Pra źniknieńnie kiraŭnika mahiloŭskaha adździaleńnia miedycynskaj słužby departamienta finansaŭ i tyłu MUS Siarhieja Maksimava paviedamili telehram-kanały.
«Usia miedycynskaja hramadskaść Mahilova hudzie z pryčyny źniknieńnia vysokapastaŭlenaha načalnika, — havorycca ŭ paviedamleńni. — Kala tydnia tamu kiraŭnik miedycynskaj słužby departamienta finansaŭ i tyłu MUS RB Maksimaŭ Siarhiej Uładzimiravič nie vyjšaŭ na pracu. U kabiniecie znajšli rapart ab zvalnieńni, klučy ad kabinieta i paśviedčańnie. Miarkujecca, što Maksimaŭ vylecieŭ u ZŠA ci Izrail praź Vilniu. Z sajta źnikła infarmacyja pra jaho. Zachavałasia ŭ kešy Huhła».
U rehistratury palikliniki mahiloŭskaha adździaleńnia miedsłužby departamienta finansaŭ i tyłu MUS situacyju sa źniknieńniem Maksimava kamientavać admovilisia, paraiŭšy źviazacca ź jaho pryjomnaj. Telefony pryjomnaj ranicaj 12 sakavika nie adkazvali.
Radyjo Svaboda źviarnułasia pa kamientar u słužbu hramadskich suviaziaŭ UUS Mahiloŭskaha abłvykankama. Tam situacyju sa źniknieńniem Maksimava taksama nie stali kamientavać, adnak paviedamili, što aficyjnaja infarmacyja ab hetym źjavicca ŭ najbližejšyja dni.
Miedycynskaja słužba departamienta finansaŭ i tyłu — strukturnaje padraździaleńnie MUS. U padnačalenaj joj mahiloŭskaj paliklinicy absłuhoŭvajuć pieravažna dziejnych milicyjantaŭ i vieteranaŭ viedamstva.
