30 vieraśnia adbudziecca źjezd Partyi BNF. Pavodle statuta arhanizacyi, ciapierašni staršynia Alaksiej Janukievič nie maje prava bolš vyłučacca na pasadu kiraŭnika. Nie budzieš ty, to budzie try, havoryć biełaruskaja prykazka. A tut navat nie troje, a adrazu piaciora kandydataŭ. «Naša Niva» raskazvaje, chto ž moža ŭznačalić najstarejšuju partyju krainy (pretendenty ŭkazanyja ŭ ałfavitnym paradku)

Illa Dabratvor

36 hadoŭ, Minsk

Pra Illu Dabratvora kraina ŭpieršyniu pačuła ŭ 2010 hodzie. Na toj momant 29-hadovy Dabratvor padaŭ dakumienty na rehistracyju svajoj inicyjatyŭnaj hrupy na pasadu prezidenta krainy. Mała taho, što chłopiec na toj momant navat nie dasiahnuŭ abaviazkovaha dla prezidenctva ŭzrostu (35 hadoŭ), dyk jahonaja inicyjatyŭnaja hrupa składałasia z adnaho čałavieka — samoha patencyjnaha kandydata. Jasna, što CVK nie zarehistravała takoha aryhinała.

Pa adukacyi Illa Dabratvor — psichołah. Pracavaŭ sacyjalnym piedahoham u škole. Paśla taho, jak pačaŭ palityčnuju aktyŭnaść, źjavilisia prablemy z pracaŭładkavańniem. Mienavita tamu Dabratvor i vyrašyŭ padacca ŭ kandydaty, kab pryciahnuć uvahu da svajoj prablemy. Kim tolki Dabratvor nie pracavaŭ: i dvornikam, i šaŭrmu na Kamaroŭcy rabiŭ.

Illa Dabratvor — šmatdzietny baćka, maje piaciarych dziaciej.

Na minułych parłamienckich vybarach Illa Dabratvor bałatavaŭsia pa Sienickaj akruzie ŭ Minskim rajonie. Razam ź im pa akruzie išli lidary kišennych partyj Mikałaj Ułachovič i Vasil Zadniaprany.

U biuleteniach zastalisia tolki Ułachovič i Dabratvor, jakomu napisali najvyšejšy pracent siarod apazicyjanieraŭ, što nie prajšli ŭ parłamient — 19%.

Ahitacyju Dabratvor vioŭ u asnoŭnym pa-rusku, chacia i zaklikaje da miakkaj biełarusizacyi. Ruskamoŭny lidar BNF budzie aryhinalnym vybaram. Dabratvor nie baicca iści ŭ adkrytuju dyskusiju z łukašenkaŭcami i čarnasociencami.

Volha Damaskina

43 hady, Navapołack

U škole Damaskina była vyzvalenaja ad navučańnia biełaruskaj movy, bo ź siamji vajskoŭcaŭ. A plus da ŭsiaho tata z Małdovy, mama — ukrainka. Adnak jašče ŭ škole jana zachapiłasia biełaruskaj movaj i historyjaj. Losavyznačalnymi byli sustrečy z połackimi aktyvistami BNF Vasilom Chramcovym i Sieržukom Sokałavym-Vojušam.

Udzieł u parłamienckaj vybarčaj kampanii — 2016 dla Volhi Damaskinaj kaštavaŭ pracy. Apošnija čatyry hady jana pracavała zahadčycaj u filijale Nacyjanalnaha Połackaha historyka-kulturnaha muzieju-zapaviedniku — Muziei tradycyjnaha ručnoha tkactva Paazierja. Kali stała viadoma, što Damaskina choča iści ŭ parłamient, dyrektarka muzieju Tamara Džumantajeva paviedamiła, što kantrakt z supracoŭnicaj padaŭžacca nie budzie. Kampanija Volhi Damaskinaj u Połacku prachodziła vielmi aktyŭna. Ciapier Damaskina pracuje administrataram u sałonie pryhažości.

Ryhor Kastusioŭ

60 hadoŭ, Mahiloŭ

Ryhor Kastusioŭ byŭ kandydatam ad Partyi BNF na vybarach 2010 hoda. Vialikaj padtrymki zdabyć tady jamu nie atrymałasia, ale Kastusioŭ ahučvaŭ pa telebačańni i radyjo asnoŭnyja punkty prahramy BNF. Usim zapomniłasia, jak Kastusioŭ prynios u efir bieł-čyrvona-bieły ściažok. Kastusioŭ byŭ nie nadta mocnym kandydatam, tamu jaho nie bajalisia chvalić Łukašenka (za adsutnaść zdrady ideałam) i «Sovietskaja Biełoruśsija» (za daśviedčanaść).

