Viciebski abłasny sud 30 studzienia razhledzieŭ apielacyju pa spravie rasijskaha śviatara Mikałaja Kirejeva, jakoha paŭhoda tamu zatrymali ŭ kampanii žančyn lohkich pavodzinaŭ pobač z vakzałam u Viciebsku, i pakinuŭ prysud bieź źmienaŭ, piša Tut.by.
Fota Ihara Maćviejeva
Nahadajem, u listapadzie 2017-ha sud Čyhunačnaha rajona Viciebska prysudziŭ Mikałaja Kirejeva za sprobu arhanizavać vyvaz dziaŭčat za miažu ŭ jakaści prastytutak da 5 hadoŭ 6 miesiacaŭ pazbaŭleńnia voli ŭ kałonii ŭzmocnienaha režymu z kanfiskacyjaj majomaści.
39-hadovy śviatar z pasiołka imia Marozava Leninhradskaj vobłaści vinu nie pryznaŭ: «Ja nie vinavaty. Hetych ludziej (paciarpiełych dziaŭčat) ja nikudy nie vyvoziŭ».
Abaronca Kirejeva — pradstaŭnik jurkansultacyi Partyzanskaha rajona Minska Andrej Doŭnar.
— Da mianie źviarnulisia svajaki i znajomyja ajca Mikałaja. Heta sprava składanaja, ja ničoha kamientavać pakul nie budu. Adnak pazicyja padabaronnaha taja ž: jon ličyć siabie nievinavatym, kaža, što jaho dziejańni byli vymušanymi, — paviedamiŭ jon.
Pavodle jaho słoŭ, apielacyju padavali i abarona, i bok abvinavačvańnia. Sudovaja kalehija pakinuła prysud suda Čyhunačnaha rajona Viciebska bieź źmienaŭ. Advakat pakul nie viedaje, ci budzie jaho padabaronny abskardžvać i heta rašeńnie.
