Hramadskaje abjadnańnie «Ajkoł Ała-Tao» praviało 14 śniežnia mitynh u Biškieku kala budynka Ambasady Biełarusi ŭ Kyrhyzstanie, ahučyŭšy svoj zvarot da Alaksandra Łukašenki, paviedamlaje azattyk.org.
Jak raniej paviedamiŭ Tut.by, były premjer-ministr Kyrhyzstana Danijar Usienaŭ, imavierna, viadzie biznes u Biełarusi ad imia Daniiła Uryckaha. Hod tamu stała viadoma, što čałaviek z takimi imiom i proźviščam kiruje śviežastvoranaj «Biełaruskaj nacyjanalnaj bijatechnałahičnaj karparacyjaj» (BNBK).
Pikiet pierad ambasadaj Biełarusi ŭ Kyrhyzstanie
U svajoj zajavie pradstaŭniki kyrhyzstanskaj arhanizacyi adznačyli, što pradstaŭlajuć intaresy «paciarpiełych i siemjaŭ zahinułych u krasavickich padziejach 2010 hoda na hałoŭnaj płoščy Kyrhyzstana ŭ Biškieku». «Kali Vam darahi narod Biełarusi, to nie puskajcie kazła ŭ aharod. Addajcie Kyrhyzstanu Danijara Usienava — Daniiła Uryckaha, jaki pavinien siadzieć pažyćciova ŭ turmie», — havorycca ŭ zvarocie «Ajkoł Ała-Tao».
U zaklučeńnie jany vykazali nadzieju, što Alaksandr Łukašenka pačuje ich hołas, i adznačyli, što spadziajucca na jaho «razvažlivaść».
Nichto z pradstaŭnikoŭ Pasolstva Biełarusi ŭ KR da ŭdzielnikaŭ akcyi nie vyjšaŭ, ale prysutnyja pakinuli na KPP dyppradstaŭnictva tekst zvarotu. Usiaho ŭ akcyi, pa dadzienych «Ajkoł Ała-Tao», pryniali ŭdzieł kala 50 čałaviek.
Raniej u sacyjalnych sietkach raspaŭsiudziłasia infarmacyja ab tym, što hramadzianin Kyrhyzstanu Danijar Usienaŭ, jaki u minułym zajmaŭ vysokija pasady, a ŭ 2010 hodzie ŭznačalvaŭ urad krainy, nibyta pražyvaje ŭ Biełarusi pad imiem Daniiła Uryckaha. Sudom KR Danijar Usienaŭ prysudžany da pažyćciovaha źniavoleńnia ŭ suviazi z krasavickimi padziejami 2010 hoda, kali siłaviki stralali ŭ pratestujučych na płoščy.
Kurmanbiek Bakijeŭ, skinuty z pasady prezidenta Kyrhyzstana ŭ vyniku kryvavych pratestaŭ u krasaviku 2010 hoda, razam ź siamjoj atrymaŭ prytułak u Biełarusi.
