Ekśpierty miarkujuć, što Drahaš moža pieramahčy ŭ druhim tury, Reuters
U Čechii skončyŭsia pieršy tur prezidenckich vybaraŭ. Nichto nie nabraŭ 50% hałasoŭ. Pavodle papiarednich vynikaŭ, dziejučy prezident Miłaš Zeman maje 39,5%, jaho hałoŭny praciŭnik Iržy Drahaš — 26%, Pavieł Fišer — kala 10%,a były premjer Mirek Tapałaniek nabraŭ 4%, paviedamlaje idnes.cz.
Usiaho ŭ prezidenckaj honcy brali ŭdzieł dzieviać kandydataŭ, jaŭka ŭ pieršym tury skłała 60%.
Hałoŭnaja intryha była, ci nabiare 73-hadovy Zeman 50% hałasoŭ, a značyć, ci budzie druhi tur. Nie nabraŭ, druhi tur budzie.
Zemana nazyvajuć siabram Maskvy, jon nieadnarazova vykazvaŭsia za admienu sankcyj suprać Rasii, u tym liku zusim niadaŭna — u listapadzie padčas vizitu ŭ Maskvu.
Pierad hetym, u kastryčniku 2017-ha, prezident Čechii, vystupajučy na Parłamienckaj asamblei Rady Jeŭropy, nazvaŭ anieksiju Kryma Rasijaj «skončanym faktam» i prapanavaŭ spahnać z Rasii na karyść Ukrainy jakuju-niebudź kampiensacyju.
Adrazu paśla brytanskaha refierendumu ab členstvie ŭ Jeŭrasajuzie Zeman prapanavaŭ pravieści refierendum ab členstvie Čechii i ŭ ES, i ŭ NATA. Praŭda, pry hetym padkreśliŭ, što sam jon — za toje, kab Čechija zastavałasia ŭ abiedźviuch arhanizacyjach. Adnačasova Zeman krytykavaŭ Brusel za palityku ŭ halinie imihracyi i, choć u Čechii amal zusim niama blizkaŭschodnich i afrykanskich imihrantaŭ, heta padabajecca vialikaj častcy elektaratu.
Iržy Drahašu — 68 hadoŭ, jon były prezident Akademii navuk, chimik, piedahoh, maje reputacyju jeŭraaptymista i libierała i poŭnaj procilehłaści Zemanu, u tym liku i za styl pavodzinaŭ.
Svaim vybarščykam jon abiacaje, pierš za ŭsio, «pavyšeńnia jakaści dyjałohu z hramadstvam». Iržy Drahaš vystupaje jak niezaležny kandydat, jakoha padtrymlivaje Chryścijanska-demakratyčnaja partyja, paviedamlaje Češskaje radyjo.
«My pavinny aktyŭna ŭdzielničać u jeŭrapiejskaj palitycy. Našy adnosiny ź inšymi krainami ES dajuć nam mahčymaści, pra jakija raniej my mahli tolki maryć», — havorycca ŭ pieradvybarnym manifieście Drahaša.
Što tyčycca sankcyj u dačynieńni da Rasii, to Drahaš — za ich zachavańnie.
«Sankcyi suprać Rasii byli ŭviedzienyja paśla taho, jak jana hruba parušyła Budapiešckija pahadnieńni 1994 hoda, jakija harantavali terytaryjalnuju cełasnaść Ukrainy […] Z majho punktu hledžańnia, padstavy dla sankcyj zachoŭvajucca», 0- skazaŭ Drahaš u teleintervju napiaredadni Novaha hoda.
«Mianie turbuje bližejšaje asiarodździe prezidenta, jakoje vidavočna ciahnie Češskuju Respubliku tudy, kudy ja asabista nie chaču. Ciahnuć na ŭschod, u bok pucinskaj Rasii, u bok Kitaja», - kazaŭ Drahaš, paviedamlaje Bi-bi-si.
Darečy, nie fakt, što Drahaš pieramoža Zemana ŭ druhim tury. Ekśpierty miarkujuć, što na vybarčyja ŭčastki mohuć pryjści schavanyja prychilniki Zemana. Ci naadvarot, mabilizujucca prychilniki jeŭraintehracyi.
Prezident Čechii abirajecca ŭsienarodna z 2013 hoda, tady pieramoh akurat Zeman. Pierad hetym prezidenta ŭ krainie z 1918 abiraŭ parłamient.
