Asnoŭny kandydat pa pasadu pasła Rasii ŭ Biełarusi — Michaił Babič. Jak śćviardžajuć rasijskija miedyi sa spasyłkaj na kułuarnyja razmovy, jon moža atrymać jašče i status asablivaha pradstaŭnika prezidenta Uładzimira Pucina.

Čytajcie: Krynica ŭ Kramli: Babiču prapanavali pasadu śpiecpradstaŭnika Pucina ŭ Biełarusi

Čytajcie: Kandydat u pasły Rasii ŭ Biełarusi prasłaviŭsia jak «smatraščy FSB»

Ad takoha pasła-śpiecsłužbista admoviłasia ŭ 2016-m hodzie Ukraina. 

Ci moža Biełaruś dazvolić sabie toje ž samaje i što ŭvohule dumajuć pra Babiča ŭ vysokich kabinietach? 

«Naša Niva» raspytała pra heta ŭ ludziej, nabližanych da ŭłady. 

«Kali ty zvyčajny pasoł, to dla pryniaćcia rašeńniaŭ ty idzieš pa linii: pasolstva — MZS — urad — Administracyja.

Asablivy status aznačaje, što dla pryniaćcia rašeńniaŭ pa Biełarusi Babič budzie dziejničać naŭprost z orhanami ŭłady Rasii. Kali ty pradstaŭlaješ prezidenta, to možaš spakojna patelefanavać adrazu Šajhu, lubomu hubiernataru, kiraŭniku Raśsielhasnahlada, umoŭna, i hetak dalej. U adnych rukach akazvajecca vielmi šmat nitak i administracyjnaj ułady.

Z ulikam i biez taho prazrystych miežaŭ miž Biełaruśsiu i Rasijaj — heta faktyčna hienierał-hubiernatarstva ci vielmi blizka da taho.

Nie pryniać jaho farmalna možna, tak užo było raniej, ale ciapier situacyja trochi inšaja. Uličvajučy našu «braterskuju luboŭ», heta jak žonku vystavić za dźviery.

I taksama važny momant — Rasija imkniecca pastavić u Biełarusi mocnuju fihuru. Spačatku razhladali Surkova ź jaho suviaziami, Tkačova. Ciapier — Babiča. Zadača ruskich — nie pastavić druhoha Zurabava, jaki ŭ ich ujaŭleńni pras**aŭ Ukrainu», — skazała nam adna krynica. 

«Kali Babiču nadaduć śpiecstatus, to heta stanie śviedčańniem asablivaj uvahi da pracesaŭ u Biełarusi: heta i žadańnie mieć bolšy ŭpłyŭ na toje, što ŭ nas adbyvajecca, u intaresach rasijskaha boku, — vykazaŭsia druhi čałaviek. — Z ulikam hieapalityčnaj situacyi u rehijonie heta śviedčyć, u svaju čarhu, što namier i žadańnie kanviertujucca ŭ realizacyju taho kantrolu i ŭpłyvu.

I niepaźbiežna viadzie da aktyvizacyi tych prarasijskich sił u našaj krainie, jakija niepryjazna staviacca da biełaruskaj niezaležnasci.

Heta, u svaju čarhu, viało b da aktyvizacyi palityčnych płyniaŭ u samoj krainie i mižnarodnych upłyvaŭ na ŭnutranuju situacyju. I usio heta mahło b skłascisia u sinierhietyčny efiekt, niebiaśpiečny dla našaj stabilnasci i niezaležnasci», — padsumavaŭ druhi ekśpiert, blizki da ŭładnych kołaŭ. 

«Ruskija ŭžo na nizkim starcie — jany pravodziać suprać nas infarmacyjnyja apieracyi (kštałtu kačak pra insult Łukašenki, ale heta tolki adna ŭ cełaj čaradzie) i svatajuć pasłom čałavieka, jaki spryčyniŭsia da razhromu nacyjanalnych elit i movy ŭ Tatarstanie. Viadoma, kali my nie prymiem hetaha čałavieka, to buduć niejkija kułuarnyja sankcyi, jakija vylijucca ŭ toje, što biudžet zhubić hrošy, — skazaŭ jašče adzin surazmoŭca «Našaj Nivy». —

Možna śviadoma pajści na rašučy krok i admović, ale možna pajści inšaj darohaj — pryniać, ale biez asablivaha statusu, i abłaščyć, pasprabavać zrabić kantralavanym.

Ale ŭ lubym razie rašeńnie tut za Łukašenkam, tolki jon moža jaho pryniać, mierkavańnie MZS maje kansultatyŭnuju rolu», — skazaŭ supracoŭnik adnaho ź viedamstvaŭ. 

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?