Kijosk u Hrodnie, newgrodno.by

Kijosk u Hrodnie, newgrodno.by

Kampanija «Enierha-Oił», padkantrolnaja biznesmenu Alaksieju Aleksinu, stvoryć ciaham dvuch hadoŭ u Biełarusi amal 2500 handlovych punktaŭ pa prodažy cyharet, u tym liku kala 500 u Minsku. Pra heta TUT.BY raspaviali infarmavanyja krynicy.

Punkty prodažaŭ — kijoski, kramy, paviljony — źjaviacca ŭ suviazi z realizacyjaj «Enierha-Oiłam» inviestprajekta pa stvareńni niedziaržaŭnaj sietki pa handli tytuniovymi vyrabami, skazaŭ surazmoŭca, znajomy z pracesam.

Dla hetaha, jak kaža krynica, miascovyja vykankamy pavinny biez aŭkcyjonu pradastavić u arendu inviestaru ziamielnyja ŭčastki dla budaŭnictva i absłuhoŭvańnia handlovych abjektaŭ. Heta buduć kijoski, kramy, paviljony i nieizalavanyja punkty, u jakich nie mienš za 80% tavaru — tytuniovyja vyraby.

Pamiery i miesca hetych ziamielnych učastkaŭ vyznačajucca inviestaram pa ŭzhadnieńni ź miascovymi ŭładami.

Pa słovach surazmoŭcy, da kanca 2018 hoda «Enierha-Oiłu» pavinna naležać amal tysiača ziamielnych učastkaŭ va ŭsich abłaściach, kala 190 ź jakich — u Minsku. Da kanca 2019 hoda ich kolkaść pavinna ŭzraści da prykładna 2500, uklučajučy amal 500 u stalicy.

A heta moža značyć, što na vulicach Minska ciapier buduć nie tolki kijoski «Biełsajuzdruku» i «Minsktransa», ale i tytuniovyja. 

Ale havorka nie zaŭsiody budzie iści ab stvareńni novych punktaŭ prodažaŭ, pakolki ŭ arendu «Enierha-Oiłu» pierajšli ŭsie kijoski «Tytuń» Hrodzienskaj tytuniovaj fabryki «Nioman». Ab pieradačy abjektaŭ inšaj kampanii partału Newgrodno.by raspaviadaŭ dyrektar UP «Tytuń» Alaksandr Mielničak.

Pa stanie na kastryčnik 2017 hoda HTF naležała 585 handlova-modulnych punktaŭ, a minułaj vosieńniu «Nioman» abviaściŭ tendar na kuplu jašče 80 kijoskaŭ na sumu za 1,1 młn rubloŭ.

Što jašče budzie rabić kampanija Aleksina

Raniej paviedamlałasia, što «Enierha-Oił» taksama inviestuje ŭ prajekt 122 miljony rubloŭ i pavialičyć mahutnaści Hrodzienskaj tytuniovaj fabryki. U pryvatnaści, kampanija pastavić na «Nioman» jašče dźvie linii — kožnaja koštam pa 10 miljonaŭ dalaraŭ.

Akramia taho, «Enierha-Oił» raźvivaje tytuniovuju vytvorčaść u Šabanach. Dla hetaha ŭkazam prezidenta źmienieny miežy Minska. Mierkavany abjom inviestycyj składzie kala 100 miljonaŭ rubloŭ. Budzie stvorana kala 200 pracoŭnych miescaŭ.

A niadaŭna «Enierha-Oił» stała druhim imparcioram cyharet (L&M, Parliament, Marlboro) u Biełaruś. Raniej tolki «Biełaruśhandal» Kiraŭnictva spravami prezidenta Biełarusi mieŭ prava ŭvozić u krainu cyharety.

Dla čaho heta ŭsio treba

Były vice-premjer Michaił Rusy tłumačyŭ, što ŭ apošni čas za miažoj značna ŭzros popyt na pradukcyju biełaruskaj tytuniovaj haliny. Vytvorčaść zadziejničana ŭ kruhłasutačnym režymie, ale pastavić na ekspart patrabavany abjom cyharet, nie ahaliŭšy ŭnutrany rynak, niemahčyma.

— Jość vialikija nišy, navat u Jeŭrapiejskim sajuzie. Jany nam vyhadnyja. Čamu my nie chočam ich zapaŭniać? Havorka idzie pra adnu sa značnych krynic papaŭnieńnia biudžetu. Tamu kali jość popyt, treba pradavać tytuniovyja vyraby. Nie pradadzim my, pradaduć inšyja. Rynki buduć zaniatyja, — kazaŭ u svaju čarhu Alaksandr Łukašenka.

Chto taki Alaksiej Aleksin

Aleksin — były hałoŭny śpiecyjalist departamienta enierharesursaŭ i naftapraduktaŭ kampanii «Biełźniešhandljinviest», jakaja ŭvachodziła ŭ skład Kiraŭnictva spravami prezidenta Biełarusi. Biznesmen raniej byŭ taksama partnioram Juryja Čyža.

Adnak u 2012 hodzie ich šlachi razyšlisia. Zaraz intaresy pradprymalnika skancentravany na handli naftapraduktami, bankaŭskaj śfiery (MTBank), vytvorčaści miasnych vyrabaŭ («Viales-Mit»), deviełapmiencie i łahistycy («Bremino-Hrup»), a taksama restarannym biznesie («Staroje rusła»).

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?