Kantaktnaja hrupa pa ŭrehulavańni situacyi na Ukrainie damoviłasia ab spynieńni ahniu ŭ Danbasie z paŭnočy 23 śniežnia, paviedamlaje RIA-Naviny.
«Kantaktnaja hrupa padkreśliła nieabchodnaść zabiaśpiečyć mir i spakoj na Danbasie ŭ suviazi z nadychodziačymi kaladnymi i navahodnimi śviatami. Kirujučysia raniej dasiahnutymi damoŭlenaściami, kantaktnaja hrupa paćvierdziła prychilnaść zachavańniu ŭsioabdymnaha, ŭstojlivaha i biesterminovaha režymu spynieńnia ahniu z nula hadzin 23 śniežnia 2017 hoda», - paviedamiŭ pradstaŭnik Rasiei Barys Hryzłoŭ paśla zakančeńnia pieramovaŭ u Minsku.
Heta paćvierdziŭ i cpiecpradstaŭnik ABSIE Marcin Sajdzik.
Akramia taho, udzielniki hrupy paćvierdzili imknieńnie pravieści abmien pałonnymi da śviataŭ, dadaŭ Hryzłoŭ. Raniej Ukraina i samaabvieščanyja «DNR» i «ŁNR» ŭzhadnili śpisy: Kijeŭ pavinien pieradać 306 čałaviek, a respubliki — 74.
Udzielniki pieramoŭ u Minsku ŭžo šmat razoŭ damaŭlalisia ab usioabdymnym i biesterminovym spynieńni ahniu, adnak ani razu jaho nie ŭdavałasia ŭstalavać nadoŭha: abodva vajujučyja baki nieŭzabavie zajaŭlali pra adnaŭleńnie abstrełaŭ.
