Padčas «Vialikaj razmovy» 1 sakavika Alaksandr Łukašenka zajaviŭ, što arhanizatary Dnia Voli nie atrymajuć u jakaści placoŭki stadyjon «Dynama». Kiraŭnik dziaržavy skazaŭ, što jość dazvolenaja placoŭka — płošča Banhałor — na joj i źbirajciesia. Što tyčycca letašniaha śviatkavańnia, to Łukašenka skazaŭ, što 100-hodździe było «vialikaj dataj», tamu byŭ dadzieny dazvoł na centr horada. Choć takija rašeńni adnosiacca da kampietencyi nie prezidenta, a haradskich uładaŭ, nichto nie sumniajecca, što budzie tak, jak skazaŭ Łukašenka.

Dzień Voli — 2018. 

Dzień Voli — 2018. 

Što ŭ takich umovach buduć rabić arhanizatary? Staršynia Partyi BNF Ryhor Kastusioŭ kaža, što zajaŭniki praviali sustreču adrazu paśla pres-kanfierencyi Łukašenki. Kastusioŭ prysutničaŭ na «Vialikaj razmovie», ale jamu nie dali źviarnucca da kiraŭnika krainy.

«Paśla «Vialikaha dyjałohu» ja mieŭ razmovu z kiraŭnikom Minharvykankama Anatolem Sivakom. Jon adznačyŭ, što pakul nie vałodaje infarmacyjaj u poŭnym abjomie», — adznačaje Kastusioŭ.

Pa słovach lidara BNF, u arhanizataraŭ jość šerah idejaŭ pa inšych placoŭkach, jakija jany pieradaduć haradskim uładam. Što tyčycca skviera la Opiernaha teatra, to ciapier pobač ź im adbyvajecca ramont darohi i naŭrad ci hetaja łakacyja moža być zadavolenaja.

Dyrektar kramy symbal.by Pavieł Biełavus nazyvaje tyja punkty, dzie moža być praviedzieny Dzień Voli zamiest «Dynama», — heta płošča Svabody i placoŭka la Pałaca sportu. Mienavita tam časta pravodziacca ŭsialakija haradskija śviatkavańni i festy.

«My nie prosim niejkija fantastyčnyja varyjanty, jak Kastryčnickaja płošča ź pierapynieńniem ruchu pa praśpiekcie Niezaležnaści. Nazvanyja łakacyi dobra viadomyja pa arhanizacyi masavych mierapryjemstvaŭ. Heta mahło b być kampramisnym varyjantam dla ŭsich bakoŭ», — adznačaje Pavieł.

Jon kaža, što nie źbirajecca brać udzieł u śviatkańni 101-ch uhodak śviatkavańnia niezaležnaści BNR na Banhałory. «U vypadku admovy — mahčymy scenar z decentralizacyjaj śviatkavańnia, — kaža Biełavus. — My nie źbirajemsia ładzić palityčnuju akcyju — heta śviatkavańnie, kab ludzi zmahli ŭźniać bieł-čyrvona-biełyja ściahi, pačuć vinšavańni».

Pa jahonych słovach, na dadzieny momant arhanizatary majuć damoŭlenaści šmat ź jakimi artystami, śpikierami, raspracavany firmovy styl Dnia Voli — 2019, ale pakul niama adkazu ŭładaŭ. Mahčyma, jon budzie na hetym tydni, ale chutčej za ŭsio na nastupnym.

Ci źbirajecca ładzić alternatyŭny Dzień Voli Mikałaj Statkievič i Biełaruski nacyjanalny kanhres (BNK), jak heta było letaś? Sam Statkievič pakul niedasiažny dla kamientaroŭ. Pradstaŭnik «Jeŭrapiejskaj Biełarusi» Jaŭhien Afnahiel kaža, što «pakul niama nijakich płanaŭ». Pradstaŭniki BNK miarkujuć dałučycca da asnoŭnaha śviatkavańnia 25 Sakavika.

Клас
2
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?