Fota Aleha Charsiejeva, «Kommiersant».
Cud prysudziŭ kamandzira v/č № 92485 u vioscy Rykasicha Archanhielskaj vobłaści majora Isajeva da čatyroch hadoŭ kałonii ahulnaha režymu za ździeki z sałdataŭ terminovaj słužby, paviedamlaje openrussia.org.
Isajeva pryznali vinavatym pa dvuch epizodach pieravyšeńnia słužbovych paŭnamoctvaŭ z prymianieńniem hvałtu. Jamu taksama zabaranili zajmać kirujučyja pasady ciaham dvuch hadoŭ.
Kryminalnaja sprava suprać Isajeva była zaviedziena paśla masavaj skarhi sałdat terminovaj słužby ŭ vajskovuju prakuraturu. U zvarocie sałdaty apisali ździeki, źniavahi, a taksama «abrazy seksualnaha charaktaru», jakim jany padviarhalisia padčas słužby pad kamandavańniem majora.
Tak, IA «Biełamorkanał» pryvodzić vypadak, jaki adbyŭsia 14 krasavika padčas praviadzieńnia taktyčnych vučeńniaŭ:
«Pierad praviadzieńniem viačerniaj pavierki, pa zahadzie majora asabistamu składu było zahadana pašychtavacca hołymi dla praviadzieńnia cialesnaha ahladu. Uvieś ryštunak, remień sa štyk-nažom, kasku, usio treba było mieć pry sabie i na sabie. Asabisty skład pastroiŭsia ŭ spalni. Da ich padyšoŭ kamandzir major I., vyvieŭ sa stroju radavoha H. i prymusiŭ jaho ahladać i vymiarać liniejkaj pałavyja orhany svaich tavaryšaŭ pa słužbie. Pry hetym jon zahadaŭ radavomu H., kab jon byŭ asabliva ŭvažlivy da ahladu, pravieryŭ najaŭnaść na pałavych orhanach zasosaŭ i ukusaŭ.
Major Isajeŭ skazaŭ, što ŭ kaho pałavy orhan budzie daŭžejšy, toj budzie spać ŭvieś nastupny dzień», - zajaŭlali jany.
Usie nastupnyja dni, pisali vajskoŭcy, Isajeŭ praciahvaŭ padobnyja «cialesnyja ahlady», akcentujučy ŭvahu na pamiery pałavych orhanaŭ, i patrabujučy, pryvieści ich u «bajavoje stanovišča». Adnaho z radavych major «prymušaŭ rabić usiakija nieprystojnyja dziejańni seksualnaha charaktaru ŭ adnosinach da kaleh». Akramia taho, na čas vučeńniaŭ major zahadaŭ sałdatam znachodzicca ŭ stalovych šlemach, u tym liku padčas snu i pryjomu ježy.
Akramia taho, Isajeŭ, pa słovach sałdat, adpraŭlaŭ niekatorych radavych «žyć na łajno» — vyčerpvać adkidy z prybiralni z 6 hadzin ranicy da 22 hadzin viečara. «Byŭ vypadak, kali major I. adpraviŭ 3-4 chłopcaŭ (dakładnuju kolkaść nie pamiataju). Padčas PHD (subotniaja ŭborka) [Isajeŭ] adpraviŭ ich myć ścieny, padłohu i stol prybiralni.
Kali chłopcy skončyli, kamandzir kinuŭ vučebnuju hranatu ŭ dzirku prybiralni, z-za čaho chłopcam pryjšłosia znoŭku navodzić paradak. Taksama prysutničała šmat niedarečnych zahadaŭ, jakija charaktaryzujuć jaho dziejańni jak asoby nieadekvatnaj».
Svajaki sałdat terminovaj słužby paćvierdzili ahienctvu ich słovy. Paśla publikacyi skarhi byłyja sałdaty, jakija prachodzili słužbu ŭ Rykasisie, stali raspaviadać pra inšyja padobnyja vypadki.
