Biełastok — adzin z samych papularnych polskich haradoŭ u biełarusaŭ. Asabliva jon vabić pradprymalnikaŭ i amataraŭ sekanomić na pakupkach. Nievysokija ceny, blizkaja hieahrafija i supolnaja historyja — usio heta tryvała źviazvaje biełarusaŭ i Biełastok.

Peŭny čas hety horad byŭ častkaj našaj krainy, i ciapier amal 3% nasielnictva Biełastoka — heta biełarusy. Usiaho 54 kiłamietry ad polska-biełaruskaj miažy — i vy ŭžo ŭ Biełastoku.

Dajechać da Biełastoka možna roznymi sposabami: ź pierasadkaj u Hrodnie ci biez. Nižej jany apisanyja padrabiaźniej.

Aŭtobus Minsk — Biełastok (bieź pierasadak)

Čas: 7—8 hadzin
Cana: ad 30 rubloŭ

Mabyć, samy papularny varyjant dla tych, chto choča dajechać da Biełastoka bieź pierasadak, ale nie maje ŭłasnaha aŭto. Aŭtobusy chodziać ad Centralnaha aŭtavakzała.

Viadomy niuans miždziaržaŭnaha pierasoŭvańnia aŭtobusami — marudnaje pierasiačeńnie miežaŭ. Ale ŭ vypadku rejsavaha transpartu čas znachodžańnia pamiž dziaržavami zvyčajna skaračajecca da 1—2 hadzin.

Najtańniejšyja pramyja aŭtobusy (biez uliku siezonnych akcyj i źnižak) — heta transpart kampanii «Minsktrans». Kamfort minsktransaŭskich aŭtobusaŭ zadavalniaje nie kožnaha, zatoje za 30 rubloŭ i 7 hadzin bieź pierasadak možna dajechać ź Minska da Biełastoka. Raskład i najaŭnaść kvitkoŭ hladzicie tut.

Siarod aŭtobusaŭ bolš vysokaha kłasu samyja papularnyja pradstaŭleny kampanijaj Ecolines. Cana poŭnaha darosłaha kvitok składaje 40 rubloŭ. Ale kali budziecie karystacca pasłuhami «Ekałajns», varta papiarednie aznajomicca z prahramaj łajalnaści kampanii: ź joj možna aščadžać da 50% koštu kvitka.

Taksama pieravozkami ŭ Biełastok zajmajucca kampanii Busfor, Intercars i inšyja. Ich bilety možna kupić jak u ofisach, tak i ŭ internecie.

Ciahnik Minsk — Biełastok (ź pierasadkaj u Hrodnie)

Čas: ad 6 hadzin u darozie + čas na pierasadku
Cana: ad 25 rubloŭ

Varyjant dabracca ciahnikami pryvablivaje tym, što nie treba doŭha stajać u čarzie na miažy. Taksama ciahniki admietnyja svajoj zručnaściu. Zvyčajna tam byvaje šmat miesca dla noh, a taksama razietki, kab zaradzić noŭtbuk ci mabilnik.

Da Horadni ź Minska ciahniki jeździać piać razoŭ na sutki. Siadziačaje miesca kaštuje 6 rubloŭ 24 kapiejki. Kali vy amatar zručniejšych umoŭ, možacie ŭziać bilet u kupe ci płackartu. Raskład ciahnikoŭ Minsk — Hrodna možna pahladzieć tut.

Padbirać ciahnik da Hrodna varta z ulikam taho, kab było zručna pierasieści na adziny na dzień ciahnik da Biełastoka. Jon adpraŭlajecca a 15:31 z Hrodna i prybyvaje a 17:16 pa miascovym časie. Kaštuje z taryfnymi zborami kala 18 rubloŭ.

Ciahnik i aŭtobus (ź pierasadkaj u Hrodnie)

Čas: ad 7 hadzin u darozie + čas na pierasadku
Cana: ad 20 rubloŭ

Z Hrodna da Biełastoka kursuje šmat aŭtobusaŭ i maršrutak. Amal usie jany iduć ranicaj, tamu, kab pajechać hetym šlacham, najlepš dabiracca sa stalicy da Hrodna načnym ciahnikom. Kaštujuć maršrutki ad 14 rubloŭ, ale jość i kudy daražejšyja varyjanty. Pahladzieć ich možna na sajcie hrodzienskaha aŭtavakzała ci na staronkach pryvatnych pieravozčykaŭ, naprykład, Busfor, «Favaryt» i h.d.

polsha24.com

polsha24.com

Jak dabracca ŭ Biełastok aŭtamabilem

Čas: ad 5 hadzin
Cana: 30 jeŭra na strachoŭku + paliva

Ščaślivyja ŭładalniki ŭłasnych aŭto, naturalna, mohuć pajechać u Biełastok svaim transpartam. Tolki chočacca papiaredzić, kab achvočyja ŭvažliva praviarali sajt Dziaržpahrankamiteta, a to zaŭždy jość imaviernaść pałovu dnia prastajać na miažy ŭ zatorach. Ci nie ŭ kožnaha jość znajomyja, jakija mohuć raspavieści padobnyja historyi.

