Demanstranty, jakija biaruć udzieł u «Maršy za impičmient» prezidentu Piatru Parašenku, sprabujuć uvajści ŭ Kastryčnicki pałac. Tam prychilniki Michaiła Saakašvili płanujuć arhanizavać «štab kaardynacyjnaj rady», piša Bi-bi-si.
La pałaca pačałasia šturchanina, pieryjadyčna kidajuć kamiani. Paviedamlajuć taksama pra ŭžyvańnie ślezaciečnaha hazu.
Daradca kiraŭnika MUS Ukrainy Anton Hieraščanka napisaŭ u Facebook, što ciapier u pałacy prachodzić navahodniaje śviata dla dziaciej i zajaviŭ, što palicyi daručyli «zabiaśpiečyć biaśpieku dziaciej».
Arhanizatary maršu zaklikajuć ludziej «nie pravakavać palicyju» i kažuć, što nie źbirajucca «ničoha zachoplivać niezakonna».
Pratestoŭcy sabralisia siońnia ŭ kijeŭskim parku Šaŭčenki, zatym rušyli šeściem da płoščy Niezaležnaści, i paśla sa sceny Saakašvili zaklikaŭ ludziej iści da Kastryčnickaha pałaca.
Pavodle roznych źviestak, demanstrantaŭ naličvajecca ad dziesiaci tysiač da niekalkich dziesiatkaŭ tysiač čałaviek.
Pratest ŭznačaliŭ sam Saakašvili, jakoha na tym tydni zatrymała palicyja i abvinavaciła «ŭ sadziejničańni złačynnaj arhanizacyi». Adnak Piačerski sud Kijeva 11 śniežnia adpuściŭ palityka i admoviŭsia aryštoŭvać jaho.
Na Majdanie Saakašvili skazaŭ emacyjnuju pramovu, nazvaŭšy «vorahami Ukrainy», u pryvatnaści, prezidenta Piatra Parašenku i hienprakurora Juryja Łucenku.
Maršy Saakašvili
Niadzielny «marš za impičmient» staŭ užo trecim zapar, jaki pravodziać paplečniki Saakašvili.
3 śniežnia 2017 Saakašvili arhanizavaŭ pieršy «Marš», na jaki sabrałasia kala troch tysiač apazycyjaneraŭ.
A ŭžo 5 śniežnia ranicaj bajcy Słužba biaśpieki Ukrainy pryjšła ź pieratrusam u kvateru Saakašvili i zatrymała jaho, sprabujučy vyvieźci ŭ SIZA. Ale prychilniki adbili.
U toj ža dzień hienprakuror Juryj Łucenka pradstaviŭ zapisy razmoŭ, ź jakich vynikaje, što Saakašvili i jaho paplečniki nibyta atrymlivali hrošy dla arhanizacyi pratestaŭ ad ukrainskaha biznesoŭca Siarhieja Kurčanki. Apošni źbieh u Rasieju ŭ 2014 hodzie paśla adchileńnia ad ułady Viktara Janukoviča.
Niekalki dzion Saakašvili chavaŭsia ŭ namiotavym miastečku, Adnak 8 śniežnia jaho zatrymali na kvatery adnaho z udzielnikaŭ pratestu.
Druhi marš Saakašvili adbyŭsia 10 śniežnia i na jaho sabrałasia ad troch da dziesiaci tysiač čałaviek.
Siarod hałoŭnych patrabavańniaŭ mitynhoŭcaŭ było vyzvaleńnie Saakašvili i adstaŭka Juryja Łucenki.
A ŭžo ŭ paniadziełak 11 śniežnia Piačerski sud Kijeva vybraŭ Saakašvili miera strymańnia pa spravie ab zamachu na dziaržaŭny pieravarot. Prakuratura patrabavała prymianić da jaho kruhłasutačny chatni aryšt, adnak sud vyrašyŭ adpuścić jaho na paruki narodnych deputataŭ.
Saakašvili maje va Ukrainie status asoby biez hramadzianstva, bo prezydent Parašenka pazbaviŭ jaho pašparta jašče ŭletku 2017 hoda. Tady jon jakraz znachodziŭsia ŭ ZŠA.
10 vieraśnia Saakašvili z paplečnikami zmahli pryjechać va Ukrainu, niahledziačy na supraciŭ pamiežnikaŭ i palicyi.
Ciapier palicyja Lvoŭskaj vobłaści rasśleduje spravu ab arhanizacyi niezakonnaha pierasiačeńnia miažy. Heta kryminalnaje złačynstva, i arhanizataram pierasiačeńnia pahražaje pazbaŭleńnie voli.
