Prykładna z pačatku vieraśnia na druhasnym rynku staličnaha žylla nazirajecca tendencyja stabilizacyi cenaŭ na kvatery, a pa asobnych siehmientach žyllovaj nieruchomasci — ich nievialikaje padaražeńnie. Jak viadoma, na praciahu apošnich vaśmi miesiacaŭ kvatery ŭ Minsku tolki tańnieli, a tut… Ab jakoj situacyi ŭ śfiery kvaternaj nieruchomasci ŭ stalicy idzie havorka? Svaimi mierkavańniami na hety kont padzialiŭsia staršynia Savieta Biełaruskaj asacyjacyi «Nieruchomaść» Mikałaj Prastałupaŭ.

Istotnaha padaražeńnia žylla nie budzie

Mienavita na try vosieńskija miesiacy Saŭminam krainy byŭ uviedzieny pavyšalny kaeficyjent 1,44 da taryfnych stavak padradnych budaŭničych arhanizacyj, zaniatych na abjektach žyllovaha budaŭnictva.

Śpiecyjalisty Minbudarchitektury paviedamili redakcyi, što novy miechanizm apłaty pracy budaŭnikam moža vyklikać padaražeńnie budaŭnictva žylla ŭ Biełarusi prykładna na 10—12 pracentaŭ. Razam z tym asobnyja niezaležnyja ekśpierty ŭpeŭnieny, što ŭ suviazi z novymi taryfami na hruzapieravozki i pavieličeńniem cenaŭ na budmateryjały, padaražeńnie sabiekoštu budaŭnictva žylla moža dasiahnuć 15—18 pracentaŭ. Niaŭžo ŭdzielniki druhasnaha rynku staličnaj žyllovaj nieruchomasci imhnienna adreahavali na hetuju navinu?

Na dumku Mikałaja Prastałupava, pamier zarobkaŭ radavych budaŭnikoŭ uvohule nijak nie adhukniecca na cenavych tendencyjach na druhasnym rynku kvater u Minsku. Pavodle słoŭ surazmoŭcy, sabiekošt kvadratnaha mietra žylla ŭ MAPIDa siońnia składaje kala 600 dołaraŭ, u kamiercyjnych zabudoŭščykaŭ — 1000—1200 dołaraŭ. Mahčyma, novaŭviadzieńnie pa zarobkach pavialičyć sacyjalny sabiekošt žyllovaha «kvadrata» da 700 dołaraŭ, a kamiercyjnaha mietra — da 1400 dołaraŭ. Novaja pracentoŭka pa sabiekošcie «maładych» kvater na druhasny rynak u bližejšy čas uvohule nie paŭpłyvaje, ličyć Mikałaj Prastałupaŭ. Sprava ŭ tym, što kamiercyjnyja arhanizacyi ŭžo na praciahu 4—6 miesiacaŭ biespaśpiachova sprabujuć pradać kvatery ŭ novych damach pa košcie 1800—2000 dołaraŭ za kvadratny mietr. Siońnia ŭ novych mikrarajonach Minska staić užo 5 takich paŭpustych damoŭ, na kvatery jakich popyt uvohule amal adsutničaje. Spadar Prastałupaŭ upeŭnieny, što ŭ radavych žycharoŭ Minska prosta niama siońnia takich vialikich hrošaj i adpaviednych zarobkaŭ dla nabyćcia standartnaha, ale davoli darahoha novaha žylla.

Nievialikaje padaražeńnie vyklikana siezonnaj aktyvizacyjaj pakupnikoŭ

Zhodna z tablicaj statystyki infarmacyjnaha katałoha respublikanskaha vydańnia «Nieruchomaść Biełarusi», siaredni košt kvadratnaha mietra ahulnaj płoščy adnapakajovych kvater Minska składaje ciapier 1976 dołaraŭ. Atrymlivajecca, što siaredni košt «adnapakajovak» za apošnija dva tydni padaražeŭ prykładna na 15 dołaraŭ. Tut treba adznačyć, što ŭ statystycy ŭličvajucca i davoli darahija kvatery ŭ elitnych damach, a taksama ŭ centry stalicy, dzie žyllo amal uvohule nie tańnieła za ŭvieś minuły hod. Mikałaj Prastałupaŭ upeŭnieny, što kvadratny mietr žylla ŭ standartnych damach spalnych rajonaŭ kaštuje siońnia ŭ miežach 1820—1870 dołaraŭ. Mienavita hety realny cennik na žyllovy «kvadrat» u Minsku pačynaje krychu pavialičvacca. Čamu?

Pavodle infarmacyi ekśpiertaŭ žyllovaj nieruchomasci, na druhasnym rynku stalicy pa siehmiencie prapanovy prysutničaje kala 8,5 tysiačy kvater. Za miesiac u Minsku pradajecca prykładna 500 kvater, ale amal takaja ž kolkaść žyłych pamiaškańniaŭ znoŭ traplaje na rynak. Kolkaść realnych ździełak pa nabycci žylla zastajecca amal niaźmiennaj. Ciapier nazirajecca aktyvizacyja patencyjalnych pakupnikoŭ pa prahladzie kvater. Vosieńniu kvaterami stali bolš cikavicca mienavita tyja klijenty, jakim žyllo sapraŭdy patrebna. Adna sprava, kali niejkaj kvateraj za leta nie cikaviŭsia ŭvohule nichto, a tut za dva tydni pamiaškańnie prahledzieli ažno dva ci try klijenty. Viadoma, što tady pradaŭcy pačynajuć karekciravać pieršapačatkovy košt u bok pavieličeńnia.

Ciapier prykmietaj času stała toje, što za apošnija 3—4 miesiacy z bazy danych prapanoŭ niebahatymi pakupnikami byli «vymytyja» maleńkija pa płoščy tannyja adna‑ i dvuchpakajovyja kvatery. Tak, kali jašče ŭ lipieni mahčyma było adšukać słabieńkuju kvateru za 53—54 tysiačy dołaraŭ, to ciapier minimalny cennik na takich kvaterach pačynajecca z 57—59 tysiač dołaraŭ.

Z druhoha boku, małapakajovyja kvatery ź vialikaj ahulnaj płoščaj u novych dalokich mikrarajonach, dzie adsutničaje patrebnaja infrastruktura, uvohule zastajucca «visieć» navat pry košcie kala 1700—1750 dołaraŭ za kvadratny mietr.

Da siaredziny śniežnia kvatery buduć daražeć

Mikałaj Prastałupaŭ ličyć, što kvatery ŭ Minsku buduć niaznačna daražeć na praciahu bližejšych troch z pałovaj miesiacaŭ. Pavieličeńnie cenaŭ budzie nievialikim, prykładna ŭ pamiery isnujučaj u krainie inflacyi. Śpiecyjalist upeŭnieny, što kvatery da novaha hoda padaražejuć nie bolš čym na 7—10 pracentaŭ. Naš surazmoŭca različvaje, što prykładna z hetaha času ŭ krainie pavinien aktyŭna zapracavać miechanizm dolevaha budaŭnictva. Ekśpierty padličyli, što dadzieny ałharytm uźviadzieńnia žylla budzie kaštavać dla masavaha zabudoŭščyka ŭ miežach 1500—1600 dołaraŭ za kvadratny mietr. Kali heta adbudziecca, to i na druhasnym rynku stalicy kvatery pačnuć chutka tańnieć.

Siarhiej Kurkač, Źviazda

Клас
0
Панылы сорам
0
Ха-ха
0
Ого
0
Сумна
0
Абуральна
0