Dva prysudy za supraciŭ supracoŭnikam milicyi byli vyniesienyja z roźnicaj u dva tydni ŭ Baranavičach. U pieršym vypadku mužčyna prosta vyryvaŭsia, bo nie chacieŭ, kab učastkovy skłaŭ na jaho pratakoł. U druhim chłopiec złamaŭ milicyjantu skivicu, paviedamlaje Intex-press.by
Na sudzie abvinavačany nie staŭ admaŭlać svaju vinu. Skazaŭ, što ŭdaryŭ milicyjaniera, tamu što byŭ mocna pjany i «u pryncypie drenna stavicca da milicyi».
Pieršym pad sud trapiŭ raniej nie sudzimy 57-hadovy žychar Baranavickaha rajona. U kancy krasavika jon vypivaŭ kala Doma kultury ŭ ahraharadku, dzie žyvie. Za hetym zaniatkam jaho zachapiŭ miascovy ŭčastkovy. Milicyjanier prapanavaŭ hramadzianinu prajści ŭ jaho słužbovuju mašynu dla składańnia pratakołu.
— Mužčyna staŭ supraciŭlacca, chapać ŭčastkovaha za vopratku. Milicyjanier sprabavaŭ ucichamiryć parušalnika, — paviedamiła Śviatłana Pasiemka, staršy pamočnik Baranavickaha mižrajonnaha prakurora. U vyniku ŭčastkovy atrymaŭ niaznačnyja cialesnyja paškodžańni ŭ vyhladzie ranak. U dačynieńni da viaskoŭca raspačali kryminalnuju spravu.
Na sudzie abvinavačvany svaju vinu pryznaŭ. Skazaŭ, što supraciŭlaŭsia, tamu što byŭ pjany. Nie chacieŭ, kab jaho aštrafavali. Sud prysudziŭ jaho da šaści miesiacaŭ aryštu ŭmoŭna. Abaviazaŭ vypłacić 735 rubloŭ «kryminalna-pravavoj kampiensacyi» ŭ dachod dziaržavy.
U druhim vypadku supracoŭniku milicyi pryjšłosia źviartacca pa miedycynskuju dapamohu. U pačatku sakavika hetaha hoda milicyjanier-kiroŭca ŭ składzie opierhruppy prybyŭ na vyklik da adnaho z baraŭ u centry horada. Naviedvalnica paskardziłasia, što jaje źbili. Kali padjechali da bara, učastkovy pajšoŭ razmaŭlać z paciarpiełaj, a kiroŭca stajaŭ la mašyny. Raptam da jaho padbieh nieznajomy chłopiec, z usich sił ŭdaryŭ kułakom u tvar. Potym kinuŭsia biehčy.
— Milicyjant, niahledziačy na rezki bol i kroŭ, jakija linuli z nosa i huby, kinuŭsia za złamyśnikam, — raspaviała Śviatłana Pasiemka.
Uciakajučy, chulihan spatyknuŭsia i ŭpaŭ. A kali supracoŭnik milicyi nachiliŭsia, kab dapamahčy jamu padniacca, to atrymaŭ druhi ŭdar pa tvary.
Złamyśnika — im apynuŭsia 21-hadovy čatyry razy sudzimy haradžanin — zatrymali na šlachu dadomu. U taksi jon spaŭ na zadnim siadzieńni. Milicyjanier ź pierałomam skivicy trapiŭ u balnicu.
Na sudzie abvinavačany nie staŭ admaŭlać svaju vinu. Skazaŭ, što ŭdaryŭ milicyjaniera, tamu što byŭ mocna pjany i «u pryncypie drenna stavicca da milicyi». Sud pryznaŭ chłopca vinavatym i prysudziŭ da hoda pazbaŭleńnia voli z adbyvańniem pakarańnia ŭ kałonii va ŭmovach strohaha režymu.
