Andruś Kiešaniuk dajšoŭ da Viarchoŭnaha sudu, kab asprečyć administracyjnaje spahnańnie za adnaasobnuju niesankcyjanavanuju akcyju. Taksama jon napisaŭ zajavu, kab viarnuli jahonuju majomaść, piša Radyjo Svaboda.
Viarchoŭny sud nie admianiŭ nakładzienych štrafaŭ, ale pastanaviŭ admianić kanfiskacyju «rečavych dokazaŭ».
Ściah byŭ kanfiskavany pavodle rašeńnia Pieršamajskaha rajsudu Viciebsku, jaki abvinavaciŭ Kiešaniuka za vinšavańni kaleh, supracoŭnikaŭ viciebskaha «Biełtelekamu», sa stahadovym jubilejem Biełaruskaj Narodnaj Respubliki. Padčas sudu milicyjanty Vasil Karotki i Raścisłaŭ Čekan zajavili, što zatrymany «čaplaŭsia nahami za ziamlu» — u hetym i prajaviłasia jahonaje niepadparadkavańnie.
Kiešaniuk nie admaŭlaŭ, što razharnuŭ ściah kala budynka «Biełtelekamu», ale śviedčańni amapaŭcaŭ ab niepadparadkavańni nazvaŭ chłuśnioj. Sudździa Natalla Karablina aštrafavała jaho za niezakonnaje pikietavańnie i za niepadparadkavańnie supracoŭnikam milicyi na 10 bazavych vieličyń (245 rubloŭ). Sud pastanaviŭ taksama skanfiskavać «atrybut pikietavańnia» — bieł-čyrvona-bieły ściah.
Hetuju pastanovu Andruś Kiešaniuk sprabavaŭ asprečyć praz abłasny sud, ale biezvynikova. Viarchoŭny sud vyrašyŭ źmianić vyrak aktyvistu, ale nie całkam: štrafy pryznali zakonnymi, a kanfiskacyju — nie.
Staršynia Viarchoŭnaha sudu Valancin Sukała razhledzieŭ u paradku nahladu administracyjnuju spravu Andrusia Kiešaniuka i pastanaviŭ vyklučyć z pastanovaŭ zhadku pra kanfiskacyju rečavych dokazaŭ. Bo heta nie praduhledžana nivodnym z artykułaŭ, pavodle jakich aktyvista pakarali.
