Uviadzieńnie ŭ Biełarusi bijamietryčnych dakumientaŭ pieraniesiena na 2020 hod z-za intehracyi infarmacyjnych sistem. Pra heta paviedamlaje «SB. Biełaruś siehodnia» sa spasyłkaj na namieśnika načalnika ŭpraŭleńnia pa hramadzianstvie, pašpartnaj pracy i vyjeździe za miažu Departamienta pa hramadzianstvie i mihracyi MUS Paŭła Chryščanoviča.
Miarkujecca, što pieršyja dakumienty novaha ŭzoru — ID-karty i bijamietryčnyja pašparty — možna budzie atrymać 1 studzienia 2020 hoda, a nie 2019-ha, jak płanavałasia raniej. Pavodle Paŭła Chryščanoviča, z boku MUS usio hatova da pačatku vypusku dakumientaŭ. «Da kanca hoda da nas pastupić zakuplenaje abstalavańnie, i tearetyčna my mahli b zapuścić praces vytvorčaści ID-kart i bijamietryčnych pašpartoŭ užo z pačatku nastupnaha hoda. Adnak my bačym, što ŭ hetym pakul niama sensu, bo, pa sutnaści, heta budzie tolki hoły płastyk», — adznačyŭ pravaachoŭnik.
Kab ŭvieści ŭ abaračeńnie ID-karty, nieabchodna złučyć pamiž saboj usie infarmacyjnyja sistemy, da jakich budzie mieć dostup hramadzianin. Siońnia ŭsie hetyja bazy dadzienych pracujuć na roznych płatformach.
ID-karta zamienić niekatoryja funkcyi siońniašniaha pašparta i budzie adzinym dakumientam, jaki paćviardžaje asobu. Novy bijamietryčny pašpart budzie dakumientam tolki dla vyjezdu za miažu. Na terytoryi Biełarusi jon jurydyčnaj siły mieć nie budzie — heta rola piarojdzie da identyfikacyjnaj karty, dadaje BiełTA.
Taksama novymi bijamietryčnymi dakumientami budzie zamieniena ŭsia liniejka dakumientaŭ, jakija dziejničajuć u Biełarusi.
Heta słužbovy i dypłamatyčny pašparty, prajazny dakumient biežanca i prajazny dakumient asoby biez hramadzianstva. ID-karty buduć vydavacca, akramia hramadzian Biełarusi, zamiežnikam i asobam biez hramadzianstva, jakija pastajanna pražyvajuć u Biełarusi.
Pašpart i ID-karta buduć vydavacca ŭ abaviazkovym paradku z 14 hadoŭ.
Ale karta moža vydavacca i pa žadańni zakonnych pradstaŭnikoŭ niepaŭnaletniaha z momantu jaho naradžeńnia. Taksama ŭ ID-karcie budzie pryviazka da rehistracyi, u pašparcie ž jana budzie adsutničać. Heta značyć štampaŭ ab prapiscy ŭ pašpartach bolš nie budzie, u elektronnym vyhladzie takija dadzienyja buduć utrymlivacca na karcie. I nijakich adznak, akramia viz, u novych pašpartach nie praduhledžana.
Košt ID-karty składzie 1 bazavuju vieličyniu (siońnia 24,5 rubla). Pašpart budzie kaštavać 3 bazavyja.
