Japonskija psichijatry apisali niejmavierny vypadak: pacyjenta z šyzafrenijaj udałosia vylečyć całkam vypadkova — šlacham pierasadki kaściavoha mozha.
Zrešty, paśla taho, jak jany apublikavali hetuju historyju ŭ navukovym časopisie Frontiers in Psychiatry, vyśvietliłasia, što heta daloka nie adziny taki vypadak.
Aŭtaram artykuła stali dasyłać listy z apisańniem padobnych historyj cudoŭnaha vylačeńnia, kali pacyjentaŭ atrymlivałasia vypadkova vylečyć ad dušeŭnaj chvaroby — paralelna ź lačeńniem asnoŭnaha zachvorvańnia.
I ciapier, praz hod, navukoŭcy, zdajecca, zrazumieli, jak heta adbyvajecca.
Psichijatr Cujosi Mijaoka dyjahnastavaŭ u pacyjenta N. paranaidalnuju šyzafreniju i prapisaŭ jamu kurs niejraleptykaŭ. Adnak leki nie dapamahali — rasstrojstva akazałasia ustojlivym da miedykamientaŭ.
Praz hod stan pacyjenta pahoršyŭsia. Čarhovaje abśledavańnie pakazała, što ŭ N. vostry lejkoz — adna z raznavidnaściej raka kryvi. Kab vyratavać jamu žyćcio, była nieabchodnaja pierasadka kaściavoha mozha.
Donar byŭ znojdzieny, i transpłantacyja prajšła paśpiachova. Akazałasia, što ŭ jaho źnik jak rak, tak i šyzafrenija.
Spačatku lekary dumali, što heta časovaja źjava i chvaroba vierniecca. Adnak prajšło ŭžo niekalki hadoŭ, i doktar Mijaoka paćviardžaje: pacyjent nie pakazvaje nijakich prykmiet šyzafrenii, niahledziačy na toje, što bolš nie prymaje tabletki.
Pierasadka kaściavoha mozha faktyčna pierazahružaje imunnuju sistemu pacyjenta. Chimijaterapija źniščaje staryja limfacyty, a novyja farmujucca ŭžo ŭ donarskim orhanie.
Viadoma, nielha rabić dalokija vysnovy tolki praz adzin vypadak, i całkam imavierna, što N. dapamahli preparaty, jakija jon prymaŭ da i paśla apieracyi pa transpłantacyi. Ale samo vyzdaraŭleńnie pakazvaje na toje, što jaho psichičny stan mieŭ niejkuju suviaź ź imunnaj sistemaj.
Heta davoli nievierahodnaja zdahadka — u rešcie rešt, što ahulnaha ŭ našaha imunitetu z mozham? Adnak usio bolš daśledčykaŭ prychodziać da vysnovy, što padobnaja suviaź isnuje.
Pieršyja nazirańni ŭ hetaj halinie byli zrobleny jašče bolš za 100 hadoŭ tamu. U kancy XIX stahodździa lekary zaŭvažyli: kali pa psichijatryčnaj klinicy idzie chvala prastudy ci hrypu, pavyšeńnie tempieratury vyklikaje palapšeńnie psichičnaha stanu pacyjentaŭ.
Aŭstryjski doktar Julius Vahnier-Jaŭreh navat raspracavaŭ novy mietad: jon zaražaŭ psichičnych chvorych malaryjaj, kab u tych raźviłasia mocnaja lichamanka. Niekatoryja pacyjenty ŭ vyniku pamierli, ale šmat kaho ŭdałosia vylečyć ad dušeŭnaj chvaroby. Za svajo adkryćcio aŭstryjec u 1927 hodzie atrymaŭ Nobieleŭskuju premiju pa miedycynie.
Malaryjnuju terapiju pierastali vykarystoŭvać u 1950-ch hadach jak zanadta ryzykoŭnuju. Adnak niekalki hadoŭ tamu byŭ apisany jašče adzin vypadak, kali psichična chvoraja žančyna vyratavałasia ad šyzaafiektyŭnaha rasstrojstva, pierachvareŭšy zaražeńniem kryvi, jakoje supravadžałasia lichamankaj.
Zrešty, jość i advarotny vypadak. U Niderłandach chvoramu na lejkiemiju pierasadzili kaściavy mozh ad brata, u jakoha była šyzafrenija. Pacyjenta atrymałasia vylečyć ad raku — ale ŭ jaho taksama raźviłasia šyzafrenija.
Padobnyja vypadki davoli redkija, ale ŭ apošnija dziesiacihodździ pa ŭsioj płaniecie ich nabrałasia ŭžo nie mienš za tuzin. I navukoŭcy aktyŭna vyvučajuć ŭzajemasuviaź psichičnych zachvorvańniaŭ ź imunnaj sistemaj.
