Słužba źniešniaj raźviedki Estonii praanalizavała rasijskija vajennyja vučeńni i pryjšła da vysnovy, što Maskva rychtujecca da vajennaha kanfliktu z NATA. Spravakavać jaho moža «kalarovaja revalucyja» ŭ Biełarusi.
Adzinaja surjoznaja pahroza rehijanalnaj biaśpieki dla Estonii i inšych krain Bałtyi vychodzić ad Rasii, papiaredziła Słužba źniešniaj raźviedki Estonii ŭ svaim novym štohadovym dakładzie «Mižnarodnaja biaśpieka i Estonija». Padobnuju vysnovu estonskaja vyviedka zrabiła, praanalizavaŭšy vajennyja vučeńni Rasii.
Estonskaja vyviedka zaŭvažyła, što ŭ minułym hodzie Rasija praciahnuła naroščvać svaju vajennuju moc uzdoŭž svajoj zachodniaj miažy.
Pry hetym, zaŭvažaje raźviedka Estonii, ahulny paradak rasijskich vajennych vučeńniaŭ i ich scenary nie mianialisia, niahledziačy na padziei ŭ Hruzii, va Ukrainie, u Siryi, a taksama sankcyi i razhortvańnie sił NATA ŭ Prybałtycy i Polščy.
«Pa-druhoje, jak bačać heta rasijskija ŭzbrojenyja siły, vajenny kanflikt z NATA pačniecca z-za «kalarovaj revalucyi» ŭ adnoj z susiednich z Rasijaj krain. Scenary rasijskich vajskovych vučeńniaŭ adlustroŭvajuć strach, ułaścivy aŭtarytarnym režymam. — robić vysnovu estonskaja vyviedka. — Rasijskija lidary aścierahajucca, što demakratyčnyja źmieny režymu mohuć pieraraści ŭ bolš šyrokuju rehijanalnuju vajnu».
U hetaj suviazi, zapeŭnivaje raźviedka Estonii, jana sočyć za situacyjaj u Biełarusi.
«Naša acenka takaja, što, kali niešta niečakanaje zdarycca z prezidentam Alaksandram Łukašenkam asabista abo jaho režymam, budzie vialikaja ryzyka chutkich vajennych dziejańniaŭ z boku Rasii, kab pieraškodzić pieratvareńniu Biełarusi ŭ demakratyčnuju prazachodniuju krainu», — papiaredžvaje estonskaja raźviedka.