U vioscy Babrovičy, što ŭ Ivacevickim rajonie, miascovy 57-hadovy žychar Siarhiej Dz. zakryŭsia ŭ svaim domie sa strelbaj. Mužčyna paraniŭ adnaho milicyjanta, druhoha — zabiŭ. Urešcie Śledčy kamitet paviedamiŭ, što viaskoviec abiasškodžany i zatrymany.

fota Radyjo Svaboda

fota Radyjo Svaboda

Jak paviedamlaje bresckaja milicyja, kala 12:00 padčas mierapryjemstvaŭ pa praviercy zakonnaści zachoŭvańnia zbroi ŭ nasielnictva supracoŭniki Ivacevickaha RAUS pravodzili rejd u vioscy Babrovičy.

«Pry padychodzie da doma miascovaha žychara 1961 hoda naradžeńnia, u jakoha, pa infarmacyi pravaachoŭnikaŭ, mahła miecca niezarehistravanaja palaŭničaja strelba, apošni raptam adkryŭ ahoń na paražeńnie pa milicyjantach», — adznačajecca ŭ pres-relizie abłasnoj milicyi.

«U adnym z dvaroŭ vioski Babrovičy byŭ zabity 42-hadovy ŭčastkovy inśpiektar milicyi, jašče adzin, 23-hadovy, — paranieny i špitalizavany», — paviedamiŭ Śledčy kamitet.

Što padšturchnuła Siarhieja Dz. na stralaninu buduć vyśviatlać śledčyja.

«Ale jon nie piŭ. Dziŭnavaty byŭ mužyk, było trochi zaŭvažna pa im, što nie ŭsio ŭ paradku. Ź niekatorymi adnaviaskoŭcami nie razmaŭlaŭ uvohule. Čamuści jedziŭ u kramu tolki ŭ susiednija vioski ci ŭ Cielachany, u babrovickuju kramu čamuści nie chadziŭ… Ale vidavočnych prablem ź psichikaj ci dyjahnazu nie mieŭ. Žyŭ adzin. Spačatku dahladaŭ maci, atrymlivaŭ za heta hrašovuju dapamohu. Ale paśla maci zabrali siostry ŭ Ivacevičy. Siarhiej zastaŭsia ŭ vioscy. Nidzie nie pracavaŭ. Žyŭ za hrošy, jakija davali svajaki, siamja ŭ ich vialikaja, niekalki bratoŭ, niekalki siaścior», - raspavioŭ «Našaj Nivie» znajomy ź Siarhiejem Dz. viaskoviec.

Zahinuły ŭčastkovy — Ihar Łukaševič. U jaho zastałasia žonka i niepaŭnaletni syn.

«Babrovičy byli navat nie jaho ŭčastkam. U nas ciapier niama ŭčastkovaha, i voś Łukaševič vykonvaŭ abaviazki», - kažuć u vioscy.

Druhi inśpiektar, Dzianis Sahanovič, u balnicy, jamu robiać apieracyju. Niekalki drabinaŭ znachodziacca ŭ ciele milicyjanta, adna paškodziła straŭnik.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?