9 maja ŭ Słucku ŭ šaścikłaśnicy pierad śviatočnym šeściem źniali hieorhijeŭskuju stužku. Zrabiła heta mietadystka miascovaha adździeła adukacyi Alena Tamanava. Jana patłumačyła baćkam: u Biełarusi svaja ideałohija, i stužki tut inšyja.
Baćka školnicy aburany. Jon nazyvaje dziejańni mietadystki kryminalnym złačynstvam.
Alena Tamanava, u svaju čarhu, ličyć, što vybačacca joj niama za što.
Alena Tamanava
«U nas z baćkam školnicy roznyja punkty hledžańnia na adno pytańnie. Moža, chtości nie razumieje situacyju… Ja, viedajecie, nie chacieła b heta kamientavać, — kaža Tamanava. — Moža być, i varta było zrabić trochi pa- inšamu.
Ale vybačacca mnie niama za što. Baćka vykłaŭ videa ŭ internecie, heta jaho sproba spravakavać mianie na kanflikt. Spačatku kanfliktu nie było, my razyšlisia mirna. Ale paśla toj baćka vyrašyŭ źniać mianie na kamieru, kab spravakavać».
Tamanava zapeŭnivaje — stužku jana spačatku prapanavała źniać baćkam. Patłumačyła, što prachodzić akcyja.
«U nas była zadumka, što dzieci-pijaniery padtrymajuć akcyju BRSM «Kvietki vialikaj Pieramohi». Damoŭlenaść ź pijanierskaj arhanizacyjaj była mienavita takaja. Ź dziećmi prachodzili kłasnyja hadziny na hetuju temu, ale ž vy sami razumiejecie, dzieciam što prapanuješ, toje i adzienuć, asabliva nie raźbirajučysia. A baćki, atrymlivajecca, byli nie ŭ kursie hetaj akcyi».
«Ja nie chaču pamianšać asabistuju pazicyju čałavieka. Jon maje prava na svajo mierkavańnie. Ale akcyja była arhanizavana pijanierskaj arhanizacyjaj, i adździeł adukacyi jaje padtrymaŭ. I my — adździeł adukacyi — vystupili inicyjatarami praviadzieńnia mierapryjemstva. Tamu, ja liču, my pakidajem prava ŭdziełu ŭ mierapryjemstvie za saboj, — tłumačyć Tamanava. —
Sama ja staŭlusia da hieorhijeŭskich stužak stanoŭča. Ničoha suprać nie maju. Moj dzied prajšoŭ vajnu, u jaho na miedali była takaja stužka.
Uvohule, skažu tak. Hieorhijeŭskaja stužka — akcyja rasijskaha sajuza moładzi. Naša butańjerka — akcyja biełaruskaha sajuza moładzi. U Rasii musiać być svaje akcyi, u nas — svaje. My možam ich padtrymlivać, ale nie ŭščamlać svaju hodnaść».
