Da 15 sutak administracyjnaha aryštu pahražaje siabru arhkamitetu Biełaruskaj sacyjał-demakratyčnaj partyi «Narodnaja hramada» z Mahilova Stanisłavu Paŭlinkoviču za ŭdzieł 8 vieraśnia ŭ akcyi papiaredžańnia na Kastryčnickaj płoščy Miensku, paviedamlaje Radyjo Svaboda.
Aktyvista vinavaciać u parušeńni paradku praviadzieńnia masavych mierapryjemstvaŭ. Siońnia Leninski rajonny sud Mahilova maje adnavić razhlad administracyjnaj spravy, raspačataj Leninskim rajadździełam milicyi horadu. Praces viadzie sudździa Aksana Ratnikava.
«Mianie sprabujuć vycisnuć z krainy»
Pavodle aktyvista, nahodaj dla administracyjnaha pieraśledu staŭsia videazapis z sajtu Radyjo Svaboda, na jakim jon daje interviju karespandentcy, što viała žyvy efir z akcyi pratestu. U Miensku Paŭlinkovič paźbieh zatrymańnia. Jaho vyvieźli na mašynie inšyja ŭdzielniki akcyi. Zatrymali ž jaho ŭ Mahilovie ranicaj 10 vieraśnia na pracy. Da sudu ŭtrymlivali ŭ izalatary. Aktyvist kaža, što jaho nie karmili i nia vydali paścielnaj bializny.
11 vieraśnia na sudzie Paŭlinkovič zapatrabavaŭ advakata, i sudździa Ratnikava dała jamu dvoje sutak, kab jon zaklučyŭ damovu z abaroncam.
«Mianie zatrymlivali ciškom, kab ja nie paśpieŭ paviedamić pra toje, što sa mnoju adbyvajecca. Nie chacieli ahałoski, — raskazvaje Stanisłaŭ. — Ja paśpieŭ pahladzieć u internecie, ci jašče kaho pieraśledujuć za akcyju. Pakul ja adziny. Vidać, milicyjantam dali admysłovuju ŭstanoŭku mianie schapić. Interviju ž nia tolki ja davaŭ, ale zatrymali tolki mianie i pakazali mianie na zapisie. Vy ž viedajecie, što suprać mianie raspačataja kryminalnaja sprava i nia ŭziataja padpiska pra niavyjezd, z čaho ja rablu vysnovu, što mianie prosta sprabujuć vycisnuć z krainy».
Pajechaŭ pratestavać, bo Biełaruś u niebiaśpiecy
Aktyvist kaža, što nie pajechać na akcyju pratestu jon nia moh. Nastojvaje, što znachodžańnie rasiejskich vojskaŭ na terytoryi Biełarusi pahražaje jaje suverenitetu, i jon chacieŭ svaim udziełam pra heta zajavić. Na akcyi pratestu ŭ Paŭlinkoviča na plačach byŭ ukrainski ściah.
«Da nas pryjechali ahresary, jakija siabie pakazali va Ŭkrainie, — tłumačyć svaju pazycyju Paŭlinkovič. — My ž nazirali za tym, što adbyvałasia ŭ Krymie, jak jaho akupavali. Jość pahroza, što taki ž scenar mohuć paŭtaryć i ŭ Biełarusi».
Aktyvist dapuskaje, što sud moža pakarać jaho administracyjnym aryštam, ale aryštoŭvać paśla ahučvańnia vyraku nia buduć.
«Adterminujuć vykanańnie prysudu, kab u razhar mahčymych vosieńskich pratestaŭ pasadzić i nia dać mnie vyjechać u Miensk. Jany ž viedajuć, što tudy ja budu jeździć», — adznačaje Stanisłaŭ Paŭlinkovič.
Zapałochvali napiaredadni akcyi pratestu
U žniŭni aktyvist pravioŭ troje sutak u izalatary dla časova zatrymanych jak padazravany ŭ spravie raspaŭsiudu ŭ internecie videarolika parnahrafičnaha źmiestu. Paŭlinkovič abvinavačańnie nie pryznaje i źviazvaje kryminalny pieraśled z svajoj apazycyjnaj dziejnaściu. Pa vyzvaleńni kazaŭ, jaho zatrymali na 72 hadziny, kab zapałochać napiaredadni pratestu suprać rasiejska-biełaruskich vučeńniaŭ «Zachad-2017».
Pavodle Paŭlinkoviča, jon zastajecca pad uvahaj siłavych strukturaŭ, pakolki rehularna raźmiaščaje na svaich staronkach zakliki da ŭdziełu ŭ akcyjach pratestu, a taksama sam jeździć na ich.
