Z 2009 hoda biełarusy Ńju-Jorka śviatkujuć Hukańnie viasny. Mierapryjemstva ŭžo zrabiłasia tradycyjnym. Tamu i hety hod nie staŭ vyklučeńniem, 3 sakavika na malaŭničym bierazie raki Hudzon, u horadzie Osininh (štat Ńju-Jork) sabrałasia 80 biełarusaŭ, kab hukać viasnu, vadzić karahody, viesialicca i častavacca tradycyjnymi stravami.

Stroi, vianočki na hałoŭkach dziaŭčat i sałamianyja ptuški z vobrazam zimy dy choładu ŭ abliččy lalki Mareny adrazu stvaryli adkazny i ŭračysty nastroj. Usie stali ŭ koła vakoł ich, pajšli pa ruchu sonca. I palacieli zahukalnyja biełaruskija pieśni pa navakolli: «Viasna, chadzi ŭ horu, niasi kluč za saboju, zimu zamykaci, viasnu admykaci!» — jakija supravadžalisia asablivym, ułaścivym tolki dla viaśnianak prypievam, nakštałt pierahukvańnia: «Hu-hu-hu!» Pry tym usie ŭdzielniki ŭskidvali ruki ŭharu, pasyłajučy hety huk u kaśmičnuju prastoru. Tamu ž i atrymała śviata svaju nazvu — Hukańnie viasny.

Karahody, «kryvyja tanki» dy hulni z pacałunkami sahreli i raźviesialili ŭsich. Paśla śviatočnaj častki byli pačastunki, rytualnyja stravy ŭ vyhladzie harochavaha supu, hrečniavaj kašy z hulašom, hrybnoha bulonu, blinoŭ i pirahoŭ z makam i kampot. Čarhovy hod pryhatavańniem i arhanizacyjaj śviata zajmalisia Alena i Piatro Ryžyja sa svaimi dziećmi. Valancina Jakimovič praviała śpieŭnuju častku «hukańnia». Zładžanaja kamanda kožny hod źbiraje usio bolš biełarusaŭ. Na śviatkavańnie pryjechali siemji ź Ńju-Džersi, Piensilvanii i Kanektykuta. Paśla nievialičkaha pierapynku tančyli krakaviak i polečku. Raźjechalisia dachaty ŭžo pad viečar.

Niahledziačy na prahnozy śniežnaha štormu, biełarusy zamiežža ŭpeŭnienyja, što chutka adyduć chałady ź viatrami i śnieham dy zaŭładaryć viasna.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?