Źjezd BNF hetym razam prytuliŭ u siabie Pałac mastactvaŭ. Efiekt małoj zały syhraŭ svaju rolu. Było ŭražańnie, što ludziej šmat. Bolšaść — heta mužčyny za piaćdziesiat. Dvaccacihadovaja moładź družna pasieła ŭ apošnich šerahach.
Na pieršy šerah zatoje sieŭ Illa Dabratvor — samy małady kandydat na pasadu staršyni Partyi. Dabratvor adzieŭ vyšyvanku, a nie halštuk. Za im siadzieŭ Aleś Taŭstyka — viadomy pradprymalnik i amatar pašumieć, razam ź im dysident Viačasłaŭ Siŭčyk.
Illa Dabratvor.
Volha Damaskina sieła bližej da siaredziny zały, u siniaj sukiency, na abcasach. Adzin z delehataŭ źjezdu raskazvaŭ, što choča hałasavać mienavita za Damaskinu. Maŭlaŭ, jaje try miesiacy ŭhavorvali ŭznačalić BNF, a ŭ apošni momant kiraŭnictva vyrašyła vyłučyć usio ž Kastusiova. Uvohule pra Damaskinu možna było pačuć tolki stanoŭčyja vodhuki.
Volha Damaskina.
Ryhor Kastusioŭ i Ihar Lalkoŭ, jak namieśniki staršyni, zaniali miesca ŭ prezidyumie. Kułuarna šaptalisia, što Lalkoŭ rychtuje skandał. Maŭlaŭ, jahonaja krytyka Frontu budzie źniščalnaj.
Samyja haračyja sprečki ŭ pačatku razharnulisia vakoł pytańnia: hałasavać pa namieśnikach adzinym śpisam, ci za kožnaha asobna. Afaryzmam razradziŭsia Ryhor Kastusioŭ: «Ja za demakratyju ŭ pryniaćci rašeńniaŭ, ale za aŭtarytaryzm — u vykanańni».
Ryhor Kastusioŭ.
Kastusioŭ, jak i Janukievič, byli za «adziny śpis». Dabratvor chacieŭ, kab pa kožnym hałasavali asobna. Jaho padtrymlivaŭ juryst z ZŠA Juraś Ziańkovič (jakasny kaścium, hadzińnik, halštuk). «Nazyvajcie mianie Juraś, a nie Juryj», — paprasiŭ jon Janukieviča.
U vyniku pieramahła prapanova «adzinaha śpisu». «Kali budzie inakš, to namieśniki buduć dumać nie pra pośpiechi partyi, a pra toje, jak pieramahčy na nastupnym źjeździe, a heta budzie katastrofa!» — skazaŭ Janukievič.
Ryhor Kastusioŭ i Alaksiej Janukievič.
Alaksiej Janukievič nie maje prava bolš bałatavacca ŭ staršyni zhodna sa statutam. «Vy ŭsie — hieroi», — skazaŭ Janukievič, kali źviartaŭsia da zały. Pramova byłoha staršyni była dastatkova ščyraj i rezkaj. Jon pryznaŭ svaju pamyłku ŭ tym, što Partyja BNF padtrymała Taćcianu Karatkievič na vybarach-2015. «Apartunisty biez kaštoŭnaściaŭ», — akreśliŭ jon «Havary praŭdu», u vyniku čaho sarvaŭ apładysmienty. Raskazaŭ pra cisk «bruselskich biurakrataŭ», kab partyja dałučyłasia da pravaj kaalicyi z AHP, BCHD i Rucham «Za Svabodu». «Heta honar być staršynioj Partyi BNF», — skončyŭ svoj vystup Janukievič.
Kanceptualnaj vyjšła sprečka pamiž Viačasłavam Siŭčykam i namieśnikam staršyni Partyi BNF Alesiem Stralcovym-Karvackim. «Čamu va ŭlotcy Stralcova zaklikajecca nie zapisvacca pry pierapisie biełarusami?» — kryčaŭ Siŭčyk. «Ja liču svajoj radzimaj Litvu, tamu zaklikaju zapisvacca lićvinami», — kazaŭ Stralcoŭ. Siŭčyk nastojvaŭ na tym, što lićvinski ruch pavinien być zabaronieny. «Nie čas hulacca ŭ histaryčnyja rekanstrukcyi. Chłuśnia, što biełarusami nas nazvali vorahi», — adkazvaŭ Siŭčyk.
Viačasłaŭ Siŭčyk.