Najbližejšyja pamiežnyja pierachody dla biełarusaŭ — Bruzhi (ź Minska ci Hrodna) abo Bierastavica (ź Minska), ale na ich časta vialikija čerhi. Tamu mnohija biełarusy praktykujuć pierajezd praź biełaruska-litoŭski pamiežny punkt Pryvałka, dzie niama čerhaŭ. Ale ŭ apošnim vypadku daviadziecca namatać kala 70 kiłamietraŭ źvierchu.

Kali jedzieš za miažu mašynaj, to, aproč miedyčnaj strachoŭki, nie zabudźciesia aformić «Zialonuju kartu». Heta admysłovaja mižnarodnaja strachoŭka hramadzianskaj adkaznaści dla aŭtamabilistaŭ, jakija jeduć za miažu na svajoj mašynie. Kaštuje takaja pasłuha jak minimum 30 jeŭra, kali afarmlać jaje na 15 dzion. Adpaviedna, kali brać bolšy termin, to i płacić daviadziecca bolš.

BlaBlaCar Minsk — Biełastok

Čas: ad 5 hadzin
Cana: jak pašancuje

Sajt BlaBlaCar isnuje dla ludziej, jakija šukajuć spadarožnikaŭ sabie ŭ darohu. Naprykład, Vasil ź Sierabranki jedzie ŭ Biełastok na svaim aŭto, maje dva volnyja miescy i hatovy na ich ŭziać z saboj pasažyraŭ. Dla hetaha jon raźmiaščaje abviestku na sajcie, a achvotnyja ŭ toj samy čas nakiravacca ŭ Polšču znachodziać abjavu i źviazvajucca z kiroŭcam. Ułaśnik aŭto sam vystaŭlaje canu, za jakuju hatovy pieravieźci spadarožnika z punkta A ŭ punkt B. Možna damovicca i na mienšuju canu, kali kiroŭca budzie da vas prychilnym. Z canoj na BlaBlaCar uhadać niemahčyma, prosta sačycie za sajtam, kab nie prapuścić samuju vyhadnuju prapanovu.

Aŭtaspyn ź Minska ŭ Biełastok

Čas: ad 5 hadzin i bolej
Cana: biaspłatna abo jak pašancuje

Dla samych adčajnych ci biezhrašovych, viadoma, isnuje aŭtaspyn. Aŭtaspyn da Biełastoka, jak i da luboha inšaha horada, nie maje nijakich harantyj. I prachodzić vyklučna na strach i ryzyku tych, chto «stopić» (dy i chto spyniajecca, naturalna). Mahčyma, mašynu atrymajecca złavić adrazu, a, moža, daviadziecca prastajać pałovu dnia na soncy ci daždžy. Zrešty, zvyčajna aŭtaspynščyki razumiejuć na što iduć, tamu jany nie schilnyja narakać na pieraškody. Bo jakraz u takim baŭleńni času adčuvajuć kajf ad vandroŭki. Kab pačać stopić mašyny na Biełastok, vam treba vyjechać na hrodzienskuju trasu, jakaja pačynajecca adrazu za Kamiennaj Horkaj.

Karysnyja rekamiendacyi

  • Pierad pakupkaj biletaŭ na ciahnik ci aŭtobus zaŭždy cikaŭciesia, jakija jość źnižki pa ŭzroście, sacyjalnym stanoviščy i hetak dalej. Sami pradaŭcy ich nie zaŭždy prapanoŭvajuć.
  • Udakładniajcie asobna ŭ kožnaha pieravozčyka, ci praduhledžanyja pa maršrucie prypynki dla afarmleńnia Tax Free (kali budziecie brać zvarotny kvitok i majecie ŭ hetym patrebu).
  • Pierad pajezdkami ŭ tyja ci inšyja miescy zahružajcie afłajn-mapy ŭ dadatku MapsMe: heta dapamoža vam nie zhubicca ŭ novym horadzie biez padłučeńnia da internetu.

Dobraj vandroŭki vam u Biełastok i pryjemnych pakupak!

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?