Siońnia ŭ 12.30 sud Zavodskaha rajona Minska (słuchańnie i abviaščeńnie prachodziła ŭ sudzie Maskoŭskaha rajona) abviaściŭ prysud pa «spravie BiełTA». Sud pryznaŭ Zołatavu vinavataj i prysudziŭ da štrafu ŭ pamiery 300 bazavych vieličyniaŭ (7 650 rubloŭ). Padpiska ab niavyjeździe zastajecca ŭ sile da ŭstupleńnia prysudu ŭ zakonnuju siłu.

Sudździa Alaksandr Pietraš taksama pastanaviŭ spahnać z Zołatavaj 6 tysiač rubloŭ na karyść BiełTA za pasłuhi advakataŭ. Pa rašeńni suda žurnalistam Tut.by buduć viernutyja kanfiskavanyja telefony i dyski.

Praces nad Marynaj Zołatavaj pačaŭsia 12 lutaha. Jamu papiaredničała šumnaja prapahandysckaja kampanija ŭ łukašenkaŭskich ŚMI.

Hałoŭreda Tut.by abvinavačvali pa č. 2 art. 425 Kryminalnaha kodeksa (Biaździejnaść słužbovaj asoby), sankcyja artykuła — ad štrafu i da 5 hadoŭ pazbaŭleńnia voli, a taksama abmiežavańnie prafiesijnaj dziejnaści. Prakuror zapatrabavaŭ asudzić da štrafu ŭ 1000 bazavych vieličyniaŭ (25 500 rubloŭ).

«Hety praces adbiŭsia nie stolki na reputacyi Tut.by, kolki na reputacyi ŭsich jaho ŭdzielnikaŭ, uklučna z reputacyjaj dziaržaŭnych ŚMI. A Biełaruś znoŭ źjaviłasia ŭ zahałoŭkach zamiežnych miedyja jak dziaržava, dzie padaŭlajecca svaboda słova. Miedyjasupolnaść unutry krainy akazałasia raskołataj, pamiž dziaržaŭnymi i niedziaržaŭnymi ŚMI vyrasła ściana. Heta śviedčyć pra toje, što toj, chto prydumaŭ hety praces, nie vielmi sabie ŭjaŭlaŭ mahčymyja nastupstvy», — skazała Maryna Zołatava ŭ zaklučnym słovie.

7 žniŭnia Maryna Zołatava była zatrymanaja razam z bolš čym dziasiatkaŭ žurnalistaŭ. Ich padazravali ŭ prahladzie natatak dziaržaŭnaha infarmahienctva BiełTA pa zakrytaj płatnaj padpiscy. Dvoje sutak hałoŭred praviała ŭ izalatary časovaha ŭtrymańnia na Akreścina. Žurnalistaŭ i redakcyi padtrymali Jeŭrasajuz, Rada Jeŭropy, ZŠA, a taksama mižnarodnyja pravaabarončyja arhanizacyi.

Pieršapačatkova hałoŭnaha redaktara TUT.BY padazravali adrazu pa dvuch artykułach Kryminalnaha kodeksa: č. 2 art. 349 (Niesankcyjanavany dostup da kamputarnaj infarmacyi, zrobleny ź inšaj asabistaj zacikaŭlenaści, jaki paciahnuŭ pryčynieńnie istotnaj škody) i č. 2 art. 425 KK (Biaździejnaść słužbovaj asoby). Ale abvinavačvańnie było pradjaŭlena pa apošniaj. Jana adzinaja z 15 žurnalistaŭ i redaktaraŭ niekalkich ŚMI, jakija prachodzili pa spravie, čyja sprava dajšło da suda i ŭ dačynieńni da kaho śledstva nie spyniła kryminalny pieraśled. 

Клас
0
Панылы сорам
0
Ха-ха
0
Ого
0
Сумна
0
Абуральна
0