U SIZA KDB paśla vybaraŭ Kastusioŭ pravioŭ usiaho adnu noč. Paśla taho, jak jon vystupiŭ pa telebačańni (u adroźnieńnie ad Ramančuka, jon nie abvinavačvaŭ ni ŭ čym inšych kandydataŭ, a kazaŭ pra rasijski śled), jaho adpuścili. Na voli Kastusioŭ padaŭ simvaličny pratest ab falsifikacyjach padčas vybaraŭ.

U minułym Kastusioŭ pracavaŭ u kałhasach, a taksama śfiery ŽKH Mahiloŭščyny. Kali praz palityku jaho zvalniali z pracy, pačaŭ jeździć na zarobki ŭ Rasiju. Byŭ u kamandzie Alaksandra Milinkieviča na vybarach-2006.

Kastusioŭ — vielmi prosty i dabradušny čałaviek, za što jaho šmat chto pavažaje. Jon samy realny kandydat na pasadu staršyni partyi, ale vialikuju palityčnuju karjeru zrabić užo nie atrymajecca.

Ihar Lalkoŭ

46 hadoŭ, Minsk

Lalkoŭ — heta jašče adzin ź siońniašnich namieśnikaŭ Alaksieja Janukieviča. U Lalkova dobraja adukacyja: jon skončyŭ histfak BDU, paśla čaho vučyŭsia ŭ Sarbonskim univiersitecie (Francyja) i Centry ŭschodniejeŭrapiejskich daśledavańniaŭ Varšaŭskaha ŭniviersitetu (Polšča). Pracavaŭ u Dziaržaŭnym kamitecie pa archivach i spravavodstvie.

Jahonyja artykuły pa historyi i sučasnaści Biełarusi drukavalisia šmat dzie ŭ śviecie. Dla čytačoŭ «Našaj Nivy» Ihar Lalkoŭ najpierš viadomy svaimi rasśledavańniami ab dziejnaści prarasijskich arhanizacyj u Biełarusi. Hetyja publikacyi šyroka abmiarkoŭvalisia jak unutry hramadstva, hetak i ŭ samoj Rasii.

Padčas minułych prezidenckich vybaraŭ Lalkoŭ byŭ z tych pradstaŭnikoŭ Partyi BNF, chto rašuča padtrymaŭ Taćcianu Karatkievič. I praciahvaŭ heta rabić navat paśla taho, jak sama partyja adyšła ad hetaj padtrymki.

Aleś Taŭstyka

44 hady, Minsk

Kałarytny pradprymalnik z rynku Ždanovičy. Sam jon rodam z Kryvičoŭ Miadzielskaha rajona. U biznes Taŭstyka pajšoŭ adrazu paśla vojska, a słužyŭ jon na fłocie ŭ Talinie. Skončyŭ sielskahaspadarčuju akademiju ŭ Horkach.

U 2008 hodzie Taŭstyka staŭ adnym ź lidaraŭ pradprymalnickich pratestaŭ, kali drobnyja handlary dabivalisia prava najmać na pracu najomnych rabotnikaŭ. Taŭstyka nieadnarazova adbyvaŭ administracyjnyja aryšty na Akreścina.

Letaś Taŭstyka ŭžo chacieŭ uznačalić Ruch «Za Svabodu», ale za jaho prahałasavała ŭsiaho tolki dvoje delehataŭ vybarčaj kanfierencyi. Kali staršynioj abrali Hubareviča, to Taŭstyka zładziŭ lohki skandał. Dy i ŭvohule za Taŭstykam zamacavałasia rename skandalista. Jon redka abiraje dypłamatyčnyja vyrazy, a reža ŭsio, što ŭ jaho na dumcy.

Apošnim časam Taŭstyka trapiŭ pad upłyŭ fiłosafa Uładzimira Padhoła. Padčas apošniaj parłamienckaj kampanii jany razam ładzili pierformansy, a taksama mieli padobnyja vystupy. Zdymalisia z vybaraŭ jany taksama razam: na koniach, trymajučy ŭ rukach bieł-čyrvona-bieły, ściah Jeŭrasajuza, ZŠA i Vialikabrytanii.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?