Zdabyča nafty j hazy i ekspart Rasijskaj Fiederacyjaj hetych resursaŭ u 2008 hodzie dasiahnuła svajho maksimuma. U toj ža čas ceny na vuhlevadarody na suśvietnych rynkach apošnimi miesiacami źnizilisia amal na 10%.

Pry hetym analityki śćviardžajuć, što mahčymaje j dalejšaje panižeńnie koštaŭ. Pavodle samaha piesimistyčnaha, ale małavierahodnaha scenaru, ahučanaha kampanijaj Merrill Lynch nafta ŭ 2009 hodzie moža kaštavać kala 50 dalaraŭ. A aptymistyčnyja acenki ŭkazvajuć siaredni košt nafty marki WTI u 2009 kala 90 dalaraŭ za barel.

Takoje padzieńnie źviazanaje pierš-napierš z peŭnaj pieraacenkaj vuhlevadarodaŭ ciaham 2007-2008 hadoŭ, padvyšeńniem uzroŭniu zdabyčy, a taksama suśvietnym finansavym kryzisam. Heta nie moža nie chvalavać Rasijskuju Fiederacyju. Niahledziačy na zajavy Kramla, ekanomika RF była j zastajecca syravinnaj. Dachody ad ekspartu vuhlevadarodaŭ składajuć panad 30% biudžeta našaj uschodniaj susiedki. Pry hetym rost vydatkaŭ rasijskaj ekanomiki značna pajaredžvaje rost koštaŭ na enerharesursy. I dla zabieśpiačeńnia «rostu ekanomiki» patrebnaje pavialičeńnie dabyčy j prodažu nafty j hazy. Ale za apošnija 10-15 hod praktyčna nie viałasia rabota pa pošuku novych radoviščaŭ. Tamu zapas mahutnaści haliny akazaŭsia nie takim vysokim.

Adpaviedna, Maskva prosta vymušana była była ciaham apošnich hod niaspynna naroščvać dabyču na isnych radoviščach. Pry hetym kiraŭnictva RF zrabiła ŭsio mahčymaje dziela vyciaśnieńnia zamiežnaha kapitału a taksama likvidacyi niezaležnych hulcoŭ na naftavym i hazavym rynku. Tolki za 2005-2007 hod urad RF praz pravierki, błakiravańnie pracy i vybaračnaje vystaŭleńnie pretenzij vymusiŭ pradać svaje radoviščy albo dolu u kancesijach na raspracoŭku radoviščaŭ takich hihantaŭ jak VR, Shell, šerah japonskich i amerykanskich kampanij. A pra los Jukasa možna navat nie ŭzhadvać. A sioleta faktyčna pastaŭlena pad dziaržaŭny kantrol TNK-VR. Menedžery jaho (dola anhielcaŭ u SP składaje 56% akcyj) užo treci miesiac nie dapuskajucca da svaich pracoŭnych miescaŭ.

U toj ža čas rasijskija analityki vykazvajuć zakłapočannaść situacyjaj na naftavym i hazavym rynkach. Padzieńnie koštaŭ na vuhlarody naŭprost skazvajecca na skaračeńni dachodnaj častki biudžeta. Pry hetym pavodle dumki pamočnika prezidenta RF Arkadzia Dvarkoviča kafortnymi dla jahonaj krainy buduć košty «ad 70 da 700 dalaraŭ». Pry hetym biznes analityki adznačajuć što intervał 80-90 dalaraŭ źjaŭlajecca aptymalnym dla ekanomiki (dastatkovaja kolkaść hrošaj bieź pieranasyčanaści rynku). A voś padzieńnie rynku na adznaku 70 i nižej biez kampiensacyi rostam pradažaŭ moža vyklikać surjoznyja ekanamičnyja prablemy.

Paŭtarajecca situacyja z SSSR. U 70-ja hady na fonie niebyvałaha rostu cenaŭ na naftu paśla suśvietnaha kryzisu saviecki ŭrad zdoleŭ zabiaśpiečyć nia tolki adnosnuju zamožnaść ŭnutry krainy, ale j pravodzić šyrokamaštabnyja kampanii pa «eksparcie sacyjalizmu» i padtrymcy «bratnich krainaŭ» pa usim śviecie. Adnak ŭ 1985—1987 hodzie ceny na vuhlevadarody dasiahnuli svajho minimuma za ŭvieś pramiežak času z 1975 pa 1991 hady. Adpaviedna pačalisia prablemy ŭ vyhladzie deficyta i inflacyi časoŭ Harbačova. U 1991 na fonie pieršaj «Bury ŭ pustyni» ceny rezka padskočyli. Ale było ŭžo zapozna. Ekanomika Sajuzu praktyčna pierastała funkcyjanavać. U tym ža hodzie SSSR nia stała.

Dla Biełarusi pa-za inšym naviny z rynkaŭ syraviny mohuć aznačać prynamsi try mahčymyja prablemy:

1. Padzieńnie dachodaŭ ad reekspartu rasijskich naftapraduktaŭ (da 10—12% dachodnaj častki biudžeta).

2. Dalejšaje padaražańnie rasiejskich hazy j nafty.

3. Abmiežavańnie ŭ mahčymaściach karystańnia rasijskaj finansavaj dapamohaj u vyhladzie kredytaŭ j karotkaterminovych zajmaŭ.

Na žal, usie hetyja punkty mohuć spryčynicca j da zamarudžvańnia rostu albo naahuł padzieńnia ŭzroŭniu žyćcia ŭ našaj krainie.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?