Hałoŭnakamandujučy jadziernymi siłami ZŠA zajaviŭ u subotu, što jon admovicca ad zahadu prezidenta Donalda Trampa nanieści jadzierny ŭdar, kali hety zahad budzie «niezakonnym», paviedamlaje CNN.

Hałoŭnakamandujučy jadziernymi siłami ZŠA hienierał Džon Chajten.

Hałoŭnakamandujučy jadziernymi siłami ZŠA hienierał Džon Chajten.

Vystupajučy na Forumie mižnarodnaj biaśpieki ŭ Halifaksie, Kanada, hienierał Džon Chajten, jaki kiruje stratehičnym kamandavańniem ZŠA, padzialiŭsia tym, što adbudziecca, kali jamu zahadajuć pačać jadzierny ŭdar.

«Ja kansultuju prezidenta, — skazaŭ Chajten. «Jon skaža mnie, što rabić, i kali heta niezakonna, adhadajcie, što adbudziecca? Ja skažu: «Spadar Prezident, heta niezakonna». Adhadajcie, što jon zrobić jon? - Jon skaža: «A što budzie zakonnym?» I my prydumajem varyjanty spałučeńnia mahčymaściaŭ, kab adreahavać na lubuju situacyju. Voś tak heta i pracuje. Heta nie tak składana».

Stratehičnaje kamandavańnie ZŠA kantraluje jadziernuju zbroju ZŠA i supraćrakietnuju abaronu. Demakraty ŭ Kanhresie i Sienacie zaniepakojenyja tym, što Tramp zanadta «niestabilny», kab jamu daviarali jadziernuju zbroju.

Chajten vystupiŭ z tłumačeńniami paśla taho, jak sienacki kamitet pa zamiežnych spravach zasłuchaŭ na hetym tydni dakład ab paŭnamoctvach prezidenta pa zapusku jadziernaj zbroi. Heta było pieršaje takoje słuchańnie ŭ Kanhresie za bolš čym 40 hadoŭ.

Choć prezident i maje prava addać zahad, hienierał Chajten publična padkreśliŭ, što vajskoŭcy ZŠA zaŭsiody abaviazanyja vykonvać tolki zakonnyja zahady, u tym liku i tyja, jakija ciahnuć za saboj vykarystańnie jadziernaj zbroi.

Na słuchańniach u Sienacie na hetym tydni ekśpierty paćvierdzili, što vykarystańnie jadziernaj zbroi pavinna być praparcyjnym isnujučaj pahrozie, i ŭ Pientahona majucca šyrokija mahčymaści dla vykarystańnia zvyčajnych uzbrajeńniaŭ suprać, da prykładu, Paŭnočnaj Karei.

«Heta sistema, kantralavanaja ludźmi … ništo nie adbyvajecca aŭtamatyčna. Amierykanskija vajskoŭcy vykonvajuć zahady nie ślepa, i prezidenckaje rasparadžeńnie na vykarystańnie jadziernaj zbroi pavinna być zakonnym», — skazaŭ padčas słuchańniaŭ hienierał Kieler, papiarednik Chajtena na pasadzie hałoŭnakamandujučaha jadziernymi siłami.

Kieler patłumačyŭ, što praces pryniaćcia rašeńniaŭ pra jadzierny ŭdar «ŭklučaje ŭ siabie acenku, ahlad i kansultacyi pamiž prezidentam i klučavymi hramadzianskimi i vajskovymi lidarami, za jakimi nastupaje zahad i vykanańnie prezidenckaha rašeńnia samimi zbrojnymi siłami. Kali jość niezakonny zahad, addadzieny vajskoŭcam, vajskoŭcy abaviazanyja admovicca ad jahonaha vykanańnia», — padsumavaŭ hienierał.

Клас
0
Панылы сорам
0
Ха-ха
0
Ого
0
Сумна
0
Абуральна
0