Staršynia CVK Biełarusi Lidzija Jarmošyna nie vyklučaje praviadzieńnia adnoj z vybarčych kampanij 2020 hoda ŭ bolš rannija terminy. Pra heta jana raspaviała ŭ intervju karespandentu BIEŁTA.
fota Siarhieja Hudzilina
Kiraŭnik Centrvybarkama, u pryvatnaści, paćvierdziła, što zhodna z kalendarom vybaraŭ i refierendumaŭ u 2020 hodzie ŭ Biełarusi pa terminach amal całkam supadajuć prezidenckija i parłamienckija vybary. Tolki vybary prezidenta pavinny adbycca nie paźniej za 30 žniŭnia, a vybary ŭ Pałatu pradstaŭnikoŭ — nie paźniej za 10 vieraśnia. Jarmošyna nie ličyć, što dźvie hetyja kampanii mohuć sumiaścić.
«Ja nie dumaju, što hetyja vybary sumiaściać. Chutčej za ŭsio, kali pryjdzie čas, budzie pryniata adpaviednaje palityčnaje rašeńnie i niejkuju vybarčuju kampaniju pieraniasuć na bolš rańni termin. A ŭžo jakuju-pra heta pavinny damovicca kiraŭnik dziaržavy i parłamient. Pravodzić vybary raniej možna, paźniej — nielha. Tamu tak, tam sapraŭdy ŭsio praktyčna całkam supadaje. Prezidenckaja kampanija źviazana terminami praviadzieńnia apošniaj inaŭhuracyi, parłamienckaja - terminami praviadzieńnia pieršaj ustanovačnaj siesii», - rastłumačyła Jarmošyna.
Jana nie vyklučaje, što prezidenckaja i parłamienckaja kampanii mohuć być praviedzieny ŭ adzin i toj ža hod, adnak, pa słovach staršyni CVK, całkam vierahodna i bolš raniej praviadzieńnie adnoj ź ich.
«Ja dumaju, heta było b vielmi ciažka - pravieści dźvie kampanii zapar, piermanientna. Atrymlivajecca dla krainy šeść ciažkich miesiacaŭ. Napeŭna, było b bolš razumna rabić vybary (pravieści adnu z kampanij), naprykład, vosieńniu 2019 hoda», - adznačyła Jarmošyna.
«Mahu skazać, što ŭ našym vypadku ŭsio budzie zaležać ad vielmi mnohich faktaraŭ — i ad mižnarodnaj abstanoŭki, i ad ekanamičnaha stanovišča. Plus budzie padrychtavana surjoznaja palityčnaja analityka, praviaduć daśledavańni. Pakul što zanadta rana pra heta kazać», — dadała kiraŭnik Centrvybarkama.
