Źnikłaja 1 śniežnia 23-hadovaja žycharka Baranavickaha rajona Julija Badak sama viarnułasia dadomu 7 studzienia. Na nastupny dzień jaje ciotka raspaviała ŚMI pra toje, što jaje plamieńnica zhubiłasia z-za straty pamiaci. Milicyja hetuju viersiju nie paćviardžaje.

Jak paviedamiła haziecie Intex-press ciotka źnikłaj Julii, plamieńnica ŭ dzień źniknieńnia pavaliłasia, paśliznuŭšysia ŭ vannaj. Pry padzieńni dziaŭčyna raźbiła hałavu, z-za čaho straciła pamiać.

— Niekalki sutak plamieńnica chadziła pa horadzie. Pra siabie jana ničoha nie pamiatała, — pieradała žurnalistam historyju plamieńnicy jaje ciotka Śviatłana. — Kab kupić ježy, sprabavała znajści pracu. Potym niejkim čynam apynułasia na Paleskim vakzale. Tam na dziaŭčynu z raźbitaj hałavoj źviarnuła ŭvahu pažyłaja para.

Piensijaniery padyšli da jaje, stali raspytvać, što adbyłosia. Kali daviedalisia, što šukaje pracu, prapanavali dapamahčy - pajechać da ich u viosku ŭ Salihorski rajon. Jana pahadziłasia i miesiac žyła ŭ ich. Kali da Julii viarnułasia pamiać, jana raspaviała pra ŭsio pažyłoj pary i tyja, maŭlaŭ, dali hrošy joj na zvarotny kvitok dadomu. Pry hetym ni nazvu vioski, ni proźvišča piensijanieraŭ, jakija jaje prytulili, ciotka Julii nazvać nie zmahła — plamieńnica nie zapomniła. Śviatłana taksama paviedamiła žurnalistam, što kali da dziaŭčyny vierniecca pamiać, jany abaviazkova naviedajuć pažyłuju paru, jakaja jaje prytuliła.

U milicyi viersiju z amniezijaj nie paćviardžajuć. Jak paviedamili TUT.BY u Baranavickim RAUS, u chodzie apieratyŭna-vyšukovych dziejańniaŭ było ŭstanoŭlena, što 30 listapada Julija Badak pryjechała ź vioski Vialikija Łuki ŭ viosku Rusino Baranavickaha rajona da svajoj stryječnaj siastry.

— Pakul toj nie było doma, jana vypadkova raźbiła škło ŭ mikrachvalevaj piečy. Spałochaŭšysia, dziaŭčyna syšła, a telefon vyklučyła. Da 3 śniežnia jana znachodziłasia ŭ Baranavičach. Na Paleskim vakzale jana paznajomiłasia z mužčynam, jaki prapanavaŭ joj pajechać da jaho ŭ Salihorski rajon. Tam jana pražyvała niekatory čas. Potym mužčyna prapanavaŭ joj uładkavacca na pracu. Pakolki ni pracoŭnaj knižki, ni pašparta ŭ jaje nie było, dziaŭčyna vyrašyła viarnucca dadomu pa dakumienty, — paviedamili ŭ viedamstvie.

1 studzienia Julija pryjechała ŭ Vialikija Łuki, ale dadomu nie pajšła - chavałasia na haryščy ŭ chlavie ciotki. Tam jaje znajšli 7 studzienia supracoŭniki milicyi. Pra toje, ci była ŭ dziaŭčyny traŭma hałavy, pravaachoŭnikam nieviadoma.

U hutarcy z TUT.BY ciotka Julii adznačyła, što vieryć historyi pra stratu pamiaci, jakuju joj raskazała plamieńnica. U toj ža samy čas žančyna adznačyła, što da lekaraŭ Julija nie źviartałasia.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?