Kanadskaja palicyja paličyła abstaviny śmierci miljardera Bary Šermana i jaho žonki Chani «padazronymi», piša Bi-bi-si.
Ich cieły byli vyjaŭlenyja ŭ sklepie ich ułasnaha doma ŭ Taronta.
Bary Šerman zasnavaŭ i ŭznačalvaŭ farmaceŭtyčnuju kampaniju Apotex — najbujniejšaha ŭ krainie vytvorcy lekaŭ-dženerykaŭ.
«Abstaviny śmierci vyhladajuć padazrona, i mienavita tak my padychodzim da rasśledavańnia hetaj spravy», — zajaviŭ kanstebl Devid Chopkins.
Niezadoŭha da śmierci Šermany vystavili na prodaž svoj asabniak. Ryełtar pryjechaŭ na miesca, kab padrychtavać dom da pakazu patencyjnym pakupnikam, i vyjaviŭ cieły muža i žonki, paviedamlaje kanadskaja hazieta The Globe and Mail sa spasyłkaj na siamju Šermanaŭ.
U zajavie palicyi havorycca, što prykmiet uzłomu ŭ domie nie vyjaŭlena.
Šermany chacieli pradać dom za bolš čym 5 młn dalaraŭ.
Jak paviedamiŭ detektyŭ Brendan Prajs kanadskamu kanału CBC, ciapier śledčyja sprabujuć vyśvietlić, ci była śmierć Bary i Chani Šermanaŭ hvałtoŭnaj.
75-hadovy Bary Šerman byŭ fiłantropam i adnym z najbahaciejšych ludziej Kanady. Forbes aceńvaŭ jaho asabistuju majomaść u 3 młrd dalaraŭ ZŠA.
Bary Šerman zasnavaŭ Apotex ŭ 1974 hodzie.
Raniej svajaki vinavacili pradprymalnika ŭ tym, što jon adcisnuŭ ich ad udziełu ŭ prybytkovym biznesie, i nieadnarazova sprabavali atrymać kampiensacyju praz sud, adznačaje Rejter.
U Šermanaŭ zastałosia čaćviora dziaciej.
