Noč žurnalist pravioŭ u Centry izalacyi pravaparušalnikaŭ na Akreścina. Jaho zatrymali ŭ niadzielu na ŭčastku, dzie A. Kozieł zdymaŭ praces vybaraŭ. Žurnalistu moža pahražać štraf ad 20 da 50 bazavych vieličyniaŭ (490-1225 rubloŭ) albo administratyŭny aryšt da 15 sutak za niepadparadkavańnie milicyi.
Andruś Kozieł zajaviŭ sudździ, što jamu nie dali času aznajomicca sa spravaj, tamu prosić dać mahčymaść ź joju aznajomicca. Sudździa abvieściŭ pierapynak na 20 chvilinaŭ, ale jon ciahnuŭsia cełuju hadzinu. Paśla hetaha praces adnaviŭsia.
Advakat zajaviŭ chadajnictva prahladzieć videa, jakoje ŭčora zdymaŭ Andruś Kozieł na ŭčastku. Advakat Kozieła pradstaviŭ zapis na dysku. Sudździa zadavoliŭ chadajnictva i dałučyŭ videa da materyjałaŭ spravy. Advakat taksama paprasiŭ dapytać śviedku zdareńnia — Franciška Dziadova. Chadajnictva zadavolili.
Kozieł raskazaŭ, što byŭ davieranaj asobaj kandydata Mikałaja Kazłova, naziraŭ za vybarami i vioŭ tranślacyju ŭ Facebook. Milicyjanty patrabavali spynić tranślacyju, ale nie mahli patłumačyć, na jakoj padstavie. Kozieł u svaju čarhu tłumačyŭ, što mieŭ prava zdymać. Pryvioŭ šerah spasyłak na Vybarčy kodeks, Kanstytucyju, Zakon ab infarmacyi, infarmatyzacyi i abaronie infarmacyi.
Milicyjat zajaviŭ, što Kozieł zdymaŭ padlik hałasoŭ i na zaŭvahi nie reahavaŭ. Staršynia kamisii paprasiŭ vypravadzić Andrusia Kozieła z pamiaškańnia. Pierad dźviaryma Kozieł pačaŭ supraciŭlacca, upiorsia nahoj i vycisnuŭ škło.
«Try razy ŭdaryli pa hałavie, bili pa rebrach i nyrkach. Ciapier vielmi balić hałava, nijakaj miedyčnaj dapamohi nie akazali, usie prośby ihnaravali. U mianie ŭsio było ŭ kryvi. Mianie pavieźli ŭ RUUS. U dziažurnaj častcy ja pačaŭ pisać zajavu pra źbićcio ŭ prakuraturu. Paśla zabrali mianie ŭ inšy pakoj, zabrali ŭsie rečy. Paśla tudy źjechalisia čynoŭniki ŭ cyvilnym. Cisku ŭ CIP nie było, ale nie davali kopiju pratakołu. Va ŭsich miescach, dzie patrabavali moj podpis, napisali, što ja admoviŭsia ad śviedčańniaŭ. Dźmitryj Krotaŭ daŭ zahad milicyjantu advieźci mianie ŭ CIP. Mnie nie dali mahčymaści aznajomicca sa spravaj. Major zabraŭ moj list i napisaŭ u pratakole, što ja admioviŭsia ad podpisu. Jon pastaviŭ mianie da ściany, pisaŭ pratakoł, kudyści zvaniŭ i havaryŭ, što nie budu padpisvać. Ja skazaŭ, što budu padpisvać, ale jon nie daŭ mnie aznajomicca. Pačaŭ bić i kryčać, što nie budzie praź mianie ŭsiu noč tut siadzieć», — cytuje słovy Andrusia Kozieła Biełsat.
Apieratara «Biełsata» z raźbitaj hałavoj zabrali ŭ RUUS, vinavaciać u napadzie na milicyjantaŭ
