Fota: pixabay.com
Pra vybar šampuniu
U śviecie isnuje dva vidy dziaŭčat: adny śćviardžajuć, što myć vałasy možna choć kožny dzień, inšyja zapeŭnivajuć, što čym radziej vy heta robicie, tym lepš. Na samaj spravie, myć vałasy nieabchodna pa miery ich zabrudžvańnia. Niama peŭnaha praviła abo ahulnapryniataj normy, pad jakuju treba padładžvacca.
Da prykładu, dziaŭčaty z tłustym typam vałasoŭ mohuć myć hałavu kožny dzień abo praź dzień, pakolki karani vałasoŭ chutka tłuściejuć. A dziaŭčyny z suchim typam — prykładna raz na 5—7 dzion. Tamu razumna budzie sačyć za čyścinioj vałasoŭ, vykarystoŭvajučy najbolš prydatny šampuń.
Jak ža vybrać jakasny šampuń? Isnuje niekalki prostych praviłaŭ:
- vybirajcie šampuń pa typu skury hałavy, pakolki stan vałasoŭ zaležyć ad pracy tłuščavych załoz i vałasianych falikułaŭ (maski, balzamy taksama vybirajem pa typu vałasoŭ);
- abaviazkova źviartajcie ŭvahu na pH šampunia: naprykład, pH tłustaha typu skury hałavy składaje 7—7,2 (šampuń pavinien mieć pH 3,2—3,5), a suchoha — 2—3 (šampuń pavinien mieć pH 6);
- ŭvažliva vyvučajcie skład srodku: parabieny, sulfaty, silikony mohuć stać pryčynaj skurnaha śvierbu hałavy, spravakavać źjaŭleńnie pierchaci.
Kali vam davodzicca myć hałavu štodnia, kupicie šampuń dla štodzionnaha vykarystańnia ź niejtralnym pakazčykam pH. Jaho možna čarhavać sa srodkam dla hłybokaha ačyščeńnia skury hałavy.
Adnak nie ŭskładajcie na šampuń zanadta vialikich nadziej. Jaho hałoŭnaja zadača zaklučajecca ŭ ačyščeńni skury hałavy ad tłušču, arahaviełych kletak, pyłu, lišku pierchaci. Ni adzin šampuń nie zdolny pavialičyć huščyniu vałasoŭ, prymusić raści ich chutčej, całkam likvidavać pierchać ci spynić vypadzieńnie. Usie hetyja pracesy abumoŭleny hienietyčnym faktaram abo sihnalizujuć ab najaŭnaści zachvorvańniaŭ, jakija nieabchodna lačyć nie tolki ŭ trychołaha.
Sprava ŭ tym, što ŭsio zaležyć ad pracy vałasianych falikułaŭ. Vałasy mohuć raści chutčej, kali ich stymulavać. Heta možna zrabić pry dapamozie masažnych pracedur. Aktyŭna vypadajuć jany, kali falikuły pierachodziać u «zaciažnuju» fazu adpačynku, i na heta jość svaje pryčyny. U normie štodnia my možam hublać ad 50 da 100 vałasoŭ.
Pra myćcio hałavy i vałasoŭ
Zdavałasia b, usie viedajuć, jak myć vałasy, ale, jak pakazvaje moj asabisty dośvied, mnohija robiać heta niapravilna. Myć hałavu nieabchodna krychu ciopłaj vadoj ci vadoj pakajovaj tempieratury. Haračaja aktyvizuje pracu tłuščavych załoz, u vyniku čaho vałasy la karanioŭ tłuściejuć značna chutčej.
Šampuń nanosicca lohkimi, masažny ruchami vyklučna na prykaraniovuju zonu. Pierad hetym jaho nieabchodna źlohku raścierci ŭ dałoniach, a zatym raŭnamierna raźmierkavać pa ŭsioj daŭžyni vałasoŭ (ad karanioŭ da končykaŭ). Paśla taho, jak šampuń ŭśpienicca, možna akuratna pamasiravać skuru hałavy na praciahu 2—3 chvilin.
Pa-pieršaje, heta pazityŭna adabjecca na pracy vałasianych falikuł. Pa-druhoje, šampuń rastvoryć zaćviardziełyja tłušč i brud. Tamu nie praktykujcie chutkaje myćcio.
