Hienieralny dyrektar rasiejskaj «Pramysłovaj budaŭniča-mantažnaj kampanii» Kanstancin Naliŭka nabyŭ 99,7% akcyj AAT «Kvasievickaja piaro-puchovaja fabryka» za 690 tysiačaŭ rubloŭ. Infarmacyja pra heta raźmieščana na sajtach Dziaržkamiteta pa majomaści i Ivacevickaha rajvykankama.

Hramadzianin Biełarusi Naliŭka, jaki ciapier žyvie daloka ad svajoj małoj radzimy, u Narylsku, uziaŭ surjoznyja abaviazalnictvy pa raźvićci fabryki.

Na praciahu piaci hadoŭ jamu treba budzie zabiaśpiečyć temp rostu siaredniamiesiačnaj zarabotnaj płaty rabotnikaŭ hramadstva nie nižej za tempu rostu siaredniamiesiačnaj zarabotnaj płaty ŭ Ivacevickim rajonie.

Akramia hetaha, akcyjanier abaviazany zachavać kolkaść rabotnikaŭ i sacyjalnyja harantyi. U paviedamleńni Ivacevickaha rajvykankama taksama havorycca, što novamu kiraŭnictvu fabryki nieabchodna ŭnieści na praciahu piaci hadoŭ nie mienš za 100 tysiač rubloŭ na abnaŭleńnie asnoŭnych srodkaŭ i papaŭnieńnie abarotnych srodkaŭ pradpryjemstva.

Naliŭka naradziŭsia ŭ 1964 hodzie ŭ vioscy Pahorje Ivacevickaha rajona Bresckaj vobłaści. Skončyŭ Brescki budaŭničy technikum (1983), Minski ŭniviersitet kiravańnia (1998), Akademiju kiravańnia pry ŭradzie RF (2006). Šmat hadoŭ pracavaŭ pa kantrakcie za miažoj: uznačalvaŭ Hviniejskuju budaŭničuju kampaniju, udzielničaŭ u budaŭnictvie enierhietyčnych abjektaŭ u Iraku. Uznačalvaŭ Zapalarnuju budaŭničuju kampaniju (ZSK). Niadaŭna staŭ hiendyrektaram «Pramysłovaj budaŭniča-mantažnaj kampanii». Dadzienyja struktury naležać hrupie «Narylski nikiel».

Hiendyrektaram i asnoŭnym uładalnikam «Narnikiela» źjaŭlajecca Uładzimir Patanin. Ale ŭsie apošnija hady kantrol nad kampanijaj aktyŭna asprečvaje inšy aliharch Aleh Dzierypaska.

Naliŭka ŭvachodzić u śpis afilavanych asob «Narnikiela», adznačaje tut.by.

Клас
0
Панылы сорам
0
Ха-ха
0
Ого
0
Сумна
0
Абуральна
0