Delehat źjezda ź Śvietłahorska Vadzim Bołbas byŭ vielmi realistyčnym u svaich acenkach. «Nie treba kazać, što naš narod hałodny, abiazdoleny. Chutka vyjdzie na pratesty. Narod nakormleny. Čakać na pratesty nie vypadaje», — kazaŭ Bołbas. Jon pastaviŭ zadaču pierad novym kiraŭnictvam abjadnacca z KCHP-BNF.
U vyniku na pasadu staršyni było vyłučana šeść kandydataŭ. Čatyry čakanych (Kastusioŭ, Damaskina, Dabratvor i Taŭstyka) i dvoje niečakanych — biznesoviec Vasil Astroŭski i marski aficer z Mahilova Alaksandr Strach. Varta adznačyć, što kamandy mieli tolki troje — Kastusioŭ, Damaskina i Dabratvor. Astatnija bałatavalisia chutčej dla epatažu i pijaru svajoj asoby.
A voś Ihar Lalkoŭ uziaŭ samaadvod. Nijakaha skandału jon tak i nie ŭčyniŭ. Kastusioŭ prapanavaŭ u svaje namieśniki Alaksieja Janukieviča, Alesia Stralcova, doktara Źmitra Sałoškina, haradzienskaha aktyvista Vadzima Sarančukova i lidara «Moładzi BNF» Jurasia Łukaševiča.
Ihar Lalkoŭ.
Volha Damaskina nazvała siarod svaich namieśnikaŭ Ihara Lalkova, Vadzima Sarančukova, salihorca Paŭła Batujeva i Źmitra Kaśpiaroviča. Dabratvor — Vadzima Sarančukova (jon byŭ adrazu ŭ traich kandydataŭ), słuckaha aktyvista Vitala Amialkoviča i Kaciarynu Šust.
Volha Damaskina adkryta kazała, što kiraŭnictva BNF prapanoŭvała joj vyłučacca, adnak u apošni momant pieradumali i pastavili na inšaha kandadata. «Mnie było niečakana i niepryjemna vyłučeńnie Ryhora Kastusiova», — skazała Damaskina. Uvohule vystup Damaskinaj byŭ vielmi vyvierany, dakładny i ŭpeŭnieny. A voś u adkazach na pytańni z zały Damaskina krychu papłyła. Jana čałaviek małaviadomy, tamu pytańniaŭ było šmat, u Kastusiova nie pytaŭsia nichto ničoha.
«Čamu vy zhubili padtrymku kiraŭnictva partyi?» — spytaŭ u Damaskinaj Juraś Ziańkovič. «Mahčyma, tamu, što Alaksiej Janukievič nie moh vyznačycca, kim ja budu: «staršynioj» ci «staršyńkaj», — adreahavała Damaskina.
Dabratvor kazaŭ, što BNF prapanuje šmat niepapularnych mieraŭ. Naprykład, ustupleńnie ŭ NATA.
Z krytykaj na ciapierašniaje kiraŭnictva abrynuŭsia Vasil Astroŭski. Cikava, što jon zaklikaŭ padtrymlivać Volhu Damaskinu. «Pry joj zakuliśsia i intryh budzie mieniej», — skazaŭ Astroŭski. Jon zaklikaŭ viarnuć u partyju Vincuka Viačorku, Lavona Barščeŭskaha, Alesia Michaleviča.
Aleś Taŭstyka.
Aleś Taŭstyka zładziŭ pierformans, raskidaŭšy na padłozie arkušy papiery. «Heta majo zmahańnie za abaronu pravoŭ ludziej». Taksama Taŭstyka źmiaściŭ kala siabie tradycyjnyja bieł-čyrvona-bieły ściah, ściahi Jeŭrasajuza i ZŠA.
Na hetym pačałosia hałasavańnie.
***
Źmicier Dryhajła ahučyŭ aficyjnyja ličby hałasavańnia. Usiaho prahałasavała 163, adzin biuleteń byŭ pryznany niesapraŭdnym.
Kastusioŭ — 107 hałasoŭ
Damaskina — 32
Dabratvor — 12
Astroŭski — 7
Strach — 2
Taŭstyka — 2
Takim čynam, Ryhor Kastusioŭ abrany staršynioj Partyi BNF.
Namieśnikami Kastusiova stanuć: Alaksiej Janukievič, Aleś Stralcoŭ, Źmicier Sałoškin, Vadzim Sarančukoŭ, Juraś Łukaševič.
