Majkł Flin i Donald Tramp. Archiŭnaje fota AP.
Siensacyjnaja navina z ZŠA: były daradca prezidenta ZŠA pa nacyjanalnaj biaśpiecy Majkł Flin pryznaŭ siabie vinavatym u dačy łžyvych pakazańniaŭ FBR ab svaich pieramovach z tahačasnym pasłom Rasii ŭ Vašynhtonie Siarhiejem Kiślakom. Flin zajaviŭ pra hatoŭnaść supracoŭničać sa śledstvam u abmien za źmiakčeńnie pakarańnia.
Hienierał Flin zajaviŭ u sudzie, što prymaje na siabie «poŭnuju adkaznaść za svaje dziejańni».
Pieramovy Flina z Kiślakom adbylisia ŭ śniežni 2016 hoda. Tramp tady ŭžo byŭ abrany, ale jašče nie ŭstupiŭ na pasadu prezidenta.
Kali Flin vychodziŭ z sudu, ludzi kala budynka zahukali: «Pasadzić!». Reč u tym, što heta Flin zavodziŭ skandavańni na adras Klintan na mitynhach Trampa: «Pasadzić!» (Lock her up!)
Hienierał Flin zajmaŭ pasadu daradcy prezidenta ZŠA pa nacyjanalnaj biaśpiecy mienš čym miesiac i syšoŭ u adstaŭku, kali stała viadoma, što jon dezynfarmavaŭ vice-prezidenta ZŠA pra svaje pieramovy z pasłom Rasii. Jak miarkujecca, Maskva chacieła dabicca admieny sankcyj. ŚMI pakul nie majuć infarmacyi, ci zabiaśpiečvaŭ Kreml uzamien štab Trampa kampramatam na Chiłary Klintan.
Pakul ciažka skazać, ci pryznańni Flina kinuć cień na samoha Donalda Trampa, ci jany ŭdarać tolki pa fihurach u jahonym atačeńni, siarod jakich pieradusim nazyvajuć ziacia prezidenta, Džareda Kušniera, jaki taksama, imavierna, byŭ uciahnuty ŭ tajnyja kantakty z Maskvoj.
Adnak telekanał ABC News maje infarmacyju, što Flin hatovy dać pakazańni «suprać prezidenta Trampa, členaŭ jaho siamji i pradstaŭnikoŭ Biełaha doma». Pavodle infarmacyi telekanała, Flin zhodny raskazać, jak Tramp, budučy kandydatam u prezidenty ZŠA, daručyŭ jamu ŭstanavić kantakty z Rasiejaj.
