Viełasipiedny «Hran-pry Minska», jaki prajšoŭ u niadzielu, atrymaŭ ahałosku ŭ suśvietnych ŚMI praź dziŭny finiš, piša TUT.BY.
Palak Marek Rutkievič («Vibatek»), jaki lidziravaŭ ź vialikaj pieravahaj, za kiłamietr da kanca honki rezka zapavoliŭsia, pačaŭ aziracca, a potym i zusim pierastaŭ piedaliravać, dačakaŭšysia biełarusa Mikałaja Šumava («Minsk»). Paśla hetaha Rutkievič dadaŭ chutkaść i, nie zdajučy źmienu, davioz Šumava da finišu, nie staŭšy pry hetym zmahacca za pieramohu.
Na kanale viełakłuba «Minsk» u YouTube išła žyvaja videatranślacyja honki, tamu śviedkami padziej stali žurnalisty ŭ mnohich krainach śvietu. Ab dziŭnym finišy napisali viadučyja viełasipiednyja sajty Italii (Cicloweb) i Rasii (Gruppetto), samy papularny partał viełasipiednaj statystyki (ProCyclingStats). A viadomy niamiecki resurs Radsport-News zrabiŭ zdahadku pra podkup Rutkieviča.
Na partale Rowery.org vyjšaŭ materyjał ab honcy z kamientarami polskaha honščyka. Jon abvierh mierkavańni ab podkupie, ale pryznaŭsia, što addaŭ pieramohu Mikałaju Šumavu.
«U minułyja vychodnyja my musili startavać u Polščy na honcy Ministerstva abarony, ale jaje admianili. Takim čynam, za tydzień da važnych startaŭ my zastalisia biez spabornictvaŭ. Tady honščyk «Minska» Branisłaŭ Samojłaŭ prapanavaŭ nam startavać u biełaruskaj stalicy. My vyrašyli adździačyć minčanam. U pieršy dzień vyjhraŭ Maciej Paterski, a Samojłaŭ finišavaŭ druhim, u niadzielu ž vyrašyli zrabić naadvarot. Ja skinuŭ chutkaść, kali ŭbačyŭ, što z adryvu atakavaŭ Mikałaj Šumaŭ, ale heta nie było podkupam — prosta dapamahli haspadaram», — skazaŭ Rutkievič.
Adznačajecca, što heta nie pieršy padobny vypadak u historyi viełasportu, ale pry hetym honščykam byŭ parušany rehłamient Mižnarodnaj fiederacyi viełasportu, jaki abaviazvaje dyskvalifikavać spartsmiena i aštrafavać jaho na 200 šviejcarskich frankaŭ za admovu ad spartyŭnaj baraćby.
