHŁ, tolki try pradstaŭlajuć nie Rasieju — mienskaje i ryskaje «Dynama», a taksama kazachstanski «Barys».

Prajekt udziełu biełaruskaha klubu ŭ KCHŁ łabiravaŭ asabista ministar unutranych spravaŭ i staršynia federacyi chakieju Ŭładzimier Navumaŭ.

Nie sakret, što svaje siły pasprabavać u Kantynentalnaj lizie chacieła i mienskaje «Junactva», ale razhlad zajaŭki kamandy pakinuli naleta.

Što da «Dynama», to metazhodnaść ichniaha ŭdziełu ŭ KCHŁ tłumačyłasia karyściu dla zbornaj, kali jaje viadučyja hulcy buduć sabranyja pad kryłom adnoj kamandy. U niejkaj stupieni zrabić heta atrymałasia, ale značnaja častka lideraŭ našaj zbornaj atabarylisia ŭ inšych kamandach KCHŁ — Kanstancin Kalcoŭ («Sałavat Jułajeŭ»), Dźmitry Mialeška i Alaksandar Baraŭkoŭ (abodva — «Sibir»), Viktar Kaściučonak («Amur), Alaksiej Kalužny (maskoŭskaje «Dynama»), Andrej Miezin (mahnitahorski «Metalurh»), Alaksiej Uharaŭ i Aleh Antonienka (abodva — MUS). Dakamplektavali skład mienčuki hulcami z Rasiei, ZŠA i Kanady, niekatoryja ź ich mieli dośvied hulni ŭ NCHŁ.

Najbolš ža sensacyjnyja naviny ź lahieru mienskaha «Dynama» prychodzili adnosna trenerskaj pazycyi. Spačatku jaje zaniaŭ amerykaniec Poł Hardner, ale ŭ samy razhar padrychtoŭki da sezonu jon byŭ źniaty z pasady. Pavodle čutak jon paciarpieŭ za svaju luboŭ da alkaholnych napojaŭ.

Zamiest Hardnera z‑za akijanu byŭ vyklikany Džym Chjuz, małady i małaviadomy trener. Heta vyzvała rezkuju krytyku ŭ chakiejnym asiarodku. Bolšaść specyjalistaŭ zhadžałasia ŭ mierkavańni, što takich nastaŭnikaŭ chapaje i ŭnutry Biełarusi.

U vyniku losavańnia my patrapili ŭ dyvizijon imia Ŭsievałada Babrova
razam ź letašnim čempijonam Rasiei ufimskim «Sałavatam Jułajevym», padmaskoŭnym «Atlantam», čarapavieckaj «Sievierstallu», novakuźnieckim «Metalurham», maskoŭskim «Spartakom». Z hetymi kamandami biełarusy sustrenucca pa dva razy doma i ŭ haściach, ź inšymi ŭdzielnikami KCHŁ — adna hulnia doma i ŭ haściach. U płej‑of kamandy buduć zmahacca za Kubak Jurja Haharyna.
Mienskaje «Dynama» startavała u rozyhryšu KCHŁ u Novakuźniecku, matčam ź miascovym «Metalurham». Kamandy tolki ŭ overtajmie vyznačyli pieramožcu — 5:4 (3:3, 1:0, 0:1, 1:0) na karyść našych ziemlakoŭ. Samym vynikovym u «Dynama» staŭ Jarasłaŭ Čuprys, jaki zakinuŭ šajbu i addaŭ dźvie halavyja pieradačy.

Hety tydzień «Dynama» praciahnie hastroli za Ŭrałam. Zaplanavanaja paŭtarnaja hulnia z «Metalurham», a taksama z kamandami «Sibir» dy «Amur».

Tolki 12 vieraśnia pieršy matč u Miensku, z padmaskoŭnym «Atlantam».
Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?