U škole №67, u jakoj častka vykładčykaŭ i baćkoŭ ŭzbuntavalisia suprać dyrektara, vialikija pieramieny. Raniejšy kiraŭnik navučalnaj ustanovy Hanna Mielnikava napisała zajavu pa ŭłasnym žadańni, a dzieci źjeździli na konkurs, na jaki jana ich nie adpuskała.
Kanflikt u SŠ №67 Homiela zdaryŭsia jašče ŭ pačatku listapada. Niekatoryja nastaŭniki i baćki, niezadavolenyja dziejańniami niadaŭna pryznačanaha dyrektara škoły Hanny Mielnikavaj, skłali kalektyŭny «List niedavieru» i adpravili ŭ vyšejšyja instancyi, a taksama raźmiaścili ŭ internecie pietycyju, u jakoj patrabavali adstaŭki dyrektara.
U škole, dzie paśpiachova raźvivali ŭžo šmat hadoŭ estetyčny napramak (u navučalnaj ustanovie piać uzornych i adzin narodny muzyčny kalektyŭ), na dumku baćkoŭ, litaralna za dva miesiacy pahoršylisia ŭmovy dla repietycyj, štučna skaračalisia hadziny vykładańnia pradmietaŭ estetyčnaj ckiravanaści, dziaciej pazbaŭlali kancertaŭ.
U listapadzie na školnym schodzie z udziełam pradstaŭnikoŭ administracyi Centralnaha rajona Homiela i adździeła adukacyi baćkam paabiacali, što ŭźnikli nieparazumieńni i prablemy ŭ chutkim časie vyrašacca.
Adnak situacyja nie źmianiłasia. Svajho apahieju kanflikt dasiahnuŭ u śniežni, kali dyrektar vydała zahad ab admienie pajezdki na prestyžny mižnarodny konkurs u Polšču z abhruntavańniem «niama srodkaŭ». Baćki znoŭ pačali aburacca. U situacyju ŭmiašalisia haradskija ŭłady i ŭpraŭleńnie adukacyi — dzieciam dazvolili pajechać na konkurs.
Pierad samym novym hodam dyrektar napisała zajavu pavodle ŭłasnaha žadańnia i pajšła sa škoły.
— 22 śniežnia Hanna Vasiljeŭna sabrała ŭ aktavaj zale kalektyŭ i paviedamiła pra svajo zvalnieńnie. Z treciaha studzienia ŭ nas novy dyrektar — Alaksiej Čarnyšoŭ, da hetaha kiravaŭ škołaj №26, — raspaviali ŭ škole.
Darečy, u pačatku studzienia junyja artysty viarnulisia z Polščy z konkursu, na jaki ich nie puskała dyrektar, i pryvieźli adtul hran-pry.