Pažarnaja sihnalizacyja ŭ kiemieraŭskim handlovym centry «Zimovaja višnia» była pieraviedziena na ručnoje kiravańnie, i achova nie vykanała nieabchodnych dziejańniaŭ pry atrymańni sihnału ab uzharańni. Pra heta paviedamiŭ hałoŭny dziaržaŭny inśpiektar pa pažarnym nahladzie MNS Rasii Rynat Jenikiejeŭ u intervju «Rasijskaj haziecie».
«Ja tak razumieju, što z 19 sakavika (pažar adbyŭsia 25 sakavika) jana pačała davać zboi i pasyłać iłžyvyja spracoŭvańni i jaje adklučyli, pieravioŭšy ŭ ručny režym», — skazaŭ jon.
Jenikiejeŭ rastłumačyŭ, što sistema pažarnaj biaśpieki ŭ aŭtamatyčnym režymie pavinna była mamientalna ŭklučyć sistemy dymavydaleńnia, apuścić lifty na pieršy pavierch, pieraklučyć usie eskałatary na spusk i razbłakavać dźviery evakuacyjnych vychadaŭ.
Sihnał ab pažary ŭ «Zimovaj višni» pastupiŭ achoŭniku na pult na pieršy pavierch, raspavioŭ hałoŭny dziaržaŭny inśpiektar pa pažarnym nahladzie. Paśla hetaha jon pavinien byŭ uručnuju adklučyć usio, što adklučyłasia b u aŭtamatyčnym režymie. «Ale jon hetaha nie zrabiŭ i nie apaviaściŭ MNS pra pažar», — padkreśliŭ Jenikiejeŭ i dadaŭ, što vyratavalnikam patelefanavaŭ niejki nieviadomy čałaviek.
Akramia taho, padčas pažaru ŭ handlovym centry praciahvała pracavać ahulnaja vientylacyja, što spryjała chutkamu raspaŭsiudžvańniu ahniu.
Dakładnaja karcina padziej budzie adnoŭlena paśla taho, jak udasca atrymać usiu infarmacyju z kantrolnaha prybora sihnalizacyi, rastłumačyŭ Jenikiejeŭ. Jaho rasšyfroŭkaj zajmajucca śledčyja.
Pažar u kiemieraŭskim HC «Zimovaja višnia» adbyŭsia 25 sakavika. Pa aficyjnych dadzienych, zahinuli 64 čałavieki, u tym liku 41 dzicia.