Kali vałasy i skura hałavy stali čystymi, možna zmyvać srodak i nanosić balzam ci masku. Nastupny etap — vysušvańnie. Ja nastojliva nie rekamienduju chadzić z ručnikom na hałavie nieabmiežavany čas. Pad ručnikom stvarajucca «parnikovyja» ŭmovy, što pryvodzić da ŭzmocnienaj vypracoŭki siebumu (sakret tłuščavych załoz).
Fota: pixabay.com
Lepš za ŭsio pramaknuć vałasy ručnikom i pakinuć ich u spakoi da poŭnaha vysychańnia, zatym ich možna rasčesvać. Rabić heta nieabchodna ŭ kirunku ad končykaŭ da karanioŭ, vykarystoŭvajučy rasčoski ź vialikimi redkimi zubcami. Rasčesvać vilhotnyja vałasy nie rekamiendujecca, pakolki jany bolš łomki i dalikatnyja, čym suchija, i vielmi lohka paškodžvajucca.
Pra źmienu pryčoski
Toje, što siakucca končyki — prablema mnohich dziaŭčat. Što ž ź imi rabić? Vyratavać ich nie ŭdasca. Jany ŭjaŭlajuć saboj miortvuju strukturu vałasoŭ, paškodžanyja kieracinavyja łancužki, jakija nielha adnavić.
Kab spynić praces siačeńnia, ich nieabchodna sastryhčy. Kali hetaha nie zrabić, paškodžanyja łancužki buduć čaplacca adzin za adzin, dalej paškodžvajučy zdarovuju strukturu vałasoŭ.
Čamu končyki mohuć siekčysia? Isnuje niekalki pryčyn:
- niedachop vitaminaŭ i mikraelemientaŭ (niezbałansavany racyjon charčavańnia);
- niedachop vadkaści (nievykanańnie pitnoha režymu);
- niapravilny dohlad vałasoŭ (rasčesvańnie mokrych vałasoŭ niepravilnaj rasčoskaj, vykarystańnie šampuniu nie pa typie skury, admova ad užyvańnia balzamaŭ, masak, kandycyjanieraŭ);
- adsutnaść hałaŭnoha ŭboru ŭ chałodny čas hoda (na marozie vałasy vielmi chutka siakucca);
- vykarystańnie stajlinhavych srodkaŭ i srodkaŭ dla ŭkładki vałasoŭ;
- niapravilnaje vykarystańnie fiena (kali padnosić jaho blizka da vałasoŭ, možna pasiekčy vałasy kala karanioŭ);
- zachvorvańni ŭnutranych orhanaŭ, pryjom antybijotykaŭ.
Paśla zrazańnia miortvych končykaŭ nadavajcie niepaškodžanym asablivuju ŭvahu. Nie lanujciesia vykarystoŭvać alei (alej avakada, žažaba, arhana), balzamy, kandycyjaniery, rabicie pažyŭnyja maski i, viadoma ž, sačycie za racyjonam charčavańnia.
Asobna chaču zakranuć mif, jaki abviaščaje, što pakaročvańnie vałasoŭ paskaraje ich rost. Na samaj spravie heta nie tak. Na chutkaść rostu vałasoŭ upłyvaje vyklučna stan vałasianych falikułaŭ i hienietyčny faktar, ale nijak nie končyki. Stryžka tolki ažyvić vałasy, nie bolš za toje.
Dohlad vałasoŭ patrabuje sił i amal navukovaha padychodu. Kali chočacie, kab vaša šavialura vas ciešyła, karystajciesia patrebnym šampuniem, nie kuplajcie zanadta tuhija humki, jakija zdymajucca razam z vałasami, rehularna rabicie pilinh skury hałavy. Što tyčycca pilinhaŭ, to jany dazvalajuć ačyścić skuru hałavy ad zaćviardziełaha siebumu i arahaviełych kletak. Rehularnaje łuščeńnie spryjaje rostu vałasoŭ i palapšaje kletkavaje dychańnie.
A kali vašy vałasy źniasilenyja abo absypajucca, jak vosieńskaje liście, źviarniciesia pa dapamohu da śpiecyjalista. Jon dapamoža vyrašyć usie prablemy, nie ŭdajučysia ŭ mifałohiju.
