U žniŭni minułaha hoda siarod majomaści pamierłaj pary z Aryzony znajšłasia vykradzienaja 31 hod tamu karcina Vilema de Kuninha koštam pad 100 młn dalaraŭ. Palicyja da siońniašniaha dnia nie mieła viersij z nahody złodziejaŭ. Ale, padobna, usio kaža pra toje, što karcinu skrali sami ŭłaśniki doma, piša bbc.com.

Dzień padziaki 22 listapada 1985 hoda para Alteraŭ praviała ŭ Tusonie, štat Aryzona. A na nastupny dzień ź miascovaha muzieja mastactvaŭ Univiersiteta Aryzony dvoje skrali karcinu «Žančyna - Ochra» de Kuninha.

Pa słovach achoŭnika, pakul žančyna ź im razmaŭlała, mužčyna prajšoŭ na druhi pavierch muzieja, vyrazaŭ karcinu z ramy i skruciŭšy jaje, schavaŭ pad palito. Znajści vykradalnikaŭ palicyi nie ŭdałosia - u muziei tady nie było kamier, a adbitkaŭ palcaŭ nie zastałosia.

Adzinaja začepka, jakaja była ŭ palicyi - chtości bačyŭ, što złodziei źjechali na čyrvonaj mašynie.

Jak vyjavili karcinu

Džery i Ryta Alter viali nieprykmietnaje žyćcio ŭ vioscy Klif štata Ńju-Mieksika, kudy pierajechali na piensiju ź Ńju-Jorka ŭ kancy 1970-ch. Jon byŭ nastaŭnikam muzyki i pisaŭ knihi pra padarožžy, a jana była łahapiedam.

Rytu byłyja kalehi ŭspaminali jak miłuju i cichuju žančynu. Altery pražyli ŭ vioscy z nasielnictvam 293 čałavieki ŭsiu reštu žyćcia. Jany pracavali ŭ škołach, lubili vandravać i naviedali 140 krain i siem kantynientaŭ. U ich zachavalisia dziasiatki tysiač fatahrafij.

Džery pamior u 2012-m, Ryta pieražyła jaho na piać hadoŭ. Letaś, paśla jaje śmierci, plamieńnik pačaŭ zajmacca prodažam majomaści i nieruchomaści. Jon zaprasiŭ ekśpierta pa antykvaryjatu dla acenki majomaści.

Uvieś skarb Alteraŭ u vyniku pradali za dźvie tysiačy dalaraŭ i vystavili ŭ antykvarnaj kramie. Karcinu de Kuninha ŭ kramie paznali adrazu niekalki pakupnikoŭ zapar. Tady supracoŭniki schavali karcinu ŭ prybiralni i pačali «huhlić» jaje.

Tak jany daviedalisia, što ŭ ich apynuŭsia tvor mastactva koštam bolš za 100 miljonaŭ dalaraŭ. Adzin z supracoŭnikaŭ patelefanavaŭ u muziej…

Novaje rasśledavańnie pa spravie ab kradziažy karciny doŭžycca ŭžo hod, i viadzie jaho FBR. Biuro admoviłasia kamientavać spravu da taho času, pakul jana nie budzie zakrytaja.

Jakija dokazy pakazvajuć na Alteraŭ?

Ich svajaki ničoha nie viedali pra heta. Adnak usie łancužki, daśledavanyja ŚMI za hety hod, viali da Alteraŭ. Da taho ž dniami znajšłosia fota pary z taho samaha Dnia padziaki - svajaki padali jaho vydańniu Arizona Republic. Na fota Džery i Ryta siadziać za stałom, uśmichajučysia ŭ kamieru. Na Džery akulary - dakładna jak i ŭ fatarobata złačyncy. Na Rycie niama akularaŭ, ale abrysy jaje tvaru supadajuć z fatarobatam.

Niekalki čałaviek skazali New York Times, što Altery jeździli na čyrvonaj spartovaj mašynie, padobnaj na tuju, jakuju zaŭvažyli ŭ dzień złačynstva.

U dziońniku 1985 hoda, kudy Altery karpatliva zapisvali, što jaduć, kudy chodziać i jakija leki prymajuć, staronka Dnia padziaki 1985 hoda zastałasia pustoj.

Pavodle Sun News, na rachunkach pary paśla śmierci vyjaviłasia bolš za miljon dołaraŭ.

Ludzi, jakija viedali paru, sychodziacca ŭ mierkavańni, što ich składana było zapadozryć.

Клас
Панылы сорам
Ха-ха
Ого
Сумна
Абуральна