U noč z 18 na 19 lutaha 1918 hoda balšaviki ŭciakli ź Minska na ŭschod. Adpaviedna, vykanaŭčy kamitet Rady Usiebiełaruskaha źjezda zmoh vyjści z padpolla i z turmy byli vyzvalenyja dziejačy Centralnaj biełaruskaj vajskovaj rady.
Vykankam Rady Usiebiełaruskaha źjezda sabraŭsia ŭ domie piśmieńnika-našaniŭca Antona Lavickaha, viadomaha pad psieŭdanimam Jadvihin Š. Svaim zahadam №1 vykankam ad 19 lutaha abviaściŭ, što jon «uziaŭ uładu ŭ svaje ruki».
Vieterynar, vykładčyk sielskahaspadarčaj vučelni Ivan Sierada prapanavaŭ zrabić siadzibaj biełaruskaj ułady znakavy budynak, rezidencyju kolišniaj carskaj administracyi — Hubiernatarski dom, i heta było ažyćcioŭlena. Tam ža raźmiaściłasia «Biełaruskaja kamiendatura», metaj jakoj było nie dapuścić pierachodu miesta pad kantrol polskich vajskovych častak.
Ciapier u Hubiernatarskim domie, mocna pierabudavanym, na płoščy Svabody mieścicca himnazija-kaledž pry Akademii muzyki.
Tady ž, 19 lutaha nad hetym budynkam upieršyniu ŭ historyi byŭ vyviešany nacyjanalny ściah.
21 lutaha budzie pryniataja Pieršaja Ustaŭnaja hramata Biełaruskaj Narodnaj Respubliki. A jašče praź miesiac, Treciaj hramataj, budzie abvieščanaja jaje niezaležnaść. Tak usio i zakruciłasia.
