Kolišni rabotnik telekanała ANT Illa Kołasaŭ u 2015—2017 byŭ tvaram prahramy «Kontury» — jon začytvaŭ naviny, rabiŭ intervju z čynoŭnikami. Jaho paklikali na ANT z rasijskaha telekanała RTVI.
Vystupy Kołasava całkam układvalisia ŭ zvykłuju liniju biełaruskaha telebačańnia i nie ŭtrymlivali elemientaŭ dyskusijnaści.
Vyhlad Kołasava ŭ kadry nie śviedčyŭ pra toje, što naviny ANT jon začytvaje mima voli ci ź psichałahičnym dyskamfortam.
Jak vyjaviłasia, z takim ža samym vyhladam ciapier jon začytvaje naviny ŭ televypuskach «Hołasu Amieryki».
Tam jon uspłyŭ paśla niadoŭhaj supracy z pres-słužbaj Fiederacyi chakieja Biełarusi.
«Hołas Amieryki» — miakkaja ideałahičnaja siła ZŠA, paklikanaja idealizavać amierykanski ład žyćcia, a taksama krytykavać idejnych vorahaŭ.
Kołasaŭ pracuje tam užo niekalki miesiacaŭ, zdymaje siužety i viadzie sa studyi prahramu «Tydzień».
«Isnujuć zaściarohi adnosna stanu demakratyi i viaršenstva zakona, dziejańniaŭ u datyčieńni apazicyi, jany pavinny być uličany ŭładami Biełarusi, kab stvaryć palityčny padmurak dla źmieny adnosin», — daje Kołasaŭ słova amierykanskamu ekśpiertu, jaki raskazvaje pra adnosiny ZŠA ź Biełaruśsiu.
U nastupnym siužecie jon užo krytykuje Rasiju, u nastupnym — paviedamlaje ab padzieńni ŭzroŭniu svabody ŭ śviecie, u nastupnym — infarmuje pra pierśpiektyvy amierykanskaj ekanomiki ŭ vypadku, kali prapanavanyja Trampam zachady buduć pryniatyja.
Asabliva zachaplalna heta hladzicca, kali ŭzhadać viekapomnyja filmy Kołasava «Bie$ciennyj dołłar» i «Bie$ciennyj dołłar — 2» pra amierykanskuju valutu, jakaja niespraviadliva zaniavoliła śviet.
Taksama nie paśpieła zabycca, jak Kołasaŭ uschvalaŭ Uha Čaviesa: «Prosta jon ź ludziej, jakija mnie simpatyčnyja. Ryzykujučy naklikać na siabie niepryjaznaść ludziej, jakija b nazvali siabie libierałami ci demakratami, skažu: asabista ja da Čaviesa staŭlusia z pašanaj. Tamu pryvioz sabie z Karakasa biejsbołku z profilem vieniesuelskaha Če. Paličyŭšy, što ŭ nas matrycy kaštoŭnaściaŭ supadajuć. Mnie hetaksama simpatyčny Alaksandr Ryhoravič Łukašenka», — kazaŭ jon.
Źviazacca ź Illoj Kołasavym pakul nie ŭdałosia.
