U redakcyju Tut.by źviarnuŭsia minčuk Dzianis Jaromienak. Uletku jaho mama ź ciotkaj vyrašyli adpačyć u Bałharyi. Kupili tur u kampanii «Dva soncy» i 3 žniŭnia palacieli. Zasialilisia ŭ hatel. A ŭ piatnicu, 17 žniŭnia, kali žančyny chacieli vysielicca, daviedalisia: pražyvańnie ŭ ich nie apłačana. Turysty aburylisia, administratar vyklikała palicyju. U turfirmie tłumačać: usim zajmaŭsia dyrektar, a jon nie vychodzić na suviaź.

— Jany mnie napisali, što pryjechała palicyja, — raspaviadaje Dzianis i tłumačyć: u tur mama ź ciotkaj pajechali ŭ kampanii rodnych i siabroŭ, usiaho vosiem čałaviek. Dvoje ź ich dzieci.

— Siońnia sabrali torby, vynieśli na resepšen, źviartajecca administratar i prosta za ruki ich chapaje i nie vypuskaje. Vy, kaža, nie zapłacili za pražyvańnie. Jany: «Jak nie zapłacili?» Im pakazvajuć rachunki — sapraŭdy, raźliku niama.

U rospačy žančyny patelefanavali Dzianisu, a jon — u kampaniju «Dva soncy».

— Ja nabiraju, zdymaje dziaŭčyna, kaža, što ŭsim asabista zajmaŭsia dyrektar i tolki jon vałodaje infarmacyjaj, — kaža surazmoŭca. — Ale dyrektar nibyta vyklučyŭ telefon i ŭžo niekalki dzion nie vychodzić na suviaź. Bolš za toje, nakolki ja razumieju, i kvitki na siońniašni zvarotny rejs našym jon taksama nie zabraniravaŭ.

Pavodle słoŭ svajaka, u turahienctvie jamu paviedamili: mieniedžar sprabuje znajści turystam zvarotnyja kvitki. Papiarednie dadomu jany viernucca nie raniej za 20 žniŭnia.

U kampanii «Dva soncy» kažuć, što sprabujuć dapamahčy turystam. Situacyju z palicyjaj vyrašyli, za čas, jaki biełarusy ŭžo praviali ŭ hateli, zapłacili. Patłumačyć, jak uźnikła takaja situacyja, nie mohuć: «Usimi apłatami zajmajecca dyrektar», u mieniedžaraŭ da hetaha dostupu niama.

— Dyrektar naš na suviaź nie vychodzić […], — raspaviadajuć u turfirmie.

Ci daŭno jon źnik, nie viedajuć.

Pakul rychtavaŭsia materyjał, z TUT.BY znoŭ źviazaŭsia Dzianis. Raspaviadaje, što jamu tolki što telefanavali rodnyja z Bałharyi. Pavodle jaho słoŭ, za numar u hateli kampanija «Dva soncy» zapłaciła tolki častku hrošaj. Raźliku za siońniašniuju i nastupnyja nočy da hetaha času niama.

Клас
0
Панылы сорам
0
Ха-ха
0
Ого
0
Сумна
0
Абуральна
0