Trahiedyja kala HC «Zamak», u jakoj zahinuła 11-hadovaja dziaŭčynka, šakavała kožnaha. Chtości patrabuje samaha surovaha pakarańnia dla vadziciela, jaki ździejśniŭ najezd, inšyja vinavaciać u DTZ DAI, častka ludziej vykazvajuć spačuvańnie siemjam zahinułaha dziciaci i svajakam aŭtamabilista. Auto.tut.by znajšoŭ siamju kiroŭcy hruzavika i pahutaryŭ sa svajakami paśla avaryi.
«Baćka vinavaty, jon i sam hetaha nie admaŭlaje. My čakajem suda»
Avaryja adbyłasia ŭ subotu, 2 śniežnia, na piešachodnym pierachodzie na praśpiekcie Pieramožcaŭ, kala HC «Zamak». Hruzavik ZIŁ zajechaŭ u piešachodaŭ, kali jany pierasiakali prajeznuju častku pa piešachodnym pierachodzie na zialony sihnał śviatłafora. Zahinuła 11-hadovaja dziaŭčynka, jašče čaćviora atrymali traŭmy. Hruzavikom kiravaŭ 55-hadovy kiroŭca, na momant avaryi jon byŭ ćviarozy.
Adna ź viersij, jakuju razhladaje śledstva, — u hruzavika nie spracavali tarmazy. Vyśvietliłasia, što apošni raz aŭtamabil prachodziŭ techahlad u 2015 hodzie.
Da momantu trahiedyi kiroŭca, jaki ździejśniŭ DTZ kala HC «Zamak», žyŭ razam sa svajoj žonkaj u ścipłaj piacipaviarchoŭcy ŭ pryharadzie stalicy. U pary jość troje darosłych synoŭ, ale žyvuć jany asobna ad baćkoŭ, tamu žonka aŭtamabilista Iryna Vasiljeŭna doma znachodzicca čaściej za ŭsio adna. Kab padtrymać maci, syny pryjazdžajuć da jaje paśla pracy i ŭ vychodnyja.
— Što ž tut skažaš pra toje, jak žyvu … Nie splu, nie jem, usio dumaju tolki pra heta, navat na pracy dumki da padziej viartajucca… — skazała žančyna, vycirajučy ślozy.
Paźniej da razmovy dałučylisia siaredni i małodšy syny Jaŭhien i Dzianis.
Jaŭhien raspavioŭ, što baćka pačaŭ zajmacca hruzapieravozkami ź jaho padačy try hady tamu. Mužčyna taksama zajmajecca pieravozkami. Jaŭhien addaŭ baćku stareńki ZIŁ. Baćka vyrašyŭ pasprabavać i zarehistravaŭsia indyvidualnym pradprymalnikam: pačaŭ razvozić tavary pa kramach.
— Hety ZIŁ zarehistravany na mianie, ale za jaho techstanam hladzieŭ baćka. Dy voś niešta, mabyć, nie nadhledzieŭ …
Chłopcy nie leźli ŭ spravy baćki i nie daviedvalisia, jak iduć spravy z mašynaj i ci projdzieny techahlad — u kožnaha byli svaje spravy, praca i siemji.
— Nam nie chočacca, kab hetuju historyju znoŭ abmiarkoŭvali. Hetaha było dastatkova, kali tolki adbyłasia avaryja, — pryznaŭsia małodšy Dzianis. — Nijakija artykuły nam nie dapamohuć. Baćka vinavaty, jon i sam hetaha nie admaŭlaje. My čakajem suda, jaki byccam by pavinien adbycca ŭ kancy studzienia-lutym.
Chłopiec zhadvaje, što adrazu paśla DTZ baćka patelefanavaŭ jamu i Dzianis paniośsia na miesca avaryi.
— Ja bačyŭ, što adbyvałasia na miescy avaryi paśla najezdu, jakija ludzi prychodzili, jak pracavała milicyja, miedyki. Ale heta zdareńnie abrasło čutkami i zdahadkami, jakija potym źjavilisia ŭ ŚMI.
Zaraz členy siamji kiroŭcy trymajuć suviaź sa śledčym, jaki viadzie hetuju spravu, tamu viedajuć mnohija niuansy, źviazanyja ź jaho rasśledavańniem, ale raspaŭsiudžvać ich nie majuć prava.
— Nam ciapier vielmi ciažka, mama vielmi pieražyvaje i płača. Joj, napeŭna, ciažej, čym usim nam, jana navat u kramu lišni raz vychodzić nie choča — usie susiedzi viedajuć pra toje, što adbyłosia.
«Nie viedaju, jak treba pačać razmovu ź ludźmi, u jakich zahinuła dzicia …»
U siamji zaraz vielmi šmat prablem, jakija treba vyrašać. Chutka im treba budzie havaryć z paciarpiełymi — baćkami zahinułaj dziaŭčynki, kali, viadoma, tyja zachočuć mieć znosiny.
— Nie ŭjaŭlaju, jak u nas atrymajecca razmaŭlać ź ludźmi, u jakich niadaŭna nie stała dziciaci… Tut nijakich słoŭ nie padbiareš… Vykazać spačuvańnie? Prasić prabačeńnia? A jak pry hetym zahavaryć pra hrašovuju kampiensacyju? Bo ŭsim zrazumieła, što nijakimi papierkami-hrašyma nie zamieniš svajho rodnaha lubimaha čałavieka, a tym bolš dzicia… My ŭsie źbirajem hrošy, ale ŭsio roŭna heta vielmi vialikaja suma, jakoj u nas niama.
Chłopcy raspaviali, što niadaŭna ich baćka dasłaŭ ź SIZA list. Paviedamlaje, što ŭ jaho ŭsio narmalna. U kamiery jon znachodzicca z takimi ž, jak i jon sam, — kiroŭcami, jakija trapili za kraty za DTZ, abo ludźmi, jakija zrabili ekanamičnaje złačynstva. Adpietych kryminalnikaŭ tam niama.
— Viadoma, tata ŭ liście bolš źviartaŭsia da mamy. Prosić jaje trymacca…
Auto.tut.by pahutaryŭ i z susiedziami hetaj siamji. Usie jany ŭ šoku ad taho, što adbyłosia i nie razumiejuć, jak takoje mahło zdarycca z takim dobrym čałaviekam.
— Dvaccać hadoŭ my žyviom u adnym domie. Viadoma, u hości my adzin da adnaho nie chadzili, vitalisia pa-susiedsku, mahli pahutaryć. Było bačna, što heta dobraja siamja — nie pjanicy, nie skandalisty, pracaŭniki, vietlivyja vielmi. Viadoma, Iryna ciapier paźbiahaje lišni raz vychodzić na vulicu, joj ciapier vielmi ciažka. Ale nam usim vielmi škada, što takoje zdaryłasia. Ale my nikoha nie asudžajem, bo ŭ takuju situacyju moža patrapić kožny čałaviek, ad hetaha nichto nie zastrachavany…
Kiroŭcu hruzavika vystaŭlenaje abvinavačvańnie pa č. 2 art. 317 KK RB (Parušeńnie PDR asobaj, jakaja kiravała transpartnym srodkam, što paciahnuła pa nieaściarožnaści śmierć čałavieka). Jon źmieščany pad vartu.
