Letaś kampanija Google zrabiła davoli dziŭnuju reč: anansavała novuju apieracyjnuju sistemu Fuchsia OS, jakaja pa idei źjaŭlajecca kankurentam Android — samaj vialikaj mabilnaj AS, jakaja Google i naležyć.

Fuchsia moža patencyjna pracavać na luboj pryładzie, ad prostych, pryznačanych dla adnoj mety (bankamaty i pryłady GPS) ažno da piersanalnych kampjutaraŭ. Ale ŭ adroźnieńnie ad Android, Fuchsia nie zasnavana na Linux, i ŭvohule nie budujecca na lubym inšym prahramnym zabieśpiačeńni, jakoje lažyć u asnovie amal usich piersanalnych kampjutaraŭ i kamunikacyj siońnia. Naadvarot, heta sproba raspracavać AS z nula. 

Dla taho, kab zrazumieć, što ž u hetym takoha niezvyčajnaha, treba razabracca ŭ tym, što ź siabie ŭjaŭlaje bolšaja častka prahramnaha zabieśpiačeńnia piersanalnych devajsaŭ siońnia. 

Usie samyja papularnyja apieracyjnyja sistemy heta adaptacyi prahramnaha zabieśpiačeńnia «jadraŭ (kernel)», jakija kirujuć najhłybiejšymi ŭzroŭniami apieracyjnaj sistemy. Jany apracoŭvajuć zapyty ad aparatnych pryład (kłavijatury i inš.), manitorać zadačy, a taksama kirujuć fajłami i pamiaćciu. Astatnija słai AS nadbudoŭvajucca na jadro. Pry hetym, bolšaść z hetych jadraŭ davoli staryja: Android vykarystoŭvaje jadro Linux, jaki źjaviŭsia ŭ 1991 hodzie, Mac OS X, prašyŭka i inšyja płatformy Apple, zasnavanyja na Unix, jakaja ŭźnikła ŭ AT&T u Bell Labs jašče ŭ 1969 h., kamputary Windows zasnavanyja na jadry Windows NT, jakoje isnuje z 1993.

Paradaksalna, što ŭ halinie IT, jakaja ličycca ledźvie nie samaj prahresiŭnaj i inavacyjnaj zaraz, bolšaść prahramnaha zabieśpiačeńnia dahetul vykarystoŭvaje i budujecca na kodach, napisanych jašče da kanca minułaha stahodździa. Na samym prostym uzroŭni, vyličeńni zastalisia takimi samymi, i navat sučasnyja kampjutary na Windows vykarystoŭvajuć čypy, jakija źjaŭlajucca pramymi naščadkami pracesara Intel u pieršym kampjutary IBM. To-bok dahetul bolšaść IT kampanij prosta nie bačyli patreby ŭ napisańni bolš sučasnych jadraŭ, bo ŭžo isnujučyja zadavolvali ŭsie patreby sučasnych apieracyjnych sistem.

Raspracoŭka novaha jadra Magenta (na jakim budujecca Fuchsia OS) z nula moža być patłumačanaja ŭsio šyrejšym raźvićciom infrastruktury «interneta rečaŭ (The Internet of Things)» — ludzi ŭsio bolš źviazvajuć svajo bytavoje žyćcio z techničnymi pryładami, usio bolš vytvorcaŭ robiać pryłady typu «razumny dom», «razumny televizar», «razumny futbolny miač», «razumnaja paduška» i inšyja.

«Staražytnyja» jadry typu Linux pavodle mierkavańnia niekatorych daśledčykaŭ užo nie zmohuć zadavalniać usie patreby sučasnych devajsaŭ. Jany zanadta hruvastkija, nie pracujuć u režymie realnaha času i mohuć patencyjna mieć bolš prarechaŭ u sistemie biaśpieki. 

Jadro Magenta moža raspracoŭvacca jak sproba ŭziać najlepšaje ad staroha jadra Linux i niekatorych sučasnych ŭbudavalnych sistem ekspłuatacyi, što dazvoliła b vyrašyć bolšaść prablem starych jadraŭ. 

Što nakont samoj Fuchsia OS, to jana moža być i prosta ekśpierymientam na dziejazdolnaść novaha jadra. Android ciapier zajmaje kala 86% rynka mabilnych apieracyjnych sistem, i nie tak prosta raspaŭsiudzić niešta novaje na nastolki manapalizavanym rynku.

Ź inšaha boku, niadaŭna prajšła čutka pra toje, što Google zrobić płatformu Android płatnaj, što patencyjna źmienšyć jaje dolu na rynku. Heta było zroblena dla taho, kab nie pravakavać dalejšyja vialikija štrafy za karystańnie daminujučaj pazicyjaj na rynku, ale Google całkam moža vykarystać hetuju situacyju dla pašyreńnia na rynku doli novaj AS, kali zrobić jaje spadkajemcam Android i adnačasova jašče macniej pryciśnie kankurentaŭ.

U siecivie jość mnoha kanceptaŭ interfiejsu budučaj AS i navat bolš-mienš pracujučy makiet. Ale pakul što nieviadoma, jak dakładna budzie vyhladać Fuchsia, i ci budzie jana ŭvohule vykarystoŭvacca.

Клас
0
Панылы сорам
0
Ха-ха
0
Ого
0
Сумна
0
Абуральна